Покчивуко гуртысь Кузьма

Удмурт Дунне
By Удмурт Дунне 8 февраля, 2013 13:30

Покчивуко гуртысь Кузьма

21=8-1Кузебай Гердлэн кылбуръёсызъя инсценировка

Кузебай Гердлэн творчествоеныз кылбуръёс, шудонъёс, кырӟанъёс, вазиськонъёс пыр тодматскон покчиослэсь вераськон кылзэс волятоз. Ужрадэз ортчытон азьын К. Гердлэсь кылбуръёссэ, калык кырӟанъёсты, вазиськонъёсты дышетӥм, шудонъёсты, лыдъяськонъёсты тодамы вайимы.

Визьнодась. Вавож ёросысь Покчивуко гуртын вордӥськем но будэм пичи Кузьма. Кин сярысь мон верасько, пинальёс?

Пиналъёс малпанъёссэс верало.

Визьнодась. Бен, мон верасько Кузебай Герд сярысь. Тани солэн туспуктэмез. (Визьнодась туспуктэмез возьматэ.) Нош зэмос нимыз кызьы меда вылэм?

Пиналъёс малпанъёссэс верало.

Визьнодась. Бен, Кузьма Павлович Чайников. Нош тӥ кадь пичи дыръяз сое Кузьма шуо вылэм. Асьмеос но вуыломы Покчивуко гуртэ Кузьма доры, тодматскомы со вакытысь гурт улон-вылонэн.

1-тӥ нылпи.
Ужаса, кырӟаса
Ми гуртын улӥськом.
Куддыръя шудыса,
Куддыръя усъяса,
Лудъёстӥ ветлӥськом…
(«Гуртын» кылбур).

Визьнодась. Вазь ӵукна ик гурт атасъёс кесясько ни.

1-тӥ нылпи.
Ӵукна ик гуртын
Отын но татын
Атасъёс ваньзы
Ваче кесясько.

(Йыразы атас ӟускиен пиос.)

1-тӥ пи. Кизилиос кысӥзы-ы-ы!
2-тӥ нылпи. О-о! Ми султо-о-ом!
3-тӥ пи. Бурдъёс пукыса чутырмизы-ы-ы!
4-тӥ пи. Султэ ваньды-ы-ы!
5-тӥ пи. Кокорико-о-ок!

(Йыразы кышетэн нылъёс.)

1-тӥ ныл. Курегъёс сайкисько!
2-тӥ ныл. Ок-ок-ок-ок! Ок-ок-ок-ок!
3-тӥ ныл. Султом! Султом! Султом!

(«Атасъёс» кылбур).

Визьнодась. Гурт калык сайка, урам кузя пичи Илля шуланэныз шуласа мынэ, пудоез улля.
Пудо возьмась дӥсен потэ пияш, кылбур лыдӟе.

Пияш.
Вазь ӵукна пичи Илля
Пудозэ лудэ улля.
— Ту-ту-ту!
— То-то-то!
Пудоме тэле потто.

Кунянъёс ворттыло,
Ыжпиос тэтчало,
Иськалъёс бӧксыло,
Ульчае потыло.

Тилинь-тинь!
Тилинь-тинь!
Гуртэтӥ кылӥське.
Иллялэн кырӟамез
Гурт сьӧртӥ шуккиське.

(«Пудочи» кылбур).

Визьнодась. Нош пиналъёс доразы юрттӥсько но шудыны мыно.

Пиналъёс кырӟало «Вало но возь вылын» кырӟанэз.

Вало но возь вылын
Кык чебересь льӧмпу сад,
Ойдолэ, эшъёсы,
Со сад улэ шудыны.

Киязы крезьгур шудонъёс кутыса, нылпиос кылбур лыдӟо.

1-тӥ нылпи.
Барабанэн шудӥськом,
Тазьы соин шудӥськом:
Тра-та, тра-та, тра-та!

