Ижкартӥ удмурт трамвай ортчиз

Удмурт Дунне
By Удмурт Дунне 21 февраля, 2013 17:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижкартӥ удмурт трамвай ортчиз

1

Баграш-Бигралась усточиос Зайцева Яна Леонидовна, Никифорова Ольга Григорьевна, Москвина Зинаида Фадеевна, Сагитова Галина Степановна, Топорова Маргарита Николаевна

21-тӥ феврале, Анай кыллэн нуналаз, «Шунды» огазеяськон «Удмурт трамвай» акция ортчытӥз.
Ижкарын трамвайлэн 2-тӥ маршрутаз мыныку, вань дугдылонниосты удмурт но ӟуч кылын ялӥзы, удмурт кырӟанъёс чузъяськизы. Ужрад кутскиз лымшор бере.

Нош солэсь азьло Ижкарысь «Центр» остановкаысен Промышленной ураме мынӥсь трамвае, удмурт кылын шалтыр вераськыса, кенакъёс пыризы. Витьназы ик удмурт дэремъёсын, йыркерттэтъёсын но чебересь яркыт кышетъёсын. Соослы вазиськытэк ӧй чида:

— Ӟечбуресь! Кенакъёс, тӥледыз «Удмурт трамвай» акцие пыриськыны ӧтизы-а? Ижысь кыӵе ке ансамбльысь луиськоды, вылды…

— Ӟечбуресь! Ми Ижысь ӧвӧл, Пичи Пурга ёросысь Баграш-Бигра гуртысь. Толон радиоысь кылыса, шуак-дуак Ижкаре ветлыны кариським. Ма, ми пенсионеръёс ук — вераським но лыктӥм. Ай ми ӧжыт туннэ. «Ӝыт тылъёс» ансамбльын ми трос кузя.

Озьы, шӧдтэк шорысь пумиськыса, ӵошен ми вуимы трамвайлэн берпуметӥ остановкаяз. Кенакъёс остановкае васькизы но скамья вылэ газет вӧлдыса, куртчонзэс поттӥзы: шаньга, колбаса. Термосэн ваем чайзы но кезьыт луыса вуымтэ.

Удмурт трамвай кошкытозь, ог ӝыны час кылиз на. Шунды пиштэ ке но, кенакъёс ульчаын кынмозы шуыса, депоысь ужасьёслы вазиськи, подсобкае пыртыны курыса.

Нырысь уг лэзё вал, ремонт, пе, мынэ. Собере асьсэос ик воргоронъёс лыктыса кенакъёсты депо юртэ пыртӥзы. Кышноос шумпотӥзы но. Депоын шуныт, диспетчерез но юромо кадь удмурт вылэм, удмурт кылын вераське. Татын ик маршрутэ потонзэс витё вылэм удмурт водитель но удмурт кондуктор.

«Шундыысь» пияшез Ренат Гафуровез адӟыса, Баграш-Биграос воксё шумпотӥзы. — Ма та Ренат Гафуров ук! Анаез удмурт, атаез бигер, 9-тӥ классозь удмурт кылэз воксё уг тоды вылэм, Кузебай Герд гимназие пырыса, кылэз дышетэм, — валэктэ песянайёслы Яна Леонидовна Зайцева, «Ӝыт тылъёс» ансамбльлэн кивалтӥсез.

Ренат акциез радъямзы сярысь вераз. Таӵе ужрадэз кемалась ортчытэмзы потэ ини вылэм. «Шундыос» гожтэтъёс ыстӥллям ваньмаз городысь транспортъя предприятиослы. ИПОПАТ пумит луэм, тупась условиоссы ӧвӧл шуыса. Нош «ИжГорЭлектроТранс» предприятиен кивалтӥсьёс соглаш кариськизы. Ужрадлы удмурт кылын вераськись кондукторез но водителез шедьтӥзы.

4Озьы вераськыса, рейсэ потон дыр но вуиз. Трамвай вырӟиз, Ренат Гафуров ӟучен но удмуртэн ялӥз акция но маршрут сярысь.

«Шунды» огазеяськонысь нылъёс трамвайысь пассажиръёсты юаса ортчизы, кыӵе вордскем кылзы. Ог куамын мурт пӧлысь витез удмурт кылэз анай кылэн лыдъяло, куинезлэн анай кылзы — бигер. Одӥг адямилэн юалляськонэ пыриськемез ӧз поты. Тросэз мылкыдзэс веразы: удмурт элькунын улӥськом бере, остановкаослэсь нимъёссэс транспортын кык кылын верано.

2Трамвай мынонъя Баграш-Бигра кенакъёс кырӟазы. Яна Леонидовна ас мылкыд каремезъя пассажиръёслы «Ӟечбур!» газетэз сётъяз, Анай кыллэн нуналэныз ӟечкылаз, калыкез ас бордаз шуныт луэменыз кыскиз. Пичиос но бадӟымъёс но газетсэ мыло-кыдо басьтылӥзы.

7Акция йылпумъяськыку, Яна Леонидовна мылкыдзэ шараяз: та ужрадэз эшшо на паськытгес ортчытоно, вань удмурт огазеяськонъёс одно ик мед пыриськысалзы, та ужрад сярысь мед тодысалзы.

Лариса Дмитриева
Туспуктӥз Владимир Беломорских

Удмурт Дунне
By Удмурт Дунне 21 февраля, 2013 17:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<