Егитъёс удмуртлыклы бырыны уз сётэ!

Удмурт Дунне
By Удмурт Дунне Февраль 12, 2013 09:57
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Егитъёс удмуртлыклы бырыны уз сётэ!

В. Никифорова

О. Никифорова

Вазь ӵукнаысен бер ӝытозь со уж дурын. Удмурт кылэз дышетонлы сӥзем куинь пособиослэн но куамынлэсь ятыр публикациослэн авторзы Ольга Никифорова кивалтэ Глазов пединститутысь удмурт кылъя но литературая кафедраен, трос кужымзэ, быгатонлыкъёссэ сётэ анай кылмес уйпалан возёнлы.

— Ольга Петровна, удмуртъёслэн берло ӧтчамазы тӥ шуиды: пединститутысь удмурт кылъя кафедраез пытсаны быгатозы…

— Зэмзэ но, вань сыӵе кышкан. Малы ке шуоно школаез йылпумъясь егитъёслэн лыдзы кулэсмемын, соин ик студентъёс но ӧжытгес. Нош кылэз но литератураез дышетыны мылкыд карисьёс дорамы мылкыдтэк лыкто, тросэз быръё УдГУ-эз. Мон малпасько, шонер лэсьто. Угось отын золгес тодон-валан сёто, талы луонлыкъёссы бадӟымесьгес. Озьы милям удмурт филологъёсмы 5-тӥ курсын гинэ вань на.

Но туэ педфакысь 1-тӥ курсын 10 студент удмурт кылэз дышетэ. Кыӵе но сыӵе конкурс но вал! 10 интые 11 куриськись люкаськиз. Бен, егитъёслэсь дорамы лыктон мылкыдзэс ӝуткаса, школаосы пумиськонъёсын но поталлям. Но, малпасько, та бордын азьланяз но ужано луом. Шуиськом: республикаямы уг тырмо удмурт воспитательёс, покчи классъёсын удмурт дышетӥсьёс. Малы соосты пединститутлы дасянтэмез? Соин ик удмурт кафедраез огазеясалзы ке покчи классъёслы педагогикая но методикая кафедраен — сокем урод ӧй луысал. Али удмурт кафедраямы ми ньыль кузя кылемын на, часъёсмы уг тырмо.

— Ижлэсь палэнын луэмды но уг шӧдӥськы меда улэм-вылэмды вылын?

— Мынам ноку сыӵе малпанэ ӧй вал. Адямилэн потӥз ке анай кылзэ тодэмез, котькытын мед улоз, дышетоз. Глазове лыктӥ 1990-тӥ арын. Отчыозь одӥг-кык пол сяна вуылэме но ӧй вал. Кыӵе вал Глазовын югдур ог кызё ар талэсь азьло но кыӵе али — ӵошатонтэм. Азинскон бадӟым. Удмурт кафедраен кивалтэм сяна, историко-лингвистической факультетлэн деканэзлэн вош-тӥсез луисько на. Озьы удмурт студентъёс пӧлын гинэ уг бергаськы, институтысь югдурез ӟеч адӟисько. Вазен коридоръёсысь удмурт вераськись студентъёсты уд адӟылы вал, али нокин уг кепыра анай кылызлэсь. Удмурт кылэз тодӥсь студентъёс шорам анай кылынымы вазисько — мон талы туж шумпотӥсько.

Со сяна, ректормы Алексей Анатольевич Мирошниченко вань мылкыд карись студентъёслы удмурт кылэз дышетыны луонлык сётӥз! Нимысьтыз группаос усьтӥмы. Филология наукаосъя кандидатлэн Борис Каракуловлэн кык группаез, 20-лэсь ятыр нылъёс-пиос дораз ветло. Мынам группае 13 муртлэсь люкаськиз, пӧлысьтыз тросэз — школалэсь азьло визьноданъя факультетын дышетскисьёс. Кыкез соос пӧлысь удмурт кылын умой верасько, но тодон-валанъёссэс уката муромытэмзы потэ. Одӥгез Сарапулысь, кылэз воксё но уг вала, шуыны луоз. Кылемъёсызлэн песянай-песятайёссы удмуртэсь, нош анай-атайёссы ӟучомыны кутскылэмын ни. Соин ик ужме котькудӥныз нимаз-нимаз радъяно луэ.

