Пиослы уг окмо нылъёс

Удмурт Дунне
By Удмурт Дунне 15 февраля, 2013 16:41

Пиослы уг окмо нылъёс

С. Ускова нуэ кружок

С. Ускова нуэ кружок

Эграысь егитъёслэн «Лига» центрзы котыраз огазея ёросысь егитъёсын ужась специалистъёсты. Светлана Ускова ужа Чутыр черкогуртын.

Глазов пединститутэз йылпумъям педагог-психолог культура юртын методистын тырше на. Школаын дышетскись нылпиос пӧлын театръя но «Быгатӥсь киос» кружокъёс нуэ.

— Светлана Ивановна, Атыкай музъеммес утисьёслэн нуналзы матэктэмен валче егитъёс пӧлын патриотизм мылкыд пыӵатон пумысь кылпум ӝутэм потэ.

— Ас кундэ, шаердэ яратон мылкыд покчиысен пыӵатыны кулэ. Культура юртысь специалистъёс та ласянь нылпи садын но школаын ужасьёсын ӵош тыршо. 20-тӥ феврале школаын ортчоз «Хоръёслэн нюръяськонзы» («Битва хоров»). Отчы пырисько нылпи садысь покчиос но 1-тӥ-4-тӥ классъёсын дышетскисьёс.

Котькуд команда дасяны кулэ куинь кырӟан: асьсэлы кельшисьсэ, патриотизмен герӟаськемзэ но ӟечкылан пуштросэнзэ. Вожвылъяськонэз йылпумъяса, культура юртысьтымы «Купанча» калык ансамбль нылпиослы мастер-класс возьматоз. Арлыдоос пиналъёсын ӵош кырӟалозы Чутырлэсь гимнзэ но «Пусть всегда будет солнце» кырӟанэз.

Хоръёслэн нюръяськоназы вормисе потэм командаос 21-тӥ феврале пыриськозы Атыкай музъеммес утисьёслы сӥзем бадӟым концертэ. Асьсэлэсь быгатэмзэс возьматозы черкогуртысьтымы усточиос — арлыдоос но, егитъёс но.

— Вордӥськем музъемез яратон мылкыд кырӟанъёс пыр гинэ уд пыӵаты. Маин мукетыныз сьӧрады валтыны быгатӥськоды вуоно кивоштӥсьёсты?

— Кык-куинь арзэ ини инкуазез утён бордын ужаськом. Чутыр черкогуртэз чылкытатонъя программамы пыре элькунысьтымы быдэ вуымтэосты уже интыянъя программае. Со чотын гужемзэ нылпиос черкез но со котырез утялтонэ пырисько. Кык арзэ вить кузя ужазы ке, таяз гужем утялтӥськон куинь муртлы вормымон луоз ни. Нуналаз ньыль час тыршыса, пиналъёс толэзяз пичи уждунлэн быдӟалаез мында коньдон басьто.

Черкогуртмес чылкытатон уждун тыронэн гинэ герӟаськемын ӧвӧл. Ёросамы радъям «Мон — волонтёр» фестиваль Чутырысь но ӟеч мылкыдо пиналъёсты огазеяны юрттэ. Волонтёръёсын тулыс субботникъёсы пыриськиськом. Пӧртэм организациосын тыршись егитъёс но та ужъёслэсь палэнэ уг кылё.

Котырам огазеяй бадӟым классъёсысь азьветлӥсьёсты, школаез йылпумъямъёсты. Соосын ӵош элькунамы но ёросын радъям пӧртэм ужрадъёсы пыриськиськом. Кылсярысь, котькуд апреле ортче ӟеч ужъёслы сӥзем арня. Школаын дышетскисьёс нылпи садысь покчиосын кусып тупатыны дышетско, шудо-кырӟало соосын. Ӟечлыкен герӟаськем дискотекаос радъяськом, калык пӧлы ялонъёс (агиткаос) вӧлмытӥськом. Тазалыко улонлы сӥзьыса, кысконлы пумит но мукет ужрадъёс ортчытъяськом.

— Нош ужась егитъёсты секытгес ӧвӧл-а огъя ужрадъёсы кыскыны?

— Азьвыл тросгес саклык висъяллям культура, эмъян, дышетон удысысь специалистъёслы. Али ужась егитъёсты но бордамы кыскыны турттӥськом, гурт хозяйствоысь специалистъёсын но кусыпъёс тупатӥмы. Соос понна кылем толэзе ортчытӥм пумиськон.

Черкогуртысьтымы нимаз-нимаз организациосты басьтоно ке, егитъёс котькудаз кык-куинь кузя люкаськозы. Соослы огазеяськыны туж ӟеч амал — спорт. Егитъёс спортзалэ котькуд ӝытэ туж мыло-кыдо лыкто, культура юртамы спортъя методистмы ужа. Пиослэн но, нылъёслэн но волейбол шудонъя командаоссы вань. Бадӟым праздникъёсы ӵошатсконъёс ортчыло. 23-тӥ феврале воргоронъёс быгатэмзэс возьматозы, нош 8-тӥ мартэ — нылкышноос.

Ӵошатсконъёс йылпумъясько котырес ӝӧк сьӧрын пуконэн но чай юонэн. Командаос пӧртэм организациослэсь люкасько. Кун Кенешлэн депутатэзлэн Софья Широбоковалэн призэз понна ёрос ӵошатсконъёсы но пыриськиськом.

Куинь аръёс талэсь азьло пиосмы пӧлын ортчытӥм «Любовь с первого взгляда» шудон, психология амалъёсты уже кутыса. Мазьгиысь нылъёсты ӧтчамы ужрадамы. Эмеспи луонъёслы со туж кельшем, нош ик мылкыд каро пумиськыны. Нялтас вераса, Яратӥсьёслэн нуналзылы сӥзьыса, егитъёс пӧлысь азьветлӥсьёсын «Мар со яратон?» шудон радъялом. Ортчоз со ульчаын.

— Светлана Ивановна, егитъёс азьло аръёсы сямен ик городэ кыстӥсько-а?

— Городын дышетскемъёс берло дыре дор палазы бертогес. Егит специалистъёсты кыскон пумысен «Чутырский» совхоз сюлмаське. Кылем арын кыксэ уже кутӥзы, общежитие выллем юртэ улыны интыязы. Бен, корка ӝутон пумысен милям шуг-секытъёс вань, музъемъёсмы нефтяникъёсын басьтэмын. Нош уж ласянь шугъяськонъёс уг кылдо.

Лия Малых
Туспуктӥз Владимир Беломорских

Удмурт Дунне
By Удмурт Дунне 15 февраля, 2013 16:41
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<