Дышетскон инты — бусы

Удмурт Дунне
By Удмурт Дунне 15 марта, 2013 11:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дышетскон инты — бусы

В. Капеев

В. Капеев

Вавож ёросысь гурт удыс арлы быдэ бадӟымесь азинсконъёс басьтэ. Татын, шуг-секытъёс шоры учкытэк, арысь аре удалтэм ю-нянь будэто, трос сӥль-йӧл потто. Вавожъёслэн ортчем арын кызьы ужамзы но азьланезлы малпанъёссы сярысь маде ёросысь гурт удысъя управленилэн кивалтӥсез Владимир Капеев.

— Владимир Александрович, кытысь пото вормонъёсты, воштӥсько-а музъемен ужан амалъёсты?

— Ушъяськемлы медаз пӧрмы, но котькуд удысын азинсконъёсмы вань: кызьы ке музъем ужанын, озьы ик пудо вордонын. Тани ю тысь будэтонъя ёросмы элькунын вормисе потӥз, котькуд гектарысь шорлыдын 27 центнер ю кутсамы, нош быдэс шаерамы со лыдпус 15,3 центнер луиз. Хозяйствоос пӧлысь элькун ӵошатсконын нырысетӥ но кыкетӥ интыосы потӥзы ёросысьтымы «Удмуртия» но Мичурин нимо СПК-ос. Соос быдэн 32,7 но 32,3 центнер урожай басьтӥзы. Татын ватсаны кулэ на: «Жуё-Можга» но «Восход» огазеяськонъёс эшшо тросгес — 34,8 но 33,5 центнер — ю тысь басьтӥзы, но жаляса верано луэ, соос ӵошатсконлэн куронъёсызлы ӧз тупалэ: юоссы 1100 гектарлэсь ичи вал. Шонер-а со курон, малпаськыны кулэ.

Азинсконъёсмы ас кожазы уг лыкто. Азьло аръёсы сямен ик, миым но тулыс бусы ужъёсты вакчи дыр куспын агротехникалэн куронъёсызъя быдэстӥмы. Но малпаммыя ваньмыз ӧз пӧрмы, музъем ужъёслы куазь зол люкетэ на. Озьы ке но, кытын музъем ужанэ трос выльзэ, туала технологиосты куто, таза кидысэз муэ сого, кулэезъя будосъёсты утё но музъемлэсь удалтонзэ ӝуто, отын котьку ӟеч емыш басьто. Кылсярысь, Мичурин нимо но «Удмуртия» эштосъёс каллен-каллен пото ни выль ужан амалэ — NO-TILL технологие — гырытэк кизёнэ. Миым соос сыӵе бусыоссэс данаклы паськытатӥзы. Вань хозяйствоос будосъёслы мочевинаен подкормка сёто. Нош «Восход» огазеяськон миым нырысьсэ Австриысь вайиз ю тысь но сьӧдчабей кидыс. Берло дыре озьы ик бадӟым саклык висъяськомы рапс будэтонлы. Со пудо сиёнлы туж умой мынэ но мушъёслы чечы люканы юрттэ.

— Сыӵе ужаны быгатэменыды валче ик арлы быдэ «Бусылэн нуналэз» бадӟым ужрад ортче Мичурин нимо эштосын.

— Озьы. Нош миым дорамы дышетскыны ветлӥзы быдэс Приволжск федерал округысь улосъёсысь нянь будэтӥсьёс. Со шумпотымон но данъяськымон, азьланьын уката ӟечгес ужаны мылкыд ӝутӥське. Куноосмы та ужрадъёсын уно выльзэ тодо, ӟеч техникаез адӟо но туала музъем ужан амалъёсын тодматско. Нош миым ик «Август» фирма «Удмуртия» эштосын «Бусылэн арез» конференция ортчытӥз. Отчы лыктэм специалистъёс тупен-тупен тодматскизы будосъёсты висёнъёслэсь, жуг-жаглэсь утён препаратъёсын но амалъёсын.

Пусйыны кулэ: гурт хозяйствоосысь валтӥсь агрономъёсмы вис карытэк тодон-валанзэс будэто, вылезлы дышетско. Удмуртиын но Россиын ортчылӥсь ужрадъёсы пырисько. Сотэк туннэ нуналлэн куронъёсызлэсь бере кылёд. Озьы шуыны луоз «Удмуртия» но «Колос» СПК-осысь валтӥсь агрономъёс Фёдор Ложкин но Андрей Родионов сярысь. Озьы ик усто тыршо «Жуё-Можга», «Луч», «Горд Октябрь» но Мичурин нимо эштосысь валтӥсь агрономъёс Александр Березин, Алексей Чирков, Татьяна Кузьмина но Любовь Тихонова. Ваньмыз таос ёросын тодмо но гажано адямиос луо. Соослы тау карисько.

