Удмурт кылэз быдтон — выжыдэ ыштон

Удмурт Дунне
By Удмурт Дунне 13 февраля, 2013 14:03

Удмурт кылэз быдтон — выжыдэ ыштон

Чутыр школаын

Чутыр школаын

12-тӥ тулыспал понна «Удмурт дуннелэсь» «Герд» ватсэтсэ лыдӟи но, кӧты туж шуг луиз. «Пытсан — усьтон ӧвӧл» статья мылкыдме бугыртӥз.

Мон ачим Эгра ёросысь Пазали гуртын вордӥськемын но будэмын.

Мынэсьтым дас ареслы бадӟым сузэрелы туж вожъяськылӥ: Чутыр школаысь вуоз, чебересь книгаоссэ поттоз но лыдӟиськыны кутскоз. Ӟуч кылэз валамтэысьтым, мыным тужгес матын вал удмурт кылъя учебникъёсыз. Быгатӥсько-а, уг-а — сузэре кылбур дышетыны кутске ке, мон но чуръёсты йырам кельтыны вырисько. Маке вунэ ке, аслым ачим йыркуръясько. Сэре муми буйгатӥз: тон но школае мынӥд ке, удмурт кылэз но литератураез дышетод.

Чутыр школае мон лыктӥ 1955-тӥ арын. Сузэрелэн анай кылын дышетӥсез Наталья Вахрушева пенсие потэмен, урокъёссэ азьланьтӥсь шедьымтэ ни. Оло, Константин Кузьмин директормы но сокем ик ӧз сюлмаськы ни та пумысен. Кин тодэ на созэ. Со вакытэ уго Чутыр ӟучомемын вал ни.

Гуртоос куспазы шер вераськылӥзы удмурт кылын. Кинлы ке кыӵе ке потӥз меда, школае удмурт гуртъёсысь пиналъёс визь люканы ветло шуыса. Классамы 19 кузя дышетскимы. Асьмелэн но огпол но йырамы ӧз чилекты, удмурт кылэз дышетоно шуыса. Озьы быдэс поколенимы не ӟуч, не удмурт будӥз. Табере кыӵе культура пӧлы асме пыртоно — паймисько. Ӟуч шуоно ке, ӟуч кылы ӟучъёслэн кадь воксё но вольыт ӧвӧл, физик-математиклы дышетски ке но, ас вакытаз школаын ужай ке но. Удмурт шуоно ке, анай кылыным гожъяськыны уг быгатӥськы. Вераськыны но шугъяськисько — огшоры улонын кутӥськись кылъёс гинэ йырвизьмам пыӵамын. Зэм, лыдӟиськыны дыши ик. Но таиз понна тау шуоно ни «Удмурт дунне» газетлы. Сое но нырысь-валысь туж шуген лыдӟылӥ. Но трос аръёс ӵоже басьтэмысьтым, родной луиз ни. Но мон туж жалясько, школын удмурт кыллы но литературалы ӧз дышетэ, шеко кыли шуыса.

Туала Чутырысь югдур мынэсьтым вӧсьме бугыртӥз. Татчы дышетскыны ветлӥсь удмурт чемошуръёсты, пирнэзьёсты, мазьгиосты, милемыз сямен ик, удмуртлыклэсь люко ук! Кивалтӥсьёс лапак одӥг мажес вылэ лёгисько. Осто, кӧты бӧрдэ ук! Нылпиос, оло, сокем уг валало на та пумысен куректыны. Но дышетӥсьёс валаны кулэ ук: удмурт кылэз быдтон — ас выжыдэ ыштон. Удмурт кылмы кулӥз ке, уз лу ни удмурт калык но.

Таисия Емельянова

Туспуктӥз Владимир Беломорских

Удмурт Дунне
By Удмурт Дунне 13 февраля, 2013 14:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<