Ӵошатскон вае пайда

Удмурт Дунне
By Удмурт Дунне 29 марта, 2013 09:52

Шаерамы азьланьтӥське тулыс бусы ужъёслы дасяськонъя толэзь. Cо йылпумъяськоз 15-тӥ оштолэзе. Техникаез тупатон вылысь хозяйствоосын нимысьтыз бригадаос кылдытъямын. Соослэн ужамзы пумысен кенешим Гурт удысъя но сиён-юонъя министерствоысь механизацияя ёзэн кивалтӥсен Николай Метелёвен.

— Николай Владимирович, тулыс ужъёслы техникаез дасян ӟеч сямлы пӧрмемын ни.

— Умой кивалтӥсь толалтэ ик ваньзэ дася. Но котькытын озьы ӧвӧл. Туала вакытэ законъя ум быгатӥське косъяськыны, кинлы ма карыны. Котькуд хозяйстволэн аслаз ужан планэз. Ми эскериськом субсидиослэсь кутӥськемзэс, выль технологиосты вӧлмытонэз. Нош кысык ужъёсты ӝогомытыны ми куриськом ёрос администрациос пыр. Умой амал та ласянь луэ ӵошатсконэз радъян. Собере, усто лэсьтэм ужез пичияк ке но дунъяськод ке коньдон премиен-а, грамотаен-а, адямилэн мылкыдыз бурдъяське. Ми эскеримы, кызьы таӵе ӵошатскон мукет улосъёсын радъямын. Кытын ке со чик но ӧвӧл ни. Нош кытын ке асьмелэсь умойгес. Тани Ставрополь палан, кылсярысь, совето аръёсы сямен комиссия кылдыто. Отчы пыро профсоюзысь, калык огазеяськонъёсысь, ёрос администрациысь, министерствоысь адямиос.

— Кыӵе югдур асьмелэн техника басьтонъя?

— Трос басьтӥськомы кадь ке но, югдур сокем ик умой уд шуы. Тани араз воштӥсько 3,8 процентэз гинэ тракторъёс, пудо сиён дасян комбайнъёс — 5,7 процентэз, ю кутсан комбайнъёс — 6,2 процентэз. Тазьы асьмеос ноку но техникаез быдэсак ум выльдэ. Ваньзэ воштон понна 10 ар кулэ. Та дыр ӵоже азьло басьтэмъёсыз нош ик вужмозы. Сыӵе выльдӥськонлы кулэ 700-750 миллион манет республикаысь субсидиос. Нош туэ асьмелэн 150 миллион манет висъяськоз. Умой, гурт техникалы коньдон мыноз на асьме республикаысь Промышленностья но энергетикая министерство пыр. Нырысь араз со ӧжытгес вуоз, нош 2020-тӥ арлы бадӟымалоз. Нош али гуртоос, коньдонзы тырмымтэен, отысь но татысь утчаськыса, вуж техниказэс тупатъяны выро. Воштос ёзъёслы трос уксё кошке. Куд-ог хозяйствоос 8 миллион манет быдто.

— Выль технологиосты пыӵатыса, ичигес тӥрлык кутӥське, шуо.

— Мукет кунъёсын кемалась гыремысь дугдӥзы. Та амалэз пыӵатӥз ас вакытаз Курган улосысь агроном-тодосчи Терентий Мальцев. Удмуртиын нырысьсэ та борды басьтӥськизы Вотка ёросысь «Июльское» учхозын. Соя нокыӵе геры кулэ ӧвӧл. Муэз 8-10 сантиметр бугыртыса потоно. Одӥг мынэмен луэ муэз небӟытыны, кизьыны, сылало ватсэтъёс тырыны. Ваньзэ одӥг техника лэсьтэ.

Таин ӵош шыръясько кизер эстӥськон, сылало ватсэтъёс, яд суретъёс. Бусые кельтэм куро выжы воштэ вань ватсэтъёсты. Сомында гинэ бугыртэме тырмыт сюре омыр, отын ӟеч улӟо кулэ микробъёс. Тырмыт фосфорез но, азотэз но, калиез но. Озьы 30 аръёсын гырытэк но, музъемлэн пайдалыкез ялан возиське. Паськыт агрегатэн кык пол гинэ бусые потаськод на — кизьыны но утялтыны. Озьы 5 трактор интые одӥг гинэ кулэ луоз. Ӧжытгес коньдон быдтыса мулэсь пайдалыксэ ӝутӥсьёслы нырысь ик субсидиос но висъяськозы. Но та дырлы ваньмыз ик кивалтӥсьёс но специалистъёс уг валало на сое, оло нош юромо валамзы уг поты.

— Туннэ кыӵе техникаен ужало гуртоос?

— Ма азьло аръёслэсь кылемын, соин ик ужало. Асьме промышленность гурт техника кылдытонъя трослы ик азьлань вамыш ӧз лэсьты. Соин ик тросэз ёзъёс ог-огзэс воштыны тупало.

— Хозяйствоослэн асьсэлэн тупатыны луонлыкъёссы ӧвӧл ке, кытчы вазисько?

— Зэм ик, трансмиссиосты, двигательёсты тупатыны нимысьтыз тӥрлык кулэ. Техника тупатъян предприятиос азьлоосыз ик кылемын. Соос пӧлын Пичи Пургалась РТП. Со аслэсьтыз данзэ котьку возе. «Агроснаб» огазеяськон тупатъян бордын умой ужаны кутскиз. Вазисько ке, котьку юрттыны дась ИПОПАТ. Солэн котькыӵе станокъёсыз вань. Мукет предприятиос но, кытын кылемын на специалистъёс, дась ужаны. Ваньзы соос тупато Т-150, МТЗ тракторъёсты.

— Нош кунгож сьӧрысь басьтэм техникаез тупатон бордын кинъёс ужало?

— Та секыт юан. Кунгожсьӧр техникаез тупатон ляб радъямын. Солы сервис кулэ. Нош сое вузасьёс кыл вылын гинэ быдэсъяло ай тупатон ужъёсты. Куд-ог вамышъёс лэсьтэ ни та ласянь «Агрохолодмаш» предприятие.

— Та дырлы кӧня но кыӵе техника бусые потыны дась ни?

— Гурт хозяйствоосын 6 сюрс 641 трактор, со пӧлысь али ик ужаны дась 5 сюрс 123-ез яке 77 процентэз. 88 процентэз тупатэмын вавожъёслэн но дэриослэн, 80 процентлэсь ятырез — Алнаш, Балезино, Грак, Пичи Пурга, Эгра ёросъёсысь хозяйствоосын. Каракулино ёросын ӝыныез гинэ.
Автомобильёс тупатэмын 70 процентэз, кизён агрегатъёс — 71, герыос — 80, культиваторъёс — 73 процентэз. 2011-тӥ но кылем аръёсын ӵошатыса, туэ тупатъян ужъёс умойгес мыно.

Иван Аркашев

Удмурт Дунне
By Удмурт Дунне 29 марта, 2013 09:52
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<