Улэм потӥз

Удмурт Дунне
By Удмурт Дунне 22 февраля, 2013 11:18

Улэм потӥз

Г. Храмов пусъемын «За боевые заслуги» но мукет медальёсын

Г. Храмов пусъемын «За боевые заслуги» но мукет медальёсын

Афганистанын ожмаськон 1989-тӥ арын йылпумъяськиз шуиськом ке но, бӧрысь но отын омыр ӟырдыт вал. 1990-тӥ-1991-тӥ аръёсы отчы вуылӥз Дэри ёросысь Пероггуртын вордскем удмурт воргорон, «За боевые заслуги» медален пусъем Геннадий Храмов.

15 ар армиын

— Дэри ёросысь Юбилейной школаын дышетскыкум ик, военной луон сярысь малпаськылӥ, — веранзэ мытӥз Геннадий Храмов. — Туж потэ вал лобаме. Лётчик мынэсьтым ӧз ке но пӧрмы, одӥг пол удалтӥз ик вертолётэз кӧня ке метрлы ӝутканы. 12-13 арес дыръямы, гуртысьтымы ачим кадь эшъёсын люкаськыса, нуналлы быдэ аэродроме ветлӥмы вертолётъёсты учкыны. Лётчикъёс милемыз синйылтӥзы, ваньмес нимын-тулын вераны тодӥзы. Кельшиськем, лэся, киынызы мон шоры возьматӥзы но доразы ӧтьыса, штурвал сьӧры пуктӥзы. Со нуналэ мылкыды дурыныз пӧзиз, дорам бызьыса бертӥ но вертолётэн лобаме сярысь вань эшъёсылы, тодмоосылы ушъяськи.

Школаез йылпумъяме бере кытчы ке пырон сярысь ӧй малпаськы, армилы дасяськи. Забайкальеысь пограничной войскоосы шеди. Отысен военной училищее пырыны малпай, ӧз пӧрмы, выльысь частям бертон азям прапорщике дышетскыны дэмлазы. Ӧй пумитъяськы. Кӧня ке толэзьзэ пограничникъёслэн Приаргунской отрядазы ортчытӥ, собере Читаысь поваръёсты дышетонъя окружной школаын тодон-валанме будэтӥ, взводлэн командирез-преподавателез луыса ужай.

Армие 2 арлы мынӥ вал, служить кари 15 ар. Службазы бере эшъёсы доразы бертӥзы, мон армие кыли. Дор палъёсам пыдъёсы сокем ӧз кыске, уката ик школаез йылпумъян аре анае улонысь кошкиз вал. Кирза сапег 15 ар нуллытозям, кышнояськыса но вуттӥ, пӧсь улонэз но адӟыны кылдӥз. Армие мынэме бере ик Афганистанэ куриськылӥ. Солдат-срочник но прапорщик дыръям монэ отчы ӧз кутэ. Нырысь ик басьтылӥзы БТР яке БМП машинаен ворттылӥсьёсты, снайперъёсты, ДОСААФ пыр дышетскемъёсты. Монэ буйгатӥзы: дырыд, пе, вуоз.

Ыстонзэс витёнъям тодон-валанме будэтӥ, кунгожсьӧр кылъёсты дышетӥ. Нош отпуске дыръя Удмуртие бертылӥ, со вакытэ ик кузпалъяськи. «Пӧсь» интыосы мынон сярысь малпанъёсы йырысьтым чылкак тӧлӟизы ни вал. Вазьгес буйгатскиськем — Афганистанэ келязы. Озьы мон пиелэсь вордскемзэ адӟыса ӧй вутты. Монэ 9 толэзьлы шуыса келязы ке, Афганистанын 15 толэзь ортчытӥ. Бертыкум пие бызьылэ ни вал. Шумпотӥсько, мон сямен ик военнойлэсь сюрессэ бырйиз, та вакытэ службазэ ортчытэ Оренбург улосысь пограничникъёслэн заставаязы.

Шыпыт уйёс — умойтэмлы

Афганистанысь асьме войскоосты 1989-тӥ арын февраль толэзе поттӥзы. Озьы ке но 1990-тӥ арын февраль толэзе но отысь огъя югдур эли-кеби вал на. Дас мурт, соос пӧлын мон но, службамес ортчытӥмы Кунгожсьӧр ужъёсъя министерстволэн генеральной консульствояз. Отчы келямзылэсь азьло ӝыны ар визьнодазы, вакчи дыр куспын француз кылэз дышетӥ. Африка палъёсы келялозы кожасько вал, нош монэ Афганистанэ ыстӥзы. Ожмаськон быремын ке но, нуналлы быдэ ыбылӥсько. Уй шыпыт ке, тод ни: ӵуказеяз одно ик маке умойтэмез луоз.

