Гогымумы

Удмурт Дунне
By Удмурт Дунне 7 марта, 2013 12:16

Гогымумы

А. Данилова

А. Данилова

Эгра ёросысь Чутыр черкогуртын но со котырысь гуртъёсын Антонида Даниловаез тодӥсьтэмез ик ӧвӧл, дыр. Та синмаськымон нылкышно 46 ар ӵоже тыршиз тазалыкез утён удысын — вож нуныослы югыт улон дуннее сюрес усьтыны юрттылӥз.

Антонида Кирилловна вордӥськиз 1940-тӥ арын Можга ёросысь Удмурт Вишур гуртын. Война кутскыку, семьяязы вить нылпи вал ни, Тонялы — куать толэзь. Анаезлэсь курадӟемзэ, вожпот вылын будэмзэс нылкышнолэн синвуостэк тодаз ваемез уг луы. Вормон бере но сием потонзы кема ӵоже ӧз буйга. Атайзы ожмаськонысь бертӥз 1944-тӥ арын пал пыд луыса.

— Пичи ке но вал, со суред али ке но син азям, — тодаз вае Антонида Кирилловна. — Тулыс сулеп вакытэ бубымес вал уробоен вайизы. Отысь со кунулбодыосын васькиз.

Семьязы эшшо кык нылпилы будӥз. Но сӧсырмем атайзы дас ар гинэ улӥз на, секыт висьыса, витьтон аресказ улонысь кошкиз. Анайзы но кема ӧз улы ни, пыктос висёнлэсь кулӥз. Пичиоссэ сузэр-вынъёссэ дышетыны, улон сюрес вылэ поттыны юрттӥз ни бадӟымез агайзы.

Сизьым классэз йылпумъяса, 1955-тӥ арын, Тоня Можгаысь медучилищее дышетскыны пыриз. Куинь ар ортчыса, одӥг парта сьӧрын пукем эшез шуэ: Тоня, айда, пе, ӵош ужаны кариськом, одӥгезлы уждунмылы тыныд мар ке басьтом, мукетызлы — мыным. Озьы эшъёсты ӵошенназы Эгра ёросысь Зурае ыстӥзы. Отын соку синъёсты трахомалэсь эмъязы.

Зура больницаысь валтӥсь врачлэн воштӥсез нылъёслы дэмлаз медпунктъёсы интыяськыны: вань басьтэм тодон-валандэс, пе, ыштоды татын. Эшъёс люкиськоно луизы, Тоняез Эгра ёросысь пичи гинэ Деревозь гуртэ ыстӥзы. Но татын солы укмыс толэзь ӵоже гинэ ужаны кылдӥз, пичи шуыса, медпунктэз ворсазы, Пирнэзьын ужаны дэмлазы.

Куинь ар пала ужамез бере Чутырысь нылпи вордон юртэн кивалтӥсь Антонидаез акушер интые ужаны ӧтиз: одӥгез ужасьсы кошкем, нош мукетыз нылпи ваем. Куинь пол сюлворыны вуылэмез бере нылаш соглаш луиз ужан интызэ воштыны. Озьы 1963-тӥ арысен Антонида Кирилловна выжы лэзиз Чутыре.

* * *
Акушерын ужан понна фельдшерлы тодон-валанзэ будэтоно луиз, трос пол ветлылӥз курсъёсы. Но нылпи ваён учырен со Деревозьын ик тодматсконо луиз, нокыӵе практикаез ӧй вал ке но.

— Ужаны кутскыкум, мыным дас сизьым арес но ӝыны вал, — маде А. Данилова. — Арлыдо нылкышно дораз нылпи ваёно луиз — соку таӵе учыръёс трос вал. Нокин юрттӥсь ӧвӧл. Ваньмыз умой ортчиз, мон вож нунылэсь гогызэ вандӥ. Ӵуказеяз, эскерыны шуыса, доразы пыри. Нылпилэн нонэмез уг луы, кылыз дэмӟемын. Кема малпаськыса ӧй улы, качыез спиртэн зырай но кылсерметсэ (уздечказэ) вандӥ. Али визьмыным озьы ӧй лэсьтысал. Маке луоно ке, пытсэт сьӧры но кема ик ӧвӧл шедьыны.

