Огзэ ке но шунтӥ?

Удмурт Дунне
By Удмурт Дунне Февраль 8, 2013 16:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Огзэ ке но шунтӥ?

- Котькуд ялонлы оскод меда?

— Котькуд ялонлы оскод меда?

Выль ар азьын Интернет вотэсысь «ВКонтакте» сайт пыр адямиос доры йыгаськыны ӧдъяз юзырес ивор: «Ижысь нылпи юртэ туж-туж кулэ пичиослы дӥськут.

1-ысен 3 аресозь тэшкылиос ураме черодэн потало шуныт курткаоссы но штаниоссы ӧвӧлэн. Солэсь пичиоссэ уен-нуналэн кутэтэ биньыса возё — ползунокъёс но распашонкаос уг тырмо. Нылпи юртын ужасьёс асьсэос газетъёсысь ялонъёсын бугыръясько ни, кин мазэ дунтэк сётыны дась шуыса. Эшъёс, ойдолэ юрттом! Нуллэм дӥсь но яралоз».

Та ялонлэн кузёез Роза Низамова аслэсьтыз телефонзэ сётэм на, кин юрттыны дась, жингыртэ, пе, мыным. Ачим ик, пе, дӥсез дорысьтыды басьтыны но нылпи юртэ нуыны быгато.

Сюлэмы вырӟиз. Син азям соку ик пуксиз 2 аресъем пие. Нылпи садэ шуыса дӥськут ымгайгес басьяй вал. Унозэ нуллыса но ӧз вутты — пичи кылизы. Ма, кӧня ке пол дӥсямъёсыз но выль кадесь ик. Юнме шкапын тузонӟытод шат?

Соку ик жингыртӥ Розалы. Бадӟым кенешын, пе, пукисько. Герӟаськыны косӥз нылпи юртысь Алина нимо нянечкаен. Соиз трубказэ ӝог кутӥз. Куараез егит, йыг-йыг:

— Ми туннэ утиськомы 62 пиналэз. Со пӧлысь 21-ез алигес гинэ дорамы сюриз нылпи ваён юртысь, анай-атайёссы куштӥллям. 30 пичиос 2 ареслэсь ортчемын ни. Шоразы синвутэк учкыны уг луы — дӥсьлы ёрмо.

Нылмуртэн пумиськыны кенешим ке но, ачим уг буйгаськы. Дӥсен сяна, оло, эшшо мукет юрттэт кулэ соослы?
Жингыртӥ меӵак нылпи юртэ. Монэ герӟазы кивалтӥсьлэн воштӥсеныз. Интернетысь ивортон пумысен кылэмез бере ик Наталья Муралёва куалектӥӟ

— Ми сыӵе ялон нокытчы но ӧм сётъялэ! Кытысь адӟиды? Ми номырлы но ум ёрмиське. Собере, асьтэос малпаське ай, кызьы ми вуж дӥсез басьтыны соглаш кариськом меда? Сое чылкытатоно-сузяно на. Кин тодэ, оло, лыдонэсь, оло, тэесь со. Нош милям сыӵе сузян арбериосмы ӧвӧл. Выльзэ сётэмды потэ ке, вае — кинлы ке но яралоз. Емыш кадьёсты но басьтэммы уг луы — соос медикъёсын эскеремын ӧвӧл ук. Туж умой луоз, уксё висъяды ке. Но дӥсьтэс ум ик басьтэ. Кин ке янгышаз, дыр, сыӵе ялон сётыса.

Ма карыны ик ӟудӥ. Дӥсь быдэс мешок тыр люкамын ни. Муралёва, оло, танӥськыны ӧдъяз? Россиысь Правительстволэн 374 номеро постановлениез вань. Отын сьӧдэн-тӧдьыен гожтэмын: котькуд сирота нылпилы толалтэлы государство висъя 1 пальто. Озьы ик уг вунэты сӥзьыл-тулысэз но. Соиз но, таиз но дӥсь чакламын 2 арлы. Школае ветлӥсьтэм пичиослы шуныт но векчигес костюм быдэн 4-ен люкыло, бадӟымъёсызлы — 2-ен. Таосыз но чакламын 2 арлы. Сиротаослы чакламын 1 шарф, 1 куз пӧзьы, 6 пар носки, 3 пар ботинка, 2 пар гын сапег но 1 пар резина сапег. Нылпилы быдэ сётӥське 4 ӵушкон, 2 зӧк шобрет, 1 матрац, 1 миндэр. Зэм, постановлениын пусъемын: нылпи юртъёс вань та лыдпусъёсты кызьы кулэ озьы воштыны быгато.
Ижысь нылпи юртысь покчиос мае дӥсяны паймо ке, озьыен, кунэн висъям уксё палэнэ кошке?
* * *
Алина дорам вуиз. Мугорыз чиед, аслаз машинаез ӧвӧл. Но секыт мешок шоры учкыса, бурдъяськиӟ пичиос шумпотозы, пе. Ачим но, Муралёвалэсь кылъёссэ вунэтыса, малпай: туннэ огзэ ке но пиналэз шунтӥ, дыр.
Зэм, отӥяз аслам но, юлтошъёсылэн но йыразы