Йыр быръёз, пыд нуоз

Удмурт Дунне
By Удмурт Дунне 18 февраля, 2013 15:35

Йыр быръёз, пыд нуоз

profkonsultantЭлькунысьтымы калыкез уже интыянъя службаысь профконсультантъёс алигес ветлӥзы Алнаш ёросэ. Асан гуртысь школае люкаськизы ёросысь 9-тӥ но 11-тӥ класъёс. Соосын ортчытэмын вал тестирование.

Та ужрадысь котькуд выпускник аслыз туж трос пайдаёзэ басьтӥз. Уго тросэз школаез йылпумъясьёс уг тодо, кыӵе профессия басьтоно, кытчы дышетскыны пыроно. Но луэ, аръёс ортчыса валало — со чик но соослэн ужзы вылымтэ.

— Коткуд ар ми потаськом элькунысь школаосы тестирование ортчытыны. Та кун программа, выпускникъёслы дунтэк сётӥське. Пинал дыръямы милемлы нокин нокыӵе сюрес ӧз возьматы. Тани ачим но, номыре тодытэк, отын-татын дышетски. Тодон-валан басьтыны 7-8 ар быриз. Сыӵе учыръёс трос. Профессия быръёнын «потэ», «кулэ», «быгатӥсько» формулаез кутоно. Нырысь вамыш дышетскон сюресэ школаын ик лэсьтоно, быръёно экзамен, кудӥз кулэ луоз дышетскыны пырон понна, — шуэ профконсультант Елена Чернова.

Нош тӥ, гажано выпускникъёс, тодӥськоды-а кытчы дышетскын мыноды? Кыӵе уж тӥледлы тужгес тупалоз но сюлэмдыя луоз? Уд ке — чектӥсько пыраны www.prof.labor.ru сайтэ. Татын, онлайн тест лэсьтыса, тододы мар тӥледлы тужгес но тупалоз. Вань выпускникъёслы сӥзисько асьсэлэсь ӧрзэс шедьтыны!

Анна Шарыпова
Алнаш ёрос
Вылӥ Утчан школа

Туспуктэмез: www.yolatrud.ru

Удмурт Дунне
By Удмурт Дунне 18 февраля, 2013 15:35