— Тодӥсько, тӥ арнялы быдэ потаськоды Яре но.

— Отысь администрациын ужасьёс удмурт кылэз дышетыны мылкыдзэс веразы! Туж шумпотӥсько соос понна — 16 муртлэсь группа кылдӥз.

Мӧйыослэсь кык группае вань на мынам Глазовын но. Курсъёсы тросэз лыктӥзы, ялонэз адӟыса. Пӧлазы озьы ик котькыӵеосыз вань. Тужгес егитэзлы 30 арес. Тужгес арлыдоез 62 аресъем нылкышно шуэ: пенсие потӥ но, дыры кылдӥз. Ачиз ӟуч, быземын удмурт воргоронлы. Кузпалызлэсь ялан кури, пе, удмуртлы мед дышетоз шуыса, озьы ик ӧз басьтӥськы. Курсъёсы ветлӥсьёслэсь дышетскемзэс учконо ке, ваньзыгес ик вылӥ образованиен. Вань пединститутысь ик преподавательёс, школаысь дышетӥсьёс.

Вань на удмуртэз дышетӥсь 9 библиотекарьёсы но! Таосызлы ачим ӵектӥ вал курсъёсы ветлыны. Соглаш кариськизы, но куризы: доразы аслым вуылоно. Малы уд ветлы — мед гинэ дышетозы! Таос понна но туж шумпотӥсько, мыло-кыдо тыршо. Ветлӥллям ни удмурт концертэ. Одӥгез шуэ: Ольга Петровна, мон удмурт кылэз тодӥсько ни вылэм ук, мар сярысь кырӟазы, туж умой валай! Та нуналъёсы гинэ нош ик юалляськизы: «Вавилон» кафе-ресторанын удмурт ӝытъёс ортчыло, пе, отчы кызьы меда сюроно? Таӵе дыръя мылкыды ик лопыръяське! Ӟучъёс но тау каро ке удмурт культураез ӝутӥськом шуыса, шумпотэмен синкылиос ик быгыльско.

— Ужедлэсь емышсэ ад-ӟиськод ке, ужаны уката тунсыко луэ, вылды?

— Туж тунсыко! 2011-тӥ арын удмурт вераськон кыллы сӥзем дышетскон пособие поттӥ. Сое ужам кутӥсько, но выльёссэ но амалъёсты утчатэк уг луы. Мӧйыосын ӵемгес ӟучысь удмуртэ берыкъяськом ке — асьсэос куро, егитъёслэн ваньзэ соку ик, ӝогак тодэмзы потэ. Но соосыз но, таосыз но туж ярато шудыны. Кылсярысь, одӥг мурт ӧс сьӧры потэ, кабинетэ кылемъёс мае ке вато. Собере сое утчаськом: мар ышиз? Ручка. Кытын со? Укно азьын. Ӧвӧл… Вераськонамы одӥг ӟуч кыл но ум пыртӥське.

— Ольга Петровна, кызьы малпаськоды, кыӵе луыны кулэ удмурт кылъя дышетӥсь, дораз тодон-валан люканы ветлэм мед потоз шуыса?

— Нырысь ик со лулыныз-сюлмыныз бурмемын мед луоз анай кыл борды. Но гажаны кулэ мукет кылын вераськисьёсты но. Эшшо яратыны кулэ дораз дышетскисьёссэ. Нунал ортчиз, ярам — тазьы улӥд ке, нокыӵе пайда сётыны тон уд быгаты.

— Тӥ малы удмуртлыкез, удмурт кылэз бырйиды?

— Зэмзэ вераса, егит дыръям ноку ӧй малпаськылы, улонме одно удмурт кылэн герӟало шуыса. Ачим мон Эгра ёросысь Мазьги гуртысь луисько. Школаямы дышетӥсьёсмы туж золэсь вал. Удмуртэз нуиз Лия Игнатьевна Емельянова, туж яратӥськом вал сое. Ӟуч кылъя но литературая визьнодаз Нина Васильевна Корепанова — ноку ӧз кесяськылы, нокин ӧз шуметылы. Одӥг гинэ предложение вера — быдэс тема валамон ни. Таӵе дышетӥсьёс шоры учкыса ик, малпасько, выпускысьтымы 4 мурт вамыштӥз Дэбесысь педучищее, пӧлазы мон но.