Афганистанысь сӧсырмемъёсты Совето Союзысь госпитальёсы келяны юрттӥмы. Со вакытэ 200-лэсь трос асьме адямиос ивортэк ышемен лыдъяськизы, даслэсь тросэз плене шедемъёс пӧлын вал. Милемлы удалтӥз одӥг муртэ пытсэт сьӧрысь мозмытыны, коньдон сётыса (кӧня тыреммес уг тодӥськы ни), нош мукетсэ мозмытыны дасяськимы ни вал, одӥг нунал витьыны чидамтэ: УАЗ машина таласа, ас кужыменыз пегӟыны быгатӥз.

Афганистанын улыкумы, пал кыл но поттылыны ӧз лэзьылэ Россиысь военнойёс сярысь, документъёсмыя ми сад-бакчаын, фермаын ужасьёс я сантехникъёс вал. Туж кылзӥськись вылӥськем, лэся, Афганистанысь патретэ одӥг но ӧвӧл.

Со вакытэ Афганистатын калык бугыръяськиз, армизы кыклы люкиськиз. Но милемлы весяк удалтылӥз кулонлэсь пегӟыны. Ӵуказеяз тодылӥмы, мар милемын луыны быгатысал ортчем уе. Огполаз веразы, милемды, пе, самолётъёсын пуштытыны дасяськиллям вылэм.

Ми улӥмы аспӧртэмлыко треугольник пушкын: огпалаз Эшъяськон выж, мукет палъёсаз боеприпасъёсын склад но эстӥськон материал. пичи гинэ тылгизьы шедьысал ке, соку ик инме лобысалмы. Одӥгаз шутэтскон нуналэ, мон дежурить карон дыръя, генеральной консульствое ӧтьымтэ куноос вуизы. Кенермы доры бронетранспортёр дугдӥз но, отысь 8 десантникъёс потӥзы. Кенер кузя выдӥзы, автоматъёссэс ыбылыны дасязы. Соослы куроке зӥбонэз гинэ кылиз, со куспын кыкетӥ машинаысь Афганистанлэн генерал-лейтенантэз потӥз но ми пала йӧн-йӧн вамышъяны кутскиз.

Кызьы косэмын инструкциен нырысь ик шифровальщиклы жингыртӥ, командирлы ивортӥ. Таӵе учыръёс дыръя, номыр шоры учкытэк, со генералэз мыным ыбыны кулэ вал. Зэмзэ верано ке, мынам улэме потӥз. Тодмо адями шуыса, генералэн вераськон мытӥ. Командиреныд, пе, кенешоно вал. Озьы пумиськон ыбылӥськонтэк ортчиз.

Ваньмыз радъяськем бере шифровальщикелы нош ик жингыртӥ, буйгатӥ. Ярано коть, документъёсты сутыса вуттымтэ. Нимаз комнатаын 1-тӥ, 2-тӥ но 3-тӥ черодъем документъёс утиськизы. Малпамтэ шорысь тушмонъёс омырскыку, со кагазъёсты радызъя сутоно вал. Со комнатаын котьку сылӥзы сӥль коран выллем машина, ванна, со пушкын канистраен бензин, нош сейфын — взрывчатка. Дӥсьтӥсь луэме понна, монэ орденлы гожтӥзы вал, со сярысь ивор чиптэм-чаптэм ышиз.

Афганистан бере выльысь Читае берытски, нош отысен монэ ыстылӥзы на Таджикистанэ. Солдатъёсты келяса гинэ мынэм муртэ куинь арнялы ӝегатӥзы.

Служить карон аръёсы ӝог ортчизы. Та вакытэ Удмуртиысь «Граница» огазеяськонлэн ужаз пыриськисько, нылпиосын пумиськылӥсько. Атыкай музъеммес яратон мылкыд пыӵатӥсько.

Валентина Емельянова
Туспуктӥз Владимир Беломорских

Удмурт Дунне
By Удмурт Дунне 22 февраля, 2013 11:18