2-тӥ нылпи.
Пеллянэн но шудӥськом,
Тазьы соин шудӥськом:
Тру-ру, тру-ру, тру-ру!

3-тӥ нылпи.
Арганэн но шудӥськом,
Тазьы соин шудӥськом:
Вики-вак, вики-вак, вики-вак!

4-тӥ нылпи.
Кырезен но шудӥськом.
Тазьы соин шудӥськом:
Трень-брень, трень-брень, трень-брень!

5-тӥ нылпи.
Гырлыен но шудӥськом,
Тазьы соин шудӥськом:
Жингыр-жин, жингыр-жин, жингыр-жин!

(«Ми шудыны быга-тӥськом» кылбур).

6-тӥ нылпи. Ойдолэ палтуриен шудыны!
Пиналъёс. Ойдолэ!

«Палтури» калык шудон. Лыдъяськыса пиналъёс быръё палтури.

— Кыз улын пересь пуке,
Кӧня солэн губиез?
Кӧня?
— Сизьым (1,2,3,4,5,6,7).

Пиналъёс султо кузэн огзы бӧрсьы огзы, палтури султэ азязы.

Пиналъёс.

Тури, тури, палтури,
Вӧйын нянь тыныд кури,
Кытчы ыштӥд бурдъёстэ?
Кытчы кельтӥд пыдъёстэ?
Тӥни инмын кизили,
Монэ туннэ кут али!

Берпуметӥ кузын сылӥсь пиналъёс, киоссэс лэзьыса, азьлань бызё. Шудӥсьёс ваче ки кутӥськыны туртто, нош палтури кудзэс ке кутыны выре. Кинэ кутэ, соин ӵош кузэн султо шудӥсьёс азе. Огназ кылем пинал луэ палтури.

Визьнодась. Пиналъёс шудонъязы ӧз ик шӧдэ зор пилемлэсь шундыез ватэмзэ.
Пиналъёс лыдӟо вазиськонъёс.
Шунды-мемей, пот, пот,
Пилем-дядяй, кош, кош.

Эн зор, эн зор, зорые,
Дугды, дугды, зорые,
Тани потоз шундыед,
Куасьтоз, быдтоз зорыдэ.

Визьнодась. Оло, пилем дядяй кылӥз асьмеды, зорытэк кошкиз.

Нылпи. Корка котырен шудомы! (Лыдъяське.)
Чикле-пукле, чикле-чик,
Кинлы луоз, со потоз.

Пиналъёс султо круге, киоссэс кус вылазы поныса, нош быръем пинал круг сьӧртӥ ветлэ но таӵе кылъёс вера:

Корка котыр ветлӥсько,
Укноосы учкисько.
Одӥгез доры дугдо,
Туж каллен мон йыгасько.
Ток, ток, ток!

(Кин доры дугдӥз, солэн пельпумаз йыгаське.)

— Кин отын?
— Мон (ним).
— Ма кулэ?
— Ойдо бызьылыса шудом.
— Ойдо (кияз чабке).

Киоссэс чабкыса, пӧртэм пала бызё. Кин буш интые азьлогес султыны ӧз вутты, со луэ корка котыртӥ ветлӥсь.

Нылпи. Ой, дорелэсь мӧзми ини, ойдолэ бертом!

Пиналъёс. Ойдолэ!
Кырӟаса кошко.
Возьма, дыр, дядие, капкаоссэ усьтыса.
Возьма, дыр, мемие, ӝӧккышетсэ вӧлдыса…

Визьнодась. Тани нош одӥг нунал ортчиз. Пичи Кузьма будӥз, тодмо гожъясь луиз, удмурт пиналъёслы трос кылбуръёс, веросъёс гожъяз. Нылпи садмы но солэн нимыныз данъямын.

Надежда Николаева,
Кузебай Герд нимо нылпи садысь воспитатель

Удмурт Дунне
By Удмурт Дунне 8 февраля, 2013 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<