Воргорон ке тон вӧзын

Удмурт Дунне
By Удмурт Дунне 22 февраля, 2013 13:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Воргорон ке тон вӧзын

Вӧзады мед луоз лапег, кӧй, кожой ке но - воргорон

Вӧзады мед луоз лапег, кӧй, кожой ке но — воргорон

Атыкай музъемез утисьлэн нуналыз азьын юан кылдэ: ӟечкылано-а картме та праздникен яке ӧвӧл-а? Одӥг ласянь, кузпалы армие ветлэмын ӧвӧл. Мукет ласянь, со но кыӵе ке сыӵе пиосмурт ведь.

Россилэсь кунгожзэ ӧз утьы ке, картэ милемыз, семьязэ, уте. Пунымы ӧвӧл, капкамы урод ӵогаське. Соин ик вань осконэ Олёше вылэ. Но, асьме куспын вераса, оскон солы со порма. Мугор лапег, тус пичи пияшлэн кадь, сямыз небыт… сазь дыръяз. Быземелэсь азьло мон туж синмаськись вал, чебер пиос шоры гинэ учки. Но визьмо нылъёс валэктӥзы: чебер пиосмурт калгись, пе, луэ. Малы-о мыным сыӵеез? Бырйи огшорызэ. Бен, Олёше кожойгес, малпай, ӵок, эсьма, син уз усьы, собере кырыж пыдъёсын мурт кышноос дортӥ уз ветлы. Картэлэн мугор лапег но кӧт бадӟым. Нош ик малпай: кышноез умой сюдэ, шуозы. Люгы куар быдӟаесь пельёсыз но ӧз кышкатэ. Книгаысь лыдӟи, бадӟым пелё адямиос, пе, туж ӟечесь. Малпасько: кык полэс умой со, мынэсьтым верамъёсме котьку пеляз поноз.

Кузпалъяськыкумы Олёшеным сямъёсмы огкадесь пото вал. Но тани 20 ар ӵош улыса ини, валасько но паймисько, макем зол ог-огзылэсь висъясько нылкышноос но воргоронъёс.

Тани учке ай, пиосмуртлэн коть пичиесь, коть слонлэн быдӟаесь пельёсыз мед луозы, соос урод кыло. Шонерзэ вераса, мае ке кыло, мае ке уг. Мон Олёшлы котькуд нунал шуисько: мусое, вить ар сапегме нуллӥсько ини, выльзэ басьтоно вал. Уг кылы. Нош сиськыны шыпыт гинэ ӧтисько кадь, шыд ӝутыны уг вуиськы, картэ ӝӧк сьӧрын нянь куша ни. Котькуд уй валасько: кузпалылэн зэмзэ но пельыз секыт. Солэн соргетэмез пель дорын МТЗ тракторлэн ужамез кадь. Олёш выдытозь, умме ке ӧд усьы, ӵукнаозь уд изьы. Кызьы со ас соргетэмезлэсь уг сайка?

Маин эшшо асьмеос висъяськиськом? Учке ай, кыӵе соос висемзылэсь, вӧсь луэмзылэсь кышкало! Алигес картэ черлаз. Кык нунал температураез вал, куинь нунал кызӥз. Всё, солэн султэмез уг луы ни, чайзэ но валесэ нуоно, миндэрзэ но тупатоно. Ма, секыт кожаса ик, «скороез» ӧти. Температуразэ уськытон понна врач укол пукто шуиз. Олёше шприцез адӟиз но йырсазьзэ ыштӥз. Эмъясь, картэ асэныз дан поттэ кожаса, штань пыр ик уколзэ сализ но всё. Нош ӵуказеяз кузпалы эшшо ӟукыртӥсь луиз: укол бервылыз но солэн висе, йырыз но берга, кускыз но ӵогъя, сиён но уг мыны. Вить нунал куспын валай: висись воргорон пичи пиналлэсь но керӟег луэ. Соос висьыкузы сыӵе лябесь, ненегесь, шоразы золгес шокчид ке, погралозы. Инмар тодыса, дыр, нылпи ваёно карем асьмеды, нылкышноосты. Пиосмурт пияно луысал ке, асьмеос кемалась пал кыльысалмы.

