Вотэсысь выль тулкымъёс

Удмурт Дунне
By Удмурт Дунне 26 февраля, 2013 14:13
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вотэсысь выль тулкымъёс

Вунылъёс, вожоос люкасько уй клубъёсы

Вунылъёс, вожоос люкасько уй клубъёсы

Туала крезьгур микро-трендъёс туж ӝог кылдо, озьы ик ӝог куло. Витч-хаус, сипанк, айспанк, фрутпанк, вэйпорвэйв, муслим-транс… Тужгес но ӟеч соос син азе пуксё tumblr.com бамын. Татын соосты тэгъёс пыр шедьтыны луэ: #seapunk, #icepunk. «Панкъёсын» ваньмыз валамон кадь: sea — зарезь, ice — йӧ. Иське, огез зарезь крезьгурлы кельше, мукетыз — кынмем вулэн куараезлы.

Вукузё но Вумурт

Сипанкез малпаз Чикагоысь Fire for Effect нимын гожъясь крезьгурчи, со ик Ultrademon. Тумблер но твиттер пыр со выль тулкымез калык азе поттӥз. Та крезьгурез висъяло аква (ву, зарезь, океан) шӧмъёс-тусъёс: дельфинъёс, пляж, кот дӥсь но йырси, чагыр буёл. Ачиз крезьгур тырмемын кадь бульыртӥсь куараосын, дельфинъёслэн чипсэменызы… Мукетыз сипанк гожъясь нылмурт — Zombelle — ымдурзэ пеймыт (сьӧд, лыз) помадаен буяны яратэ, Гавайысь дэремъёсты, голограммаосын очкиосты но 90-тӥ аръёсысь модаез гажа. Сипанк кырӟанъёс пӧлын туж трос вуж гуръёслы ремиксъёс. Туссыя но соос аспӧртэмесь, пӧртэм символъёслэсь гожтэмын. Вераны кулэ, туала тренд крезьгур нимъёсын юникод пусъёс укыр вӧлмемын. Татысь ик йӧспӧртэмъяськись нимъёс: Анжела Wуныл 93, BLsCK =CEILING — S4Y0RDEW но мукет.

Чагыр йырсиё Zombelle но вож йырсиё Ultrademon

Чагыр йырсиё Zombelle но вож йырсиё Ultrademon

Сипанк крезьгурчиослэсь гуръёссэс кылзыны луэ Coral Records лэйблын потэм альбомъёсысь. Вотэсысь татын шедьтыны луэ: www.coralrecords.bandcamp.com/album/seapunk-volume-1-splash001

Лымы ныл но Тол бабай

Айспанк — сипанклэн выныз, но сокем эктоно кадь ӧвӧл. Пляж гуръёс шулдыресь ке, «йӧпанк» кезьыт мылкыдо, огсыр чузъяськись. Со люкаськемын Aural Sects огазеяськон котыр. Озьы ик мукет трендо, тузӥ ӧръёс сямен, «ВКонтакте» бамын но нимысьтыз гожтӥськонъёсын пумиське. Сипанк зарезьлы сӥземын ке, айспанк Арктика, лымы, йӧ дуннеез данъя. Тани кӧня ке нимъёсыз: dPERMAFROSTd — Yung Arctic, I₵y Pharmaceuticals — iҫe hospital, Cold Casey — Night Ice. Интернетысь хипстеръёслэн выль поколенизы понна айспанк — со выль витч-хаус. Кӧня ке ар талэсь азьло Россиын витч-хаус модае пыриз ик: позыръяськонъёсын чузъяськиз, тодмо кырӟасьёслэсь хитъёссэс, кылсярысь, Бейонсеез, кык поллы калленгес шудыса. Собере, тросэз одӥг нуналъем трендъёс сямен, кысӥз. Айспанклэн огвыллем тодметъёсыз: «кезьыт» синтезаторъёс, китч порма огшоры гуръёс но минимал-эстетика.

Айспанк: зарезь ик кынмиз!

Айспанк: зарезь ик кынмиз!

Малпаськоно ке, кытысь потэ та тренд-шудон но крезьгур-шузияськон, тани кыӵе малпан лыктэ. Ваньмыз та — крезьгурысь постмодерн, малпамез вылын малпам, ирония, туала Интернет дуннеез но крезьгурлэсь жаг мында луэмзэ мыскыллян. Удмурт кылэ берыктоно ке, трендъёс выллем сяськаяськысалзы, дыр: загребин-поп (огвыллем, сюлме пырись попса), анисимов-транс (бигер но пор шӧмо гуръёс), ганьков-трэп, гербер-хоп…
Вуоно номерын лыдӟе #vaporwave но #muslim-trance сярысь.

Барбара Позыръяськонова
Туспуктӥз Роман Рябов
Суредаз Денис Тубылов

Удмурт Дунне
By Удмурт Дунне 26 февраля, 2013 14:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<