Улэп суредъёс

Удмурт Дунне
By Удмурт Дунне 18 февраля, 2013 10:39

Улэп суредъёс

"Тустэмъёс" ("Безликие")

«Тустэмъёс» («Безликие»)

Толэзь ӵоже Кизнерысь лулчеберетъя юртын шаерысьтымы тодмо суредасьлэн Инна Шкрабиклэн адӟытонэз ужаз. Выставказэ усточи нимаз «Зэмлыклэн но осконлэн югытэз».

Инна Шкрабикез шаерамы гинэ ӧвӧл, солэн палэназ но умой тодо. Усточилэн выставкаосыз радяъськылӥзы ини Башкириын, Татарстанын, Пермь но Челябинск улосъёсын. Суредъёсыз Можгаысен Аркаимозь вуылӥзы.

— Мон куд-ог дыръя ачим но уг валаськы, кытысь со суредъёс син азям вуо. Вылӥысь, дыр, Мае адӟисько сое ик калык доры вуттоно кожасько. Котькуд ужам лул-сюлэмлэсь дуннезэ возьматӥсько. Лул дуннеез киын уд кутылы, синмын уд адӟы, сое шӧдо-валало бадӟым, ненег, чылкыт сюлэмо адямиос, ӵем дыръя творчество пӧлы выем муртъёс. Дыр вуэмын ини лулмы сярысь малпаськыны. Ведь со юнме сётэмын ӧвӧл. Асьмеос Кылдытӥсьлэн огпырыез луиськомы, осконмы, тусмы, выжымы, сям-йылолъёсмы шоры учкытэк. Мон сое ик суредъёсам но возьматыны тыршисько. Нырысь учкыса, ужъёсы ог-огзылэсь висъясько кадь, нош соос пазлъёс сямен валче кырмисько но огъя суред кылдыто, — шуэ Инна Шкрабик.

Художник верамъя, куд-огез уг вала, мар вераны турттӥз суредась. Сыӵе дыръя усточи шуэ: адями уг вала ке, озьыен со ӧз буды на отчыозь, сюлмаз номыриз ӧз вырӟы ке, озьы бере солэн лулыз ӧз сайка на.
Суредасьлэн эшез Ольга Баграйчук шуэ:

— Огаз выставкаысь адӟи Инна Шкрабиклэсь суредъёссэ. Сокем соос мыным сюлмылы матын луизы. Озьы ми та усточиен тодматским, солы луыса, мон уно калыкен эшъяськи, тросэз соос удмуртъёс. Удмуртъёсын матысь тодматскемелы но мон тау карисько Инна Шкрабиклы.

Та кибашлы кышномуртлы синмаське Удмуртиысь культура удысысь дано ужась Галина Блинова. Галина Петровна Можгаысь шаертодонъя музеез усьтыкуз ай, сое чеберъяны куриз Уваысь Инна Шкрабикез

— Инна Анатольевнаез мон кемалась тодисько ини, трос ужъёсыз дорам но вань. Та туж кибашлы адями. Со буёлъёсын, куэн но горд сюен но ужа. Выжыкылъёсъя лэсьтэм мунё коллекцизэ со Ижысь суредан искусствоосъя музейлы дунтэк кузьмаз. Солэн ужъёсыз вуэмын ини пӧртэм кунъёсы, Англиысь лордъёслэн семьяоссы но Удмуртиысь усточилэсь суредъёссэ басьяло. Живопись — со улэп гожъяськон. Инна Шкрабиклэн но суредъёсыз улэпесь. Солэсь ужъёссэ адӟиськод ке, мылкыд ӝутиське, сюлэмшугед ортче, ӟечезлы, чылкытэзлы оскон кылдэ, — шуэ Галина Петровна.

Инна Шкрабик верамъя, суредъёсыз адямиослэсь сюлэмзэс вырӟыто ке, озьыен тон юнме уд ужаськы. Нефтекамскын выставкаез возьматыкуз, одӥг кышномурт шуиз:

— Мынам улэме уг пот ни вал, собыдӟа кайгу зӥбиз. Но суредъёстэс учкыса, валай: табыдӟа дуннеын мон туннэ огнам ӧвӧл. Тау тӥледлы со малпанэз мыным усьтэмды понна.

Инна Шкрабик адӟытонъёссэ али бадӟым городъёсын радъяны уг дырты, ёросъёсы потаны тырше. Гуртъёсысь калык но соосын мед тодматскоз.

Гуртоослэн нырысь интыын мар? Уж, пудо вордон, юрт котырын берган. Мынам потэ вылэм соос но огдырлы ке но пудо бордысь мозмытскыса, лулзы сярысь мед малпаськысалзы, дунне шоры паськытгес мед учкысалзы, лул-сюлэмзэс мед кылзысалзы, — шуэ Инна Анатольевна.

Галина Семёнова
Туспуктэмез: edinenieudm.ru

Удмурт Дунне
By Удмурт Дунне 18 февраля, 2013 10:39