Педучилищеын но туж визьмоесь дышетӥсьёс вал. Но соку но кылъя, литературая дышетӥсь луо шуыса ӧй малпалля. Яраськылӥзы мыным покчи классын дышетскисьёс. Озьы педучилище бере распределениея ыстӥзы Дэри ёросысь Якшур гуртэ. Но соку отын школа ӧй вал — усьтоно, пе. Мыным 19 арес, гурезьёсты берыктыны вормо! 15 нунал куспын Якшур-Бӧдьялась вайим партаос, доскаос… Горд лентаез вандӥм! Трудовой книжкаям но нырысетӥ гожтэмез туж йӧно ай: школалэн директорез. Нош школаын дышетскисез 23 гинэ. Мон сяна, эшшо одӥг дышетӥсь но одӥг выж миськись.

Бен, туж тунсыко вал: физкультура ке, спорт дӥсь дӥсяськод, крезьгуръя уроке баян кутӥськод. Вал сыӵе учыр но. Матэктэ Выль ар, одӥгезлэн дышетскиселэн агаез Тол бабай пӧрмыны соглаш кариськиз, репетициосы но ветлӥз. Но тани пиналъёс люкаськемын ни. Тол бабае возьдаськисько шуиз но берытскыса кошкиз, пиналъёс азе ӧз поты. Номыр вераса ӧй вутты. Мар кароно? Ачим пӧрмытски. Нош нылпиос кесясько: Тол Бабай ӧвӧл со, Ольга Петровна!

Кин тодэ, оло, озьы ик покчи классъёсты дышетӥсе кыльысал. Но туж потӥз тодон-валанме будэтэме. Апае ӵектӥз УдГУ-ысь филфакез. Ачиз но со Дэри ёросысь одӥгаз школаын англи кылъя дышетэ. Нырысь заочно амалэн тодон-валан люкало кожай вал. Одӥг ар дышетскеме бере малпай: арлы кык пол гинэ сессиосы ветлыса, трос меда тодод? Куриськи очно амалэн дышетскыны. 5-тӥ курсэ вуэме бере ни нимаз графике поттӥзы, Якшур-Бӧдья ёросысь Тыло школаын ӟуч кылъя но литературая урокъёсты нуи, собере ог 5 толэзь пала — Кияса ёросысь Лутоха школаын удмурт кылъя но литературая урокъёсты.

Глазовысь пединститутэ келязы направлениея. Озьы татын 23-тӥ арзэ ужасько ни. Малы одно удмурт кыл борды дэмӟи? Мыным туж удалтылӥз дышетӥсьёсын. Школаын, педучилищеын сяна, университетын но. Роза Ивановна Яшина, Иван Васильевич Тараканов, Валентин Кельмакович Кельмаков… Вань, дыр, туала вакытэ отын дышетӥсьёс пӧлын но кужмоосыз, нош мон дышетскон аръёсы соос трос студентъёслы удмурт кылэз, литератураез яратон мылкыд пыӵатӥзы.

Со сяна, али но котьку тодам вайисько Геннадий Афанасьевич Ушаковез. Со кивалтэм улсын диссертация но гожъяй. Методикаез туж зол сётэ вал. Кӧня сётылӥз, сомында ик курылӥз. Озьы пӧрмиз, мон но табере методикалы дышетӥсько, луи педагогика наукаосъя кандидат. Геннадий Афанасьевичлэсь троссэ ужан амалъёссэ кутыны турттӥсько.

Туала студентъёс туж визьмоесь, котьмар борды ӝабыр-ӝабыр басьтӥсько. Ос-кисько, удмурт кылмылы но соос бырыны уз сётэ. Мед гинэ шӧдозы солэсь кулэлыксэ. Тазэ соослы пыӵатыны кулэ ни анай-атайёс, дышетӥсьёс, бускельёс…

Элина Кумачёва
Туспуктӥз Владимир Беломорских

Удмурт Дунне
By Удмурт Дунне Февраль 12, 2013 09:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<