Фонарь, дэрем, фляжка

Удмурт Дунне
By Удмурт Дунне 15 марта, 2013 13:12

Фонарь, дэрем, фляжка

Л. Николаева

Л. Николаева

Алнаш ёросысь Усо шор школаын вань шаертодонъя музейзы. Отын дас ар ужа ини Людмила Николаева.

Та музейысь тодыны луэ Усо гуртлэсь историзэ, татысь потэм дано адямиослэсь, Быдӟым ожысь ветеранъёслэсь улэм-вылэмзэс, вашкалаосмылэсь ужан тӥрлыксэс, адӟыны нылпиослэсь киужъёссэс. Музеен кивалтӥсьлэн Людмила Ефремовналэн верамезъя, кинлы мар тунсыко потэ. Тани нылъёс удмурт корка люкетаз пыро: йыркерттэтъёсты, суйпоскесъёсты кутылыса ик учко, мертало, кӧкыез веттало. Пиослы тунсыко пото песянай-песятайёслэн ужан арбериоссы.

— Вашкала вакытысь котькудӥз арбери ас понназ тунсыко луэ ини. Тани ӝӧк вылын кӧня фонарьёс, ваньмыз соос пӧртэмесь. Одӥгез шахтаысь ваемын. Кыдёкын ик ӧвӧл, Голюшурмаын, спиртзавод вал. Заводэз ужатон понна война вакытэ отын шахта усьтӥллям. Нылкышноос, пе, валэн отысь сьӧд эгыр потто вылэм. Но со нуон сяменызы малы ке кенже но ӝуаны кутске вылэм. Соин ик Голюшурмаысь шахта 2-3 ар гинэ ужам, собере сое ворсаллям. Усоысь, бускель Чумолёысь трос кышноос отын тыршиллям, — шуэ Людмила Ефремовна.

Гурт школаосысь одӥг музейысь но сомында удмурт дэремъёсты адӟем ӧвӧл. Татын соос, лавкаын кадь, чуренак ошиськыса уло. Людмила Николаева верамъя, музеязы даслэсь уно вашкала дэремъёс, зыбынъёс, дукесъёс. Етӥнлэсь но, пышлэсь но куэмъёсыз-вуремъёсыз вань.

— Анайёссылэсь-песяйёссылэсь дӥськутъёссэс дорамы вайизы гуртысьтымы ик Екатерина Егорова, Юлия Михайлова, Чумолёысь Ольга Николаева анаезлэсь бызем дэремзэ но дукессэ сётӥз. Соос выль кадь ик, кышномурт та дӥськутсэ сюаназ гинэ дӥсям вылэм. Озьы ик трос вашкала ӵушконъёсмы, туала пужъятэмъёслэсь соос туж висъясько. Кинлы ке Быдӟым ож сярысь тодаз вайытоз пуляен пасям фляжка, мукетызлы тунсыко потозы вашкала манетъёс. Туннэ нуналлы экспонатъёсмы 600-лэсь уно, ваньзы соос пӧртэмесь но туж паймымонэсь, — мылкыдзэ усьтэ Людмила Ефремовна.

Галина Семёнова
Туспуктӥз автор

Удмурт Дунне
By Удмурт Дунне 15 марта, 2013 13:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<