Школаос уз луэ ни?

Удмурт Дунне
By Удмурт Дунне 22 февраля, 2013 09:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Школаос уз луэ ни?

Глазовысь пединститут.                     «Дышетон сярысь» законъя пединститутъёсын дышетозы дунтэк.

Глазовысь пединститут. «Дышетон сярысь» законъя пединститутъёсын дышетозы дунтэк.

Дышетон удысын воштӥськонъёс пумысен вераськонъёс берло дыре ӧз чусомылэ. Но нокин умой-умой вераны ӧз быгаты — кыӵеесь соос луозы. Угось законлы проектэ гинэ 1 сюрс 700 пала воштонъёс но ватсанъёс пыртэмын вал.

Озьы-а тазьы-а, но мильым пыжемын, «Дышетон сярысь» закон Кун Думаын юнматэмын. Туэ 1-тӥ сентябрьысен со пичиен-пичиен улонэ пыӵаны кутскоз. Кун Кенешысь наукая, дышетонъя, культурая но егитъёсын ужан политикая ялан ужась комиссилэн кивалтӥсез Наталья Сударикова верамъя, секытэн-а, капчиен-а сётскоз республикамылы выль вапуме выжон — али туж шуг вераны.

— Валамон, ӟеч интыосыз законын ӧжыт ӧвӧл, — шуиз Наталья Алексеевна. — Кылсярысь, мыным туж кельше, инвалид пиналъёсты визьноданлы бадӟым саклык висъяськоз шуыса. Соос огъёзъёсынызы ӵош одӥг школаын, одӥг парта сьӧрын пукыны быгатозы. Бен, та понна дышетон учреждениосын, кылсярысь, пандусъёс, лифтъёс лэсьтоно, коляскаен ворттылӥсьёслы сюресэз каньыл карон понна.

Со сокем секыт ужпум ӧвӧл, пе. Но кемагес, дыр, выль сямен ужаны дышозы дышетӥсьёс. Кышкано на солэсь: уз-а обиде шугъяськись пиналъёсты огъёзъёссы. Бен, марысь мар ке, нылпиез дорын но дышетыны луонлык сётӥськоз — та пумысен мылкыдзэс вераны кулэ анай-атайёс.

Школаос сярысь веранъяз Наталья Сударикова тупатӥське: дышетон организациос. Угось выль законын «школа», «дышетон учреждение» кылъёс ӧвӧл ни, ваньмыз соос — организациос.
Уз луэ ни НПО-ос но (начальной профессиональной училищеос). Таизлы тросэз улосъёс пумит вал, пӧлазы Удмуртия но. Но Москва аслэсьтыз лэсьтӥз.

— Иське, тросгес пӧсяно луозы ссузъёс, — ватсаз ялан ужась комиссилэн кивалтӥсез. — Профессиослы дышетонэн ӵош соос егитъёслы шоро-куспо тодон-валанъёс но сётыны кулэ луозы. В. Путин курон пуктӥз: матысь дыре кунмы дасяны кулэ ӟеч тодон-валанъёсын ог 25 миллион ужась профессиен адямиосты. Та уж усёз ссузъёс вылэ но.

Нош куд-ог удысъёсъя вылӥ тодон-валан басьтон понна дунъёс шӧдскымон йылозы. Таин соглаш асьме вылӥ кивалтӥсьёс: кун пе, дасяны кулэ сыӵе специалистъёсты, кудъёсызлы та вакытэ туж кулэяське. Кылсярысь, дунтэк дасяно дышетӥсьёсты — соос уг тырмо. Выль дышетскон арлы али ик дасяськонъёс мыно, тодмо: школаосын ог 1 сюрс буш интыос.

Нялтас вераса, ЕГЭ дышетон удысэ выжыяськоз. Табере солэн «кужымез» 5 арлы тырмоз. Озьыен, туэ 11-тӥ классэз йылпумъясьёс экзаменъёсын басьтэм баллъёсынызы 5 ар ӵоже вузъёсы куриськыны быгатозы. Эшшо: нылпи садъёсы, шонергес вераса, яслиосы, куриськыны луоз нунылы 2 толэзь дыръя ик. Угось школалэсь азьло визьноданлы табере нимысьтыз саклык висъяськоз — со дышетонлэн нырысетӥ тубатэныз лыдъяськоз. Валамон, таизлы республикамы дась ӧвӧл на. 3 аресысен нылпиос пӧлын черодэз сылмытыны пӧрмытӥм ик. Озьыен, яслиос, нылпи садъёс усьтон бордын эшшо чырмытгес ужано луоз.

Элина Кумачёва

Удмурт Дунне
By Удмурт Дунне 22 февраля, 2013 09:12