Кинлэн кызьы, вылды, нош мынам картэ валантэм югдуре шеде ке, алекме. Соку ик тодам лыктэ нырысетӥ нылпи ваеме. Шугектэмме шӧдыса, картэлы шуисько: Олёш, мон ӝоген пияло, али ик «скороез» ӧть. Кузпалы нырысь вить минут шорам долкаса сылӥз. Собере ымнырыз кӧсэктӥз, пумен гордэктӥз, бӧрысь лызалэс луиз.

Телефон кутэм интые, Олёше нырысь йырсизэ сыназ, собере шифоньерын бугыръяськиз но галстуксэ поттыса чыртыяз думиз. Мон долкай. Со сюанамы но галстук ӧз керттылы. Шуисько: мусое, тон эмъясьёс понна кильтыръяськиськод-а, мар-а, сотэк но валалозы, тон вуоно атай шуыса.

Монэ паймытэ пиосмуртъёслэн но нылкышноослэн пӧртэм сямен кышкамзы. Тани мон курдасько пеймытлэсь. Уйин монэ ураме уд потты ни. Картэ сыӵе ӧвӧл, со уйшоре огназ тодмотэм интые мыныны уз кӧбера. Нош телевизор учкыкумы, киноын кышкыт интыосыз луо ке, синзэ кыне. Огполаз «Фантомас» фильмез учкыны шедьтӥм. Кузпалы валтӥсь героез адӟиз но корка трос «анай» шуыса кеськиз. Мон пумитаз шуисько: тодмо адямидэ адӟид-а, мар-а, зэмзэ но тусыз мумидлы кельше ведь.

Коньдон кутон ласянь но асьмеос пӧртэмесь. Тани картэ монэ пыкылэ, уксёез шыръяны, пе, уд валаськы. Быдьто ке со — визьмо экономист. Чурыт куртчем, вот кин со. Шуисько: Олёш, тыбыры-кускы кынме, шуба кулэ, таиз пальтое тэй ку кадь векчи кылиз ини. Остэ, тодэ вал кыӵе со шорам учкиз, туссэ адӟыса, сюлмы ик шымырскиз. Жалезлы уд чида. Мон мар куремме ик вунэтӥ. Ӝогак буйгатӥ: ярам, пӧй, 8 ар пальтоме нуллӥ, эшшо одӥг толзэ пырпото на. Со монэ весь шыръяны косэ: помада, пе, эн басья, ымдурдэ ӟазег вӧйын зыра. Химия но ӧвӧл, ымдурыд но уз тӧла. Йыры курен шуисько, тон соку, сьӧросэ потыкуд, сьӧрад люгы куар кут, мар-о кагазлы уксё быдтонэз? Воргоронъёс сыӵеесь: кытын кулэ — уз шыръялэ, нош ас палазы капыртозы. Алигес Олёш визнан басьтэм. Вералэ мыным, малы кулэ со арбери? Чорыганы картэ араз кык пол-куинь пол сяна уг ветлы, нош визнанэз 5 сюрс манет сылэ.

Трос луоз вераны воргоронъёс пумысен. Но тани али Олёшике сярысь мадисько но валасько: мон солэсь бадӟым пельёссэ но, уйин соргетэмзэ но яратӥсько. Ӵок, со мыным арлы кык пол гинэ сяська кузьма ке: вордӥськем нуналам но 8-тӥ мартэ. Одно ик куинь льӧль роза, мукет сяськаосты но мукет буёлъёсты со уг тодма. Ӵок, чебер кылъёс трос уг вера ке, ато, пе, сьӧраз ортчод. Озьы ке но нылкышноослы воргоронъёстэк туж мӧзмыт луысал та дуннеын. Соос вӧзамы ке, асьмелэн чебергес, небытгес, мусогес луэммы потэ. Соин ик котькуддылэн вӧзады мед луоз лапег, кӧй, кожой ке но — воргоронды. Ӟечкылалэ соосты вуись праздникен. Мон но лавкае мыно ай, вить кило кампет басьто, Олёше ческытэз туж яратэ.

Валентина Кузьмина

Удмурт Дунне
By Удмурт Дунне 22 февраля, 2013 13:25