Шугадӟон вылын уд узырмы

Удмурт Дунне
By Удмурт Дунне 22 февраля, 2013 09:59

Шугадӟон вылын уд узырмы

1Резиденциын ортчиз лэсьтӥськон удыслы сӥзем котырес ӝӧк. Журналистъёслэн юанъёссылы тупен-тупен валэктонъёс сётӥзы лэсьтӥськонъя, архитектурая но улон инты политикая министрлэн воштӥсез Рустам Хабибуллин но та министерствоысь федерал но улос программаосты быдэстонъя ёзлэн кивалтӥсез Ольга Дубовцева.

Лэсьтӥськон удыслы бадӟым пайда вайиз «Улон инты — егитъёслы» улос программа. Президент Александр Волков лэсьтӥськонъя огазеяськонъёслы вазиськиз улон интылы ёрмись семьяослы юртъёс ӝутон пумысен. Таӵе амалэн лэсьтӥськон удыс утемын вал: экономикаын шуг-секытъёс шоры учкытэк, застройщикъёс басьтӥськизы егитъёслы улон сэрегъёс пуктон борды.

Туннэ нуналлы «Улон инты — егитъёслы» программа улсын егит семьяосын юнматэмын 6 сюрс пала огкылъёс. Ӵапак соос мылкыд каризы капчиятэм амалъя улон инты басьтыны. Со пӧлысь 5 сюрслэсь ятырез улон сэрегъёсазы я потӥзы ни, я тани-тани корка пыронъёссэс шудозы. Та гинэ мар! Лэсьтӥськонъя, архитектурая но улон инты политикая министерство ивортэмъя, 46 семьяос кредитсэс дырызлэсь вазь пытсаны пӧрмытӥзы ни.

Матысь аръёсы шаерамы йылозяз-пумозяз вуттэмын луоз на эшшо 27 юрт. Со пӧлысь 14-ез «кисьмалоз» туэ.
Егит семьяослы капчиятэм кредит висъян борды басьтӥськиз Сбербанк. Со пыр висъяськись ог 15 процентъем ипотекалэсь 5 процентсэ гинэ тыроно луэ егит семьяослы, кылемзэ ас вылаз басьтӥз шаермылэн бюджетэз. Та нуналъёсы Сбербанк борды итӥськоз на мукетыз но огазеяськон — ВТБ 24 банк: та нуналъёсы соин огкыл кутэмын луоз егит семьяослы капчиятэм ипотека висъян ласянь.

Ку йылпумъяськоз «Улон инты — егитъёслы» программа? Та юанлы меӵак валэктон сётыны Рустам Хабибуллин ӧз тоды. Шаермылэн Президентэз Александр Волков сак чакласа возе та программалэсь быдэсъяськемзэ, егит семьяослэсь котькуд куронзэс-ӵектонзэс лыдэ басьтэ. Кылсярысь, квартираослэн ӟечлыксы вылэ ӝожтӥськонъёс вуо ке, Президент ачиз дась сояз я таяз юртэ вуыны. Ма, таӵе вазиськонъёслэн кылдэмзы валамон но: программа угось син куспын быдэсъяське, юртъёс оп! шуытозь ӝутско. Таӵе дыръя пӧсь йӧтэ лэсьтӥськонъя огазеяськонъёслы. Ӝожтӥськон вуэмын ке, соос квартираосысь шекъёсты вакчи дыр ӵоже палэнто. Рустам Хабибуллин пусйиз: учконо ке, квартираослэн ӟечлыксы пумысен вазиськонъёс трос ӧвӧл. Программа быдэсъяськыны кутскем дырысен — 2009-тӥ арысен — таӵе ӝожтӥськонъёс ог 50 пала люкаськизы. Вылаз ик, программая висъяськись сэрегъёслы гарантия дыр сётӥське — со кыстӥське вить ар.

Лэсьтӥськонъя, архитектурая но улон инты политикая министерствоысь федерал но улос программаосты быдэстонъя ёзлэн кивалтӥсезлэсь Ольга Дубовцевалэсь журналистъёс тунсыкъяськизы: «Улон инты — егитъёслы» программая шараямын ӧвӧл-а пӧяськисьёс — бумага вылын гинэ сэреглы ёрмись егитъёс?

— Улон сэреглы ёрмись семьяен лыдъяло, адямилы быдэ 14 квадрат метрлэсь ичи инты усе ке, — пусъе О. Дубовцева. — Вань-а егит семьялэн ваньбурез, пыре-а со ёрмисьёс радэ — та ваньмыз сак эскериське. Луыло сыӵе учыръёс но: егит семья ваньбурзэ вуза (шуом, квартираысь долязэ) но улон сэреглы кулэяськисьёс пӧлы шеде. Соин программае воштонъёс пыртэмын: таӵе семья улон сэреглы ёрмисьёслэн черодазы султыны быгатэ, ваньбурзэ вузам дырысен ар ортчыса гинэ. Пӧям дольщикъёс ласянь туннэ нуналлы сюлмаськытэ на 5 объект гинэ. Азьвыл аръёсы та лыдпус шӧдскымон тросгес вал.

— Кылсярысь, курад-ӟиськомы «Химстрой» огазеяськонэн ӝутэм объектъёсъя, — веранзэ азьланьтэ Р. Хабибуллин. — Улон инты басьтыны мылкыд карисьёсын соос огкыл гожъяллям, нош статуссыя соослэн таӵе правозы ӧвӧл. Соин ик судын таӵе огкылъёсты санэ уг басьто. Озьы-а, тазьы-а но, таосъя но югдур сэрттӥськоз-пертчиськоз. Пӧям дольщикъёс одно ик липет улэ пырозы.

Пумиськонын кылпум потӥз Пичи Пурга ёросысь Пугачёво каргуртлы юрттон пумысен но. Солэн нимыз страна тыр чузъяськиз валля арын гужем ортчем пуштылонъёсын сэрен. Рустам Хабибуллин мылкыдзэ шараяз:

— Паймоно кадь: адямиос уг кепырало вазиськыны «эшшо уксё басьтэме потэ, бускелелы сётӥзы ук» кылъёсын. Но шугадӟон вылын уд узырмы ук. Со сяна, калык ӝожтӥське лэсьтӥськон ужъёслэн ӟечлыксы вылэ. Нимысьтыз кылдытэм комиссия таӵе вазиськонъёсты, интыосы потаса, сэрттэ-пертче. Озьы 100 учыр пӧлысь 90-эз юнме шорысь малпамын луэ.

Лэсьтӥськонъя, архитектурая но улон инты политикая министерство ивортэмъя, кылем арын декабре нимысьтыз Пугачёволы федерал бюджетысь вуиз на ог 400 миллион манет. Но азьвыл чакламъя та лыдпус одӥг миллиард пала луыны кулэ вал. Ку вуоз кылемез коньдон — тодмо ӧвӧл. Нялтас вераса, пуштылонъёс ортчем бере ваньзэ-ӧвӧлзэ вуиз 3 миллиард 700 миллион манет. Со пӧлысь 400 миллионзэ висъяз республика.

Елена Никитина
Туспуктӥз Александр Горбунов

Удмурт Дунне
By Удмурт Дунне 22 февраля, 2013 09:59