Улонын дубль уд лэсьты

Удмурт Дунне
By Удмурт Дунне 26 февраля, 2013 11:33

Улонын дубль уд лэсьты

knyazevТунсыко, вераськись, котькытчы вуттӥськись, чебер, визьмо, капчи мылкыдо. Тодматске — ӝужась кизили Максим Князев.

Пияш тодмо луиз удмурт-поляк «Узы-боры» киноын Алмазэз шудэмез бере. Максимлэн верамезъя, со ноку ӧз малпалля актёрлэн ужез сярысь.

— Туж троссэ та ласянь Балезино ёросысь Исак школаысьтым дышетӥсьёсы лэсьтӥзы: мынам сценкаосын шудыны мылкыды воксё ӧй вал, но шудӥсько ке, литературая, удмурт кылъя «витьёс» пуктылӥзы. Озьы пыриськи одӥгаз концертэ, мукетаз. Нош собере… культурая колледже пыри.

Татын дышетскемез Максимлы зол юрттӥз: усьтӥськиз, дӥсьтӥсьгес луиз. Колледжез йылпумъян араз Щепкин нимо вылӥ театральной училищее пырон сярысь конкурс ялӥзы. Коть кыклы люкиськы: колледжын кун экзаменъёс но сётоно, конкурслы но дасяськоно. Максимлэн ваньмыз пӧрмиз.

Москвае дышетскыны пыремез понна пияш бадӟым тау каре Г. Корепановлы: школаын дыръяз ай «Ӟечбур!» газетлэн юбилеяз Максим огаз номерын шудӥз, ӵапак соку сое элькунысьтымы тодмо артист синйылтэм. Нош Щепкин нимо училищее конкурс ялэм бере Геннадий Семёнович шуэм:

— Алнаш палъёсысь трос артистъёс, асьме палась но луыны кулэ. Ӧд ке пыры — мон азе эн но возьматскы.
Максим умой валаз, та кылъёссэ ӟеч малпанъёсын вераз шуыса, но, зэмзэ ке, пырымтэезлэсь кышказ.
— «Щепкае» вуэме бере ни огез туж паймытӥз: вань дышетӥсьёсынымы удалтӥз, — шуэ Максим. — Котькуд нунал худрукмы жингыртэ, мар кариськомы яке кытчы ветлыны малпаськомы шуыса юаське, визь но ӵем гинэ тыре, но ми солы котьку шумпотӥськом (86 аресъем адями улонэз милесьтым трос поллы умойгес тодэ, юнме уг ӟабыльты). Уг быгатӥськы Глафира Николаевна Никольская тодосчи сярысь вератэк кельтыны. Со милемлы татын анай кадь: чакла, яратэ, кулэ ке — юрттэ. Гуртын сямен соин удмурт кылын гинэ вераськиськом.
«Узы-борыысь» пӧяськись Алмазэз шудэмез бере анаез сое мырдэм «Пузкар» фильмын ассэ утчаны лэзиз.

— «Бен малы, пие, тон урод адямиез шудӥд? Али но сыӵе ик ролез быдэстод-а?» — шуиз анае. Ма, кино ук со, шуи но таяз радэ Гаян нимо пияшлэсь рользэ шудыны мынӥ. Али пукисько но малпасько: тазэ но, кыкетӥзэ но мукет сямен лэсьтысал. Дыр ортчыса, валаны кутскисько, мае ке ас вакытаз шонертэм кари шуыса, — малпанзэ шарая вуоно актёр.

Но ӵапак кино бордын ужаса, Максим рос-прос валаз: туж потӥз ке но, зэмос улонын дубль уд лэсьты, лэсьтэмзэ воштыны уд быгаты.

Шуг-секытъёс пыр потэмезлы, улонлы шумпотэмезлы, азьланезлы ужпумъёс пуктыны но адямиосыз бордаз кыскыны быгатэмезлы (группаяз Максим староста луэ) синмаськемысь уд дугды. Алмазэз шудэмез но алама палысен сое уг возьматы: со понна ик со актёр — аслыд тупась адямиосыз гинэ ӧвӧл, пумит луисьёссэ но возьматыны кулэ.

Табере, Максимен тодматскыку, тросэз, пе, юало, со бигер ӧвӧл-а шуыса. Ӧвӧл, удмурт со. Но выляз «Пузкар» киноын мукет палысен усьтӥськоз. Тодады вайытом, премьеразэ тулыс возьмаськом.

Малпасько, матысь дыре асьмелы валтӥсь каналъёсыз но сакгес учкыны кулэ луоз ни: оло, отысь но эшмес адӟом? Шонерзэ ке верано, толшоре кылӥ, Нырысетӥ каналын мынӥсь «Неравный брак» киноын Максимлы туж кельшись пияш, пе, шудэ. Интернетын бугыръяськи, шедьтӥ ук со сериез. Но мар малпаськоды? Максим со! Учкисьёс понна — ФСБ-ын ужась (кинлы тунсыко, быгатӥськоды учкыны 55-тӥ серилэсь кутсконзэ). Тӥни сыӵе актёръёс ӝоген вуозы Удмурт театре.

Лена Рябина

Удмурт Дунне
By Удмурт Дунне 26 февраля, 2013 11:33