Пуклё — со пу гинэ ӧвӧл

Удмурт Дунне
By Удмурт Дунне 5 февраля, 2013 11:20
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пуклё — со пу гинэ ӧвӧл

7

В. Лермонтовлэн ки улаз вордӥське Гидкузё

Калык творчествоез азинтэмез понна 2012-тӥ арын Удмурт Правительстволэн «Признание» премиеныз пусъемын Алнашысь кибашлыослэн юртысьтызы усточи Виталий Лермонтов.

Виталий Лермонтов Алнашысь киужъёсъя юртын усьтӥськемез дырысен ик, кызь арлэсь ятыр, ужа ни. Озьы нырысетӥ вормонъёс дорозь кузь сюрес ортчемын.

— Виталий Анатольевич, чеберлыкез валан, киужен вырон котькуд адямилы сётымтэ. Тӥ кызьы таӵе тунсыко ужен герӟаськиды?

— Вордски мон 1967-тӥ арын Алнаш ёросысь туж шулдыр Ляли гуртын. Пичи дырысеным ик асьме котырысь инкуазьлы синмаськылӥ. Школаысен суредаськемъяськи. Нош пуэз яратон пыӵаз атаелэсь Анатолий Васильевичлэсь.

Ми анай-атайлэн куать кузя, куинь пиос но куинь нылъёс. Чеберлык пала кыстӥським мон но Демьян агае. Со суреданъя дышетӥсь. Атае кибашлы столяр вал. Ма гинэ ӧз лэсьтылы: колхозлы уробоос, огшоры дӧдьыос но чеберъямъёссэ (калыкын кошовка нимало). Соку ваньмыз сямен пу коркаос пуктылӥзы бере, со трос лэсьтӥськиз, ӧсъёс, янакъёс, рамаос лэсьтылӥз но тырылӥз. Мон сое ваньзэ адӟи. Пичиысен пуэз шонер вандылыны но волятыны дыши.

Школа бӧрсьы дышетски Чайковский городын, отысь СПТУ-ын ортчи суредась-оформитель луонъя курсъёсты. Нош пу киужъёс борды зэмос басьтӥськи ни армия бере.

— Пуэз тӥ кызьы синйылтӥськоды, шӧдон вань-а, кытчы со кутӥськоз, малы яралоз?

— Котькуд пулэсь кыӵе ке но образ потэ. Нюлэстӥ поръяку, син шоры йӧто пӧйшуръёслы тупась лӥялъёс, чигем писпуос. Пӧлазы сюро ӟичы, кеч, кион, мукетъёсыз. Сыӵе дыръя ваез гинэ но киултоно кожасько. Маке выльзэ кылдытыку, трос малпаськоно луэ. Син шоры маке рос-прос пуксе ке, соку ужаны кутскисько.

— Тӥ тужгес но тодмо луиды пу скульптураос лэсьтэменыды. Секыт-а со уж?

— Секыт, но туж тунсыко. Пичи ужъёсысен та борды басьтӥськи. Ӵемгес соос герӟаськемын удмурт выжыкылъёсысь но мифъёсысь геройёсын. Выремея шӧдӥ ни: пӧрмозы бадӟымесь ужъёс но. Озьы парк скульптураос лэсьтон борды басьтӥськи. Та удыс асьме шаерын умой азинске. Трос ёрос центръёсысь калыкез пу скульптураос шумпотто ни. Уноез, вашкала мифологиос вылэ пыкиськыса, лэсьтэмын. Мынам но нырысетӥез уже озьы кылдӥз. Нырысетӥзэ ӵошатсконэ пыриськыкум, 2002-тӥ арын вал со, ми, пу вӧлӥсьёс, ӵошатским Ува санаторий палан. Ӧжытак курдасько, но уг возьматӥськы. Киям тӥр, нош кин дышемын ни таӵе бадӟым ужъёслы, бензопилаос кутӥллям. Ужме «Сайкан» шуыса нимай. Ушъяськемлы медаз пӧрмы, но аслым но кельшиз, калык но ӧз курла. Нош вуоно араз ӵошатсконын учкисьёслэсь приззэс сётӥзы. Сыӵеесь нырысетӥ вамышъёсы.

Парк скульптурая вожвылъяськонъёс али арлы быдэ сямен ортчыло. Со туж умой. Ӵошатскон ортче, но скульптураос уг ышо-быро, калыклы шумпотон кыле.

— Нош асьтэлэн кӧня сыӵеесь ужъёсты ни?

