Быжыз кузь, улонэз вакчи

Удмурт Дунне
By Удмурт Дунне 19 февраля, 2013 09:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Быжыз кузь, улонэз вакчи

М. Ившина

М. Ившина

Удмурт литературалэсь историзэ учконо ке, вераны луэ: асьме драматургия, прозаен но поэзиен ӵошатыса, котьку лябгес вал. Но уг луы вераны, таӵе югдур удмурт литератураын гинэ шуыса.

Ӟеч пьесаослы котьку кулэяськизы но кулэясько бускель республикаосын, озьы ик ӟуч литератураын но пьеса гожъясьёс чиньыен лыдъямон. Тросэз азьмынӥсь театръёс но шер куто туала пьесаосты, ӵемгес пукто яке классикаез, яке кунгожсьӧр авторъёслэсь ужъёссэс.

Литератураын лапак мынэ утчаськон. Туала вакытэ нырысетӥ интые пото пичи жанръем произведениос, нош драматургия — со секыт жанр, трос дырез, визез быдтэ, солэн «быжыз» кузь — драматург, режиссёр, актёръёс, суредась, крезьгурчи… Пьесаез ас понназ гинэ зол яке ляб шуыны уггес луы, кыӵе тусын сое вуттод сцена вылэ. ӟеч пьесаез но огшоры вожояськонлы-пӧртмаськонлы пӧрмытыны луэ. Соку солэн сцена вылын улонэз туж вакчи луэ.

Но удмурт драматургилэн но зарни вакытыз вал. Кылем даурысь куатьтонэтӥ-тямыстонэтӥ аръёсы драматургъёслэн — И. Гавриловлэн, В. Садовниковлэн, С. Широбоковлэн — пьесаоссы пыризы удмурт литературае классика луыса.

Удмурт театрлэн берло премьераосыз сярысь ке… Е. Загребинлэн «Мусое мынам, мусое…» пьесаез шоры учконъёс пӧртэмесь. Театр понна но, учкись понна но со — уж бере шутэтскон понна учкымон капчи спектакль. Автор «Насьток но Исьток» пьесазэ азьланьтэ, туала улонэн герӟаса. 1982-тӥ арын пуктэм «Насьтокез но Исьтокез» учкыны быдэс гуртъёсын ветлӥзы — сокем яраз калыклы.

В. Мадзеков но Н. Тур шудо "Мусое, мынам мусое" спектакльын

В. Мадзеков но Н. Тур шудо «Мусое, мынам мусое» спектакльын

Соин ик, дыр, Е. Загребин азьланьтӥз та пьесазэ. Шуг вераны, азьлане яке берлане та вамыш… Кинлы ке туж яра, кинлы ке воксё уг… Дыр возьматоз: кылёз-а удмурт театрлэн репертуараз та спектакль, пыроз-а удмурт литературалэн историяз…

Павел Зоринлэн «Художник и Надежда» пьесаезлэн темаез туннэ нуналлы, оло, уг тупа — 1980-тӥ аръёсысь басьтэмын. Но гуртэз водохранилище улэ кельтон пыр автор возьматыны быгатэм туала обществолэсь висёнъёссэ: чиновникъёслэн, калыкез вунэтыса, асьсэ сярысь гинэ сюлмаськемзы, юон, ужтэк кылён… Но калыклэн югытэзлы осконэз бырымтэ, кызьы шуэ спектакльлэн пумаз баба Дуня: «Мы то люди маленькие, да он (Бог) большой». Малпасько, ӵапак азьлозэ но туалазэ герӟаны быгатэмез бордын Павел Зоринлэн — шуыны луэ ини зэмос драматурглэн — аспӧртэмлыкез.

Павел Зоринлэн аслаз пичи театръёсын вань — Удмурт кун университетысь студентъёс понна но заводъёсын ужасьёс понна. Соин ик со вала сценалэсь законъёссэ. Мыным потэ, театрын пӧзись адями ӟеч пьеса гожтыны пӧрмытэ. Учке ай, И. Гаврилов, В. Садовников, Е. Загребин, А. Григорьев улонзылэсь оглюкетсэ сётӥзы театрлы. Озьы ик шуыны луэ ӟуч драматургъёс А. Арбузов, В. Розов сярысь — соос асьсэос сцена вылын шудӥзы, А. Володин сценарист луыны нимысьтыз дышетскиз.

Милям ке Удмурт театре ӵемгес вутто прозалы укшась пьесаос. Пуко ини собере артистъёс, диалогъёссэ, мизансценаоссэ тупатъяса, шудымон карыны турттыса.

Мария Ившина,
удмурт драматургиез эскерись

Туспуктӥз Ольга Глухова

Удмурт Дунне
By Удмурт Дунне 19 февраля, 2013 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<