Брангуртын улон котьку пӧзиз

Удмурт Дунне
By Удмурт Дунне 22 марта, 2013 11:43

Брангуртын улон котьку пӧзиз

brangurtБерло аръёсы трос верасько Пичи Пурга ёросысь Брангурт черкогуртлэн нимыз котырын. Соиз валамон но, ваньзэс бугыртӥзы Брангурт песяйёс. Но таяз учыре вераськон мыноз черкогуртлэн историез пумысен.

1710-тӥ-1711-тӥ аръёсы ортчем перписьлэн документъёсаз Брангурт сярысь ивор нырысьсэ сюремын. Гожтэмын, улӥсьёсыз 7 коркан интыяськемын. Озьыен, гуртлы 300 ар пала гинэ ай.

Г. Верещагинлэн гожтэмезъя, брангуртъёс татчы вуиллям туала Дэри ёросысь Сизьгуртысь, вашкала нимыз Верх. Кены. Гурт ас вакытаз сылӥз Сарапул — Малмыж тракт вылын, Малмыжын сюрес герӟаське Сибирь трактэн, соку ик гуртэ усьтэмын постоялой двор.

ХIХ даурлэн пумаз но ХХ даурлэн кутсконаз Брангурт черкогурт Вятка губерниын одӥгез ӟеч азинскемез вал. 1860-тӥ арын усьтэмын Брангурт приход, висъяськиз со туала Сарапул ёросысь Козло (Козлово) приходысь. Та аре ик гуртэ усьто Вӧсяськон корка. 1862-тӥ-1865-тӥ аръёсы пукто кирпичлэсь черк, солы коньдон висъя Елабуга карысь 1-тӥ гильдиысь Ф. Чернов купец. Черк бадӟым вылымтэ, куинь престолэн: сӥземын Дун-чылкыт Троицалы, Дун-чылкыт Михаил Архангеллы но Дун-чылкыт Илья Пророклы.

1863-тӥ арын усьтэмын одӥг аръем приходской училище (церковно-приходской ӧвӧл). Отын нырысетӥ тодон-валанъёс сёто: дышето лыдӟиськыны, гожъяськыны, лыдъяськыны, котькытын сямен ик, дышето Закон божиез. Брангурт волостной центр луэмен но приход усьтэмен, луонлык кылдэ почта радъяны. Та вакытэ ик лэсьтэмын волостной правленилы бадӟым пу юрт, бӧрысь — Народный дом, клуб, культура юрт.

Паласькись висёнъёс вӧлмемен, 1909-тӥ арын Сарапул земство Брангуртэ усьтэ эпидемиологической больничка. Отын эскеризы но эмъязы ог кызь иськемысь гуртъёсын улӥсьёсты. Г. Верещагинлэн тыршеменыз, гуртын усьтӥське библиотека, уждун басьтытэк, соин ачиз ик кивалтэ.

Черкогуртын озьы ик кылдэ Сарапул уездысь Вина юонлы пумит нюръяськонъя попечительской комитетлэн ёзэз (Попечительский комитет народной трезвости), таиныз но кивалтыны пуктэмын Г. Верещагин. 1912-тӥ арын усьтэмын Кредитной товарищество. Та вакытэ брангуртъёслэн кык вукозы но одӥг тӧл вукозы вылэм.

Бугырес 1917-тӥ ар бере гуртъёслэн улонзы огвыллем радъяськиз: Граждан ож, колхоз кылдытон, пятилеткаос, Быдӟым ож, коммунизме сюрес лёгон, СССР-ез куашкатон но валантэм туннэ нунал. Брангурт улэ, азьлань вамыштэ, аслэсьтыз туссэ чеберма но данзэ уте.

Брангуртысь школалы туэ 150 ар тырме. 1869-тӥ арын приходской школаез выжто Сарапул земстволэн бурд улаз. 1917-тӥ арозь со 4 аръем курсъёсын земской училищелы пӧрме. Нош 1920-тӥ арысен нимаське Бурановской советской трудовой школа. 1925-тӥ арын Удмурт шаерамы усьто 5 ШКМ (школа крестьянской молодёжи), одӥгзэ — Брангурт черкогуртэ. Азьланяз школамы луэ 7 классъем, собере — 8 классъем, нош та вакытэ лыдъяськиськом Брангуртысь Г. Верещагин нимо шор ёзо школа.

18-тӥ даурлэн кыкетӥ ӝыныяз школаямы ужаз нырысетӥез удмурт дышетӥсь, этнограф, священнослужитель Иоанн Васильев. 1900-тӥ-1927-тӥ аръёсы Брангуртын улӥз но ужаз тодосчи-этнограф, писатель, миссионер Григорий Верещагин. Школамы данъяське дышетэм пиналъёсыныз но, соос пӧлын: Георгий кирослэн 4 полэс кавалерез Я. Байсаров, тодосчи-лингвист К. Баушев, история наукаосъя доктор К. Шибанов, Социалистической Ужысь Герой С. Гондырев, калык писатель К. Ломагин, журналист Эрик Батуев но мукетъёсыз.

Школамы дано лыдпуссэ пусйыны дасяське 19-тӥ апреле. Кин ас вакытаз дышетскон аръёссэ герӟаз Брангурт школаен, куриськом тодэ ваёнъёстэс гожтыса лэзьыны яке пумиськонэ лыктыны.

Владимир Байсаров
Пичи Пурга ёросысь Брангурт школаысь музеен кивалтӥсь

Туспуктэмез: www.troica.org

Удмурт Дунне
By Удмурт Дунне 22 марта, 2013 11:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<