— Та дырлы даслэсь ятыр люкаськемын. Одӥгез Алнашысь загслэн юртэз дорын, со анайлыкез данъя.
Парк скульптурая вожвылъясконъёсы мон котькудаз пыриськыны турттӥсько. 2004-тӥ арын Глаз карын, нош 2010-тӥ арын Уваын ортчемъёсаз лауреат луылӥ. Али та уж борды басьтӥськисьёслы эшшо ик удалтӥз. Ижын араз куинь пол семинаръёс ортчыло. Отын тодосчиос трос тодон-валан сёто, лекциос лыдӟо, нош чеберлыкез эскерись комиссия азьпалан ужаны темаос ӵектэ. Кыкетӥзэ люкаськыкумы, ми отчы эскизъёсын мынӥськомы ини. Сое тодосчиос эскеро, эшъёс ас малпанзэс верало. Собере со макетъёс бордын ужаськод ни. Озьы егит кутскись но, зэмос кибашлы но али ӟеч валало, соос огназы ӧвӧл, артэ котьку юрттыны дась адямиос вань шуыса.

— Пиналъёс бась-тӥсько-а пу вӧлон уж борды?

— Вань сыӵеос. Дышетскись пиналъёс ветло арнялы кык пол татчы, мастерское, кружоке.
Сыӵе курон ми азе пуктэмын: урокъёс бере пинал медаз костаськы урам кузя, компьютер сьӧрын ялан медаз пукы. Соин тросгес пиналъёсты киуж борды кыскыны кулэ.

— Но со понна пиналлэн мылкыдыз медло ук!

— Шонер, кужмысь ноку но ум косӥське. Котькудӥз ачиз бырйыны кулэ, ма солы кельше. Тани пу шоры учконо ӧвӧл со кор, пуклё яке пис шуыса, адӟоно солэсь чеберлыксэ, учконо, ма солэсь пӧрмытыны луоз. Сыӵе шӧдон луыны кулэ. Со понна ик киужъёсъя юртын ми мастер-классъёс ортчытъяськом. Нош мылкыд карисьёсты мон 12 арескысен гинэ кутӥсько. Пу вӧлонын угось лэчыт арбериосын ужано луэ, соин ик аресэз чакласько. Трос кузя но медаз луэ соос, 3-4 пинал тырмыт ни, озьы котькудӥныз нимаз ужаны луонлык сюре. Али кык кузя мылысь-кыдысь ветло. Ваньмыз кибашлы уз луэ, но воргорон ужлы, пуэн вырыны одно ик дышозы. Огез ми дорын дышетскем пияш али юртамы вӧлӥськон станокъёсъя методистын ужа ни.

— Нош асьтэ пиналъёсты кыстӥсько-а киуж борды?

— Нылмы куиськонъя но мукет киужъёсъя кружокъёсы ветлӥз, Толик пимы али 9-тӥ классын дышетске, со арганэн шудэ, мон дорам ма но со лэсьтӥсько бере, адӟем карыса со пу вӧлыны йӧндыре ни.

— Тӥлесьтыд ужъёстэс басьтӥсьёс вань-а?

— Басьто. Киужъёсъя юртамы но лыкто, пӧртэм адӟытонъёс дыръя басьтӥсьёс луо. Ма, дорам но гуртоос вуыло. Кин ке сандык, кин ке наличник куре, азьло ӵемгес гардинаос лэсьтылыны курылӥзы. Соку соосты магазинысь шедьтыны уг луы вал.

Котькуд ужез вань сюлэмез поныса лэсьтӥськод ни. Огполаз тяп-ляп ужад ке, мукет дыръя но сыӵе ик пӧрмоз ни. Соин ик котькудӥз бордын, сандык-а, шкатулка-а со, рос-прос ужано луэ. Ширпотреб ӧвӧл ук со.

— Али лэсьтоно ужды туж тунсыко, малы бырйиды Гидутисьлэсь образзэ?

— Со удмурт мифологиысь басьтэмын. Тодӥсько на: пичи дыръямы пудоез ум сюдӥське ке, анай-атай милемыз гидкузё кутоз шуыса курдатъязы. Со сярысь пӧртэм сямен гожъямын: пичи гинэ мугоръем тушо пересь я гондырлы тупась. Но гидкузё лякыт сямо вылэм. Со пудоез сюдэм-люктам, гидэз утем. Тужгес но яратэ вылэм валъёсты. Йырсизэс, быжзэс сынаса-пуныса возем. Соин сое бадӟым мугоро но лякыт сямо карисько. Вал но со вӧзын пичи адӟиське. Гидкузё валэз кипыдэсысьтыз сезьыен сюдэ. Мон озьы адӟисько геройме.

Иван Аркашев

Туспуктӥз Владимир Беломорских

Удмурт Дунне
By Удмурт Дунне 5 февраля, 2013 11:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<