Нырысетӥез гогыям дыдыез Данилова понна пыраклы вунонтэм кылиз. Со но гогымумызэ ӧз вунэтылы. Нош шуг-секытъёсты вормемез ӧз луы: картэз нокытын ужамтэысь но юыса улэмысь, ньыль нылпиен анай улонысь ас мылкыдызъя кошкиз.

Кема аръёс ӵоже ужатозяз, Даниловалэн шуг-секыт учыръёсыз трос гинэ вал. Чутырысь больницае выжемез бере ини нылкышнолэн нуныез пыдын азьлапал вордӥськоно луиз. Асьсэлэн хирургзы ӧвӧл. Сое валаса, егит акушер совхозысь машина куриз. Ярам, одӥгез водитель соглаш луиз Эграозь келяны.

Сюрес вылысен валаз, уз вуэ больницаозь. Машинаез берыктытӥз но Ляльшурысь тодмо нылкышно доры пыртӥз нуны вайисез. Выж вылэ чылкыт валес котыр вӧлдыса, кышномуртэ отчы выдтӥз, ачиз пыдесъяськиз. Тани нунылэн пыдъёсыз адӟиськизы.

Лӥятыса но пычкиськыны косыса, нылкышно нунызэ ӝог вайиз. Ӧс куспын сылӥсь картэз, егит нылмуртлэсь вань та выремзэ адӟыса, шуиз: мон таӵе уже ноку ӧй интыяськысал. Анаез нуныеныз Чутыре ик вайизы.
1960-тӥ-1970-тӥ аръёсы Чутырысь больницаын сю пала пинал вордӥське вал араз. Уй-нунал куспын Данилова огназ куинь-ньыль нылпилы вордӥськыны юрттылӥз.

— Ужан вакытэ умой ортчиз: мынам янгышеным нокин ӧз быры — пиналъёс но, анайёс но, — шуэ со. — Кызь иськемысь гуртъёс участокам пыризы на. Троссэ вож нуныосты сюрес вылын гогыяно луылӥз. Нош кӧня абортъёс вал со вакытэ! Арняяз куинь-ньыль пол таӵе операция лэсьтылӥмы. Тросэз нылпиоссылэсь доразы куштӥськыны турттылӥзы, соосты больницае вуттылӥзы ни вир кошкыса. Огзэ нылкышноез валэн вайизы, креслое пуксьыны ӧз быгаты ни, йырсазьзэ ыштӥз.
Уйзэ нуны вайисьёсын выре, ӵукназэ нылкышноосты амбулаториын эскере-эмъя.

Нырысь аръёсаз туж секыт вал, пе. Отӥяз больницаын акушер-гинеколог но кылдӥз, арняяз кык пол педиатр вуылӥз нуныосты чакланы. Чутырысь больницаын ужатозяз, 19 врачъёс воштӥськизы.

* * *
Акушерлы калык пӧлын валэктоно уж но нуоно луылӥз со вакытъёсы. Котькудӥзлы ужасьлы 20-30 корка висъямын вал. Эскерылӥзы пыктос висёнъёслы, глаукомалы. Сьӧросъёссэс учкылӥзы, пызьнало-а, уг-а нимаз висъям порошокен. Та ужен вырылӥзы котькуд арняе четверг нуналэ.

— Милям пукыса улыны дырмы ӧй вал, — тодаз вае Данилова. — Секыт ке но, ужамы но улӥмы туж шулдыр, ог-огмес валаса. Совхозлы но юрттӥським, турнаны, мажсаськыны, етӥн ишканы потамы. Нокин уг мыны, уг лэсьты ӧз шуылы. Али со тэк пукыны но дыр шеде ни.

Ас удысаз тыршем сяна, Антонида Кирилловна дас аръёс пала районысь судын калык заседательын вал, Чутыр сельсоветъя куинь созывзэ депутатэ бырйылӥзы. Пенсие потыса, черкогуртысьтызы ветеран огазеяськонэн но вить арзэ кивалтӥз, со вакытэ ик ужаз. Яратоно больницаяз со сизьымдон арескозяз тыршиз: медсестраосты вошъяз, акушеркаын но ужаз, берло ньыль арзэ регистратураын пукиз. Кык арзэ гинэ гань-гань шутэтске.

* * *
Антонида но Виктор Даниловъёслэн нылпиоссы кемалась быдэ вуэмын ни. Олег пизы враче дышетскиз, реаниматолог-анестезиолог, Ростов улосын улэ. Вера нылзы йылпумъяз Пермьысь культурая институтэз, Историяя, кылъя но литературая Удмурт институтысь библиотекаен кивалтэ. Песянай-песятайлэн ньыль внукъёссы будо.

Уж пӧлы выем нылкышнолы капчи ӧй вал нылпиоссэ будэтыны. Вылаз ик, кузпалъяськемзы бере ньыль ар ортчыса, картэз Виктор Петрович сӧсырме — пыдыз комбайнлэн бункераз сюре. Нылпиоссэс утьыны юрттӥз ни кузпалызлэн анаез.

Котькыӵе вакытъёс вал Даниловъёслэн улоназы, но семья возиськиз, ӧз куашка. Таиз потӥз ини кышномуртлэн чиданэз но валанэз бордысь. Азьло аръёсы кузпалъёс скал но вордӥзы, табере сӥльлы кунян гинэ возё на, совхозысь басьтыса. Бакчаязы но котьмаиз будэ, емышъёссы асьсэлы но, нылпиоссылы но тырмо. Вань ужъёссэс кузпалъёс ӵошен быдэсъяло.

Виктор Петрович мылкыдзэ буйгатэ ке чорыгаса, Антонида Кирилловна пужыятскон, керттӥськон, чильпаськон борды басьтӥське. Ужакуз киужен вырыны дыр ӧз тырмылы, табере ваньмон дырыз трос. Аслэсьтыз но корказэ киужъёсыз шулдырто, кузьымлы но ярало. Нылкышно юри лыдъяса потэм: пӧртэм узорен но буёлэн 60 шаль чильпам. Ӵыжы-выжыосыз быдэс странаямы пазьгиськемын бере, шальёсыз но котькытын вӧлмемын. Даниловалэсь сюлэмзэ озьы ик буйгато кырӟанъёс. Кема аръёс ӵоже ветлэ ини культура юртысьтызы ветеранъёслэн «Купанча» ансамблязы.

* * *
Вань улэм-вылэмзэ син азяз пуктыса, Россиысь тазалыкез утён удысысь дано ужась, ужысь ветеран Антонида Кирилловна лулӟиз, малы меда, пе, асме жаляны ӧй тодылы, уй-нуналэз валаллятэк, ужай. Собере ачиз ик валэктӥз: урод ужаме ӧз поты — ужано ке ужано, шуылӥ. Адямиос сярысь ӧй ке сюлмаськысал, соос но гажасалзы меда монэ?

Гуртоос гогымумызылэсь али но визь-кенеш куро, юрттэтлы вазисько тазалыксы пумысен. Со-а бен ужезлы но улэмезлы дунъет ӧвӧл! Антонида Данилова аслаз внукъёсызлы гинэ ӧвӧл, солэн ки пыртӥз потэм уно сю нуныос понна трос полэс песянай луиз ни.

Лия Малых
Туспуктӥз Владимир Беломорских

Удмурт Дунне
By Удмурт Дунне 7 марта, 2013 12:16