Эмъяськыны… гараже!

Удмурт Дунне
By Удмурт Дунне 1 марта, 2013 13:11

Эмъяськыны… гараже!

Больница вӧзын гараж

Больница вӧзын гараж

Алигес шуд усиз Дэри ёрослэн Иже интыяськем 2-тӥ больницаяз вуылыны. Бен, ӵем уг висьылӥськы, кызонме но ньылонме ачим эмъясько: эмезь варенняен, пыштурынэн парем чай юисько, чечыен чеснокен мӧляям компресс пуктӥсько. Нош тыэз компьютер пыр араз огпол ке но, пе, эскероно. Зэм, мынам со куинь арлы гинэ огпол пӧрме…

Эскериськыны мынон азям жингыртоно кариськи.

— Флюорография лэсьтӥськоды-а? Мар ке сьӧре басьтоно-а? — юасько.

Лэсьтӥськом, пе, паспорт но карта гинэ сьӧре басьтоно. Больница пала вуыса, воксё но пайми: юрт бездыт-чагыр буёлэн ворекъя, тӧдьы колоннаос кыдёкысь ик адӟисько. Берпуметӥяз татчы вуылыкум, больница куашкан калэ вуэмын ни вал: липетэз губырскемын, борддоръёсысьтыз штукатуркаез интыен-интыен усьылэмын. Ма, пыран-потан ӧссэ но озьы гинэ уд шедьты вал — мурӝолэ кадь пыроно луылӥз.

Нош али суред воксё но воштӥськем. Котыр чильк-вальк ворекъя, выж миськись солань-талань берга, пырись-потӥсьлэсь кырсь бервылзэ кыштырак ӵушалтэ. Ма, часталы пырон понна гинэ но выл дӥсьтэ гардеробе сётоно, пыдэ бахилаос кутчано.

Регистратураын трос гинэ калык сылэ. Ог куамын-ньыльдон минут возьмай, черод вуытозь. Оло песянайёс шуген верасько, оло картаосты утчась нылаш мырдэм вырӟылэ — ӧй вала. Укно пала вуытозям, воксё но какалмиськиз, ява. Но черодын сылэме токма луиз, регистратураын ужась нылаш монэ ураме ыстӥз… гараж пушкы. Отын, пе, флюорография ортчытӥськом. Пайми! Луэ вал, дыр, ук со сярысь, бумага вылэ гожтыса, борддоре ошыны!

Гаражын эскеро тыэз

Гаражын эскеро тыэз

Паймем тусын ик дыртӥ больницалэсь гаражзэ утчаны. Огшоры кирпичлэсь ӝутэм юртлэн ӧсъёсыз вӧлак усьтэмын. Ӧс янак вылын пул дэмӟытэмын: татын Дэри ёрослэн 2-тӥ эмъяськон юртэз, пе. Синъёсылы оскытэк, вамыштӥ гараж пушкы. Тӧдьы-горд машина пала нуись гольык музъем вылэ валемын пулъёс. Кытын ке вылын бездыт ӝуа тыл. Мӧзмыса сылӥсь пукон вылэ пыкъямын тузонэн шобырскем синучкон. Куалектӥ: оло, татчы кылиськыса пыроно? Дӥськутэн сылӥсьёсты адӟыса, буйгатски.

Азям кык мурт вал, мышкам куинь адями вуиз на. Черодэ вуыса, кызь но озь ӝужыт беро туфлиосыным корт падӟаостӥ машинае туби, мырдэм ӧсэз усьтӥ но… туала вакытысь эмъян кабинетэ вуи. Котыр чылк-чылк, шуныт. Бен, эмъясьлэн юамысьтыз бакоми ик: малы-о, пе, дорамы вазиськиды?

— Ма, ма… — абдраменым, кылъёсты ик вунэтӥ. — Флюорографиез арлы быдэ потоно шуиськоды ук, нош мон куинь ар ӧй ни возьматскылы.

Озьы тӥни тыосме эскерыны вуылӥ. Туж ӟургетэм потэ вал, но берло валай: эмъясьёс ӟеч амал шедьтӥллям: машина но токма уг сылы, адямиослы но мукет эмъяськонниосы мыноно ӧвӧл.

Паймем Ленӥ

Удмурт Дунне
By Удмурт Дунне 1 марта, 2013 13:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<