Биньгозы интые басма

Удмурт Дунне
By Удмурт Дунне 13 марта, 2013 16:02
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Биньгозы интые басма

Cоколов

Фестивальлэсь зарнизэ басьтӥзы Дмитрий Cоколов кивалтэм улсын тэтчась акробатъёс

Ижын йылпумъяськиз Цирк искусствоя 6-тӥ калыккуспо фестиваль. Ньыль нунал ӵоже Удмуртиысь цирке вуылӥзы 15 сюрс пала адямиос. Таяз фестивале лыктӥзы 16 кунысь 200 пала артистъёс. Учкисьёслы но дунъясьёслы соос возьматӥзы 32 номер.

Удмуртиысь цирклэн пресс-службаез ивортэмъя, нырысьсэ таӵе фестивале пыриськизы Эфиопиысь но Тайваньысь артистъёс. Азьвылъёсаз сямен, туэ но учкисьёслы мӧзмыт ӧй вал. Паймытӥзы омырын бергась гимнастъёс, клоунъёс. Аспӧртэм номеръёс дасяллям левъёсты, леопардъёсты но валъёсты дрессировать карисьёс. Кужмо, чебер но резинка кадь куасалляськись мугоръёсынызы шумпоттӥзы акробатъёс, эквилибристъёс, кульчо вамен тэтчасьёс — Китайысь, Украинаысь, Азербайджанысь, Польшаысь тодмо артистъёс. Фестивалез нуиз тодмо клоун, Россиысь дано артист Александр Фриш. Дорамы со нырысьсэ уг вуы ни.

Калыккуспо ужрадэ билет шедьтыны секыт. Шаерамы улӥсьёс тодо ини, макем тунсыко представлениос луо та фестивальёсын. Сое шӧдыса ик, Ижысь улӥсь Лилия Абдулина кык толэзь талэсь азьвыл билет басьтыса дасяськиз.

— Мон кыкетӥ арзэ цирк фестивалез учки. Кылем арын пичи пие ӝыны программаез гинэ адӟыны чидаз вал, нош туэ куинь час ӵоже пыд йылаз сылӥз. Сокем кельшизы солы артистъёс. Татын пичиос гинэ ӧвӧл, бадӟымъёс но, арлыдзэс вунэтыса ик, ымзэс усьтыса, учкизы, гимнастъёс, акробатъёс шоры, кӧтсы шуг луымон серекъязы Германиысь клоунъёсты. Сомында кужмо но ог-огзылы тупасьтэм номеръёс. Монэ паймытӥз Россиысь Виталий Смолянец. Солэн мумы левъёсыз дорын улӥсь коӵышъёс кадь лякытэсь, кылзӥськисесь. Синмаськи Россиысь ик мукет усточилы — Лаура Баронлы. Та артистка арена вылын Ковчун валэныз вальс бергаз. Кышномурт кияз, биньгозы интые, басма кесэгъёс кутэм. Солэн номерез туж чебер адӟиськиз, — шуиз Лилия Абдулина.

Зэмзэ но таяз уката но висъяськизы Россиысь артистъёс. Валтӥсь кузьым — Зарни гондыръёс — ваньмыз кылизы Россие. Пусйыны кулэ, 6-тӥез фестиваль кузьымъёслы узыр вал, ваньзэ-ӧвӧлзэ усточиослы сётэмын 14 зарни, азвесь но туй гондыръёс. Кылем арын та лыдпус 12 вал, кык ар талэсь азьло — 10 гинэ. Фестивалез дунъяз калыккуспо жюри, дышем сямен отчы пыризы Франциысь Бруно Лалой, Монте-Карлоысь Урс Пилс но трос мукетъёс. Жюрилэн председателез вал Удмуртиысь культурая, печатья но иворъёсъя министр Дмитрий Иванов. Солэн верамезъя, вормисьёсты бырйыны капчи ӧй вал, малы ке шуоно арысь аре фестивальлэн ӟечлыкез будэ, соин ик туэ кузьым басьтӥсьёслэн но лыдзы йылӥз.

Зарни гондыръёсын доразы бертӥзы Россиысь Запашный агай-вынъёслэн цирказы ужась акробатъёс, кивалтӥсьсы Сергей Трушин; левъёсын аттракционэн ужась Виталий Смолянец; гепардъёсты дрессировать карисьёс Дарья Костюк но Вячеслав Курков; Дмитрий Соколов кивалтэм улсын тэтчась акробатъёс.

Азвесь гондырен пусъемын США-ысь Саша артистка, Китайысь акробатъёслэн труппазы, Эфиопиысь Кайка агайёс, Украинаысь «Парадиз» дуэт но Болгариысь Энчо Ке эквилибрист.

Туй гондыр шедиз Россиысь Лаура Баронлы, Украинаысь омырын бергась гимнастъёслы, Германиысь Бобылев клоунъёслы, Германиысь жонглёръёслы но Украинаысь «ЭкиВоки» триолы.

Галина Семёнова
Туспуктэмез: udmpravda.ru

Удмурт Дунне
By Удмурт Дунне 13 марта, 2013 16:02