Котькинлы валамон, музъем уже туала амалъёсты уд пыӵаты выль, ӟеч техникатэк. Со понна хозяйствоос миым гинэ 30 пумо пала гырон-кизён, аран техника басьтӥзы. Соин ӵош ик берло дыре эштосъёс бадӟым саклык висъяло кунгож сьӧрын поттэм техникаез вуттонлы. Нош со гуртысь инженеръёс азе бадӟымесь куронъёс пуктэ. Озьы мылысь-кыдысь, дырзэс но кужымзэс жалятэк, тыршо «Колос», «Удмуртия», «Восход» но «Луч» эштосъёсысь валтӥсь инженеръёс Василий Протопопов, Вячеслав Смирнов, Сергей Волков но Николай Манашев. «Лучысь» Алексей Смердягин миым ветлӥз Краснодар улосэ «Югагро-2012» ужрадэ механизаторъёслэн ӵошатсконазы, 10 устоосыз пӧлы шедиз. Чебер, вольыт гыремез ваньмызлы кельшиз.
Арысь аре голланд амалэн удалтэм картофка будэто «Жуё-Можга», «Удмуртия», «Колос», Мичурин нимо эштосъёс но мукетъёсыз.

Музъем ужасьёсмы миым озьы ик ушъямон тыршизы пудо сиён дасянын. Быдэс ёросъя одӥг пудо йырлы 34,6 центнер кормовой единица дасямын, валля арен ӵошатыса, со данаклы трос. Соин ик пудо туэ умой толъе.
Ватсам потэ на: кылем арын кысык бусы ужъёсты нуыны 885 тонна дунтэмгес эстӥськон висъямын, кулэезлэсь со 40 процент. Со юрттӥз 14 миллион манет шыръяны, гырон-кизён ужъёсты ӝог но ӟеч быдэстыны.

— Кызьы тодмо, гурт хозяйствоын валтӥсь инты басьтэ пудо вордон.

— Шонер. Гурт удысын поттэм барышлэсь 75 процентсэ сётэ пудо вордон. Берло 12 ар ӵоже ёросмы элькунын йӧл-сӥль поттонъя азьмынӥсьёс радын ветлэ.

Миым, 2011-тӥ арен ӵошатыса, данаклы трос йӧл кыским, быдэс ёросъя скаллы быдэ 5 сюрс килограммлэсь ятыр луиз. Берло дыре пумен уногес йӧл люкало «Вавож-регион», «Жуё-Можга», «Восход», «Горд Октябрь» эштосъёс. Азьло сямен трос йӧл кыско «Удмуртия», «Колос», «Луч» но Мичурин нимо СПК-ос. Соин ӵош ик йӧллэсь ӟечлыксэ будэтӥськом, ваньмыз сямен со вылӥ но нырысетӥ сортэн кошке. Напез но, белокез но будо. Ум вунэтӥське пудо йырез будэтон сярысь. Та ласянь но ӟеч ужало «Удмуртия», Мичурин нимо, «Колос» но «Луч» эштосъёс. Ёросамы дано но гажано валтӥсь зоотехникъёс луо «Удмуртиысь» но «Лучысь» Александр Елмашев но Галина Чиркова. «Колос» СПК али 400 йырлы гид пуктэ, нош «Каменный Ключ» 100 йыр скаллы гидзэ тупатъяз.

Оглом вераса, ёросын умой мынэ пудолэсь выжызэ умоятон. Али ӝыныез хозяйствоос племрепродукторъёс луо, соос пӧлысь кыкез — племзаводъёс. Пудоосты возьматонъя выставкаосын милям скалъёсмылы нырысетӥ интыос сёто.

Йӧл но сӥль поттонын озьы ик бадӟым инты басьто пудо бызьылытӥсьёс, пудо першалъёс, нош дояркаос сярысь веранэз ик ӧвӧл. Соос вылын возисько фермаос. Отын уж ялан капчия ке но, кышномуртъёслы секыт йӧтэ ай. Ваньмызлы пудо сюдӥсьёслы, механизаторъёслы, специалистъёслы, кивалтӥсьёслы тау карыса шуныт кылъёс верасько но юн оскисько: азьланьын ужъёсмы уката азинскозы. Вормонъёс милемды уг буйгато. Нош азьпалан эшшо но бадӟымесь ужпумъёс сыло. Милям арлы быдэ выльдӥсько пудо гидъёсмы.

Гурт удысысь кивал-тӥсьёс пӧлысь тужгес но даноосыз, быгатӥсьёсыз луо Валентин Калинин, Аркадий Юшков, Владимир Красильников. Соослы музъемозь йыбырттӥсько! Соослэн но мукетъёсызлэн тыршемзы бордысь потэ ёрослэн данэз но азинсконэз.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 15 марта, 2013 11:02