Удмурт пилем но пагӟа

Удмурт Дунне
By Удмурт Дунне 28 февраля, 2013 10:40
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмурт пилем но пагӟа

perepechkin

Выльдэм удмурт кафе

Кык арня ӵоже Ижкарысь «Перепечкин» кафеын ремонт мынӥз. Толон со куноосызлы ӧсъёссэ усьтӥз. Йырпорымон! Юртъер, суредын кадь ик, туж йӧн-йӧн но… ческыт адске.

Пырем бере ик шумпоттэ удмурт буёло луэмез: горд борддоръёс, тӧдьы «гур», чибориё выжлёгетъёс, курень пу. Югыт жӧкъёс но пуконъёс, яркыт тыл мылкыдэз ӝуто. Шаплы официанткаослэсь бызьылэмзэс синйылтыса, огез жӧк сьӧрысь ассэ «перепечкинэз» Роман Дементьевез пумитай. Кузё кадь пуке. Эсьмаса, дэремез но выжлёгет пужылы укша.

— Жади…- лулӟе Рома. — Сыӵе сюлмаськыса улӥ, уйёсме ӧй изьы, табере тани шутэтскисько но, синвуосы ик пото… Котьма шуэ но, мае рос-прос лэсьтэмед потэ, сое ачид лэсьты. Ӵош ужасьёсыд коть кӧня коньдонэн мед юрттозы. Ӵукнаысен ӝытозь котькуд нунал тыршоно луиз.

— Ужамед юнме ӧз луы! Кин нош воштӥськонъёс пыртыны юрттӥз?

— Малпанэз Анатолий Галихановлэн, со «революцилэн» атаез луэ. Улонэ пыӵатӥз интерьеръёсъя усточи Мария Овчинникова. Толя но Маша ӵош ужазы, ваньзэ ӝог лэсьтӥм. Пырон вадьсын ик удмурт кылъёслэсь «пилем» пуксиз — Толялэн усьтонэз та. Машалэн сое, укыр валантэм адскоз шуыса, лэсьтэмез ӧз поты, адями ӝужда удмурт кышноосты лякыны дэмлаз. Толя пумит луиз. Мон ачим но туала макеосты яратӥсько. Соин ик кафеямы… шер чузъяськоз удмурт крезьгур: туала хитъёс ӧжыт, нош вашкала калык кырӟанъёсты пуктэме уг поты. Со понна милям удмурт куараоке кылдӥз! Котькуд ӝыт розыгрыш лэсьтылом: удмурт каверъёсты нёръясьёслы кузьым сётъялом. Выльдӥськонъёс трос луозы на. Кылсярысь, удмурт шӧмо тусьты-пуньыос вайимы, IKEA вузъёс пӧлысь бырйимы. Тодьы «гур» борды пу пагӟа итомы, суредъёс ошыломы. Та аспӧртэм галереяе одно ик сюрозы Герд, Оки, Трокай, «Айкай», «Мынам Удмуртие» но «Удмурт дунне» — асьме адямиосмы. Туристъёс, сиськисьёс юаку, вераны мед быгатом, кин ӝутӥз удмуртлыкмес!

Интерьеръёсъя дизайнер М. Овчинникова но Р. Дементьев

Интерьеръёсъя дизайнер М. Овчинникова но Р. Дементьев

— Вылтус сяна, пуштрос выльдӥськонъёс кылдӥзы, озьы-а?

— Озьы. Кызьы верай ни вал, раздачаез уг яратӥськы. Ачим мон раздачаен ужась интыын ӝытсэ ноку уг сиськы. Столовой кадь потэ. Кафемы ужаны кутскиз, куинь вакытъёслы люкыса: ӵукна 11 часозь ӝук сиыны луоз, 16 часозь — бизнес-ланч, нуназеян вакыт, нош собере — ӝыт меню. Кылсярысь, пельнянен горшок заказтӥды ке, дунтэк аракыен утялтом. Вань сиёнэз ачим малпасько, шеф-повармы йылаз-пумаз вуттэ. Ужан вакытмы но воштӥськоз, огшоры нуналъёсы 9 часысен уйин 1 часозь, удмуртарняе но шутэтскон нуналъёсы — уйин 4 часозь. Эшшо милям аспӧртэм пужъятэм «Яло-веран книгамы» кылдӥз. Пырады ке, одно ик мылкыддэс гожтыса кельтэ.

— Ярам, одно ик ӵем пыралом!

«Перепечкин» ресторан ӧвӧл ке но, татчы табере туж тузӥ куноосты но вайыны возьыт уз луы. Нош «Удмурт дуннеез» табере котькуд пырась-потась кияз кутыны быгатоз: сэргын удмурт книгаосын ӝажы кылдӥз.

Дарали Лели
Туспуктӥз автор

Удмурт Дунне
By Удмурт Дунне 28 февраля, 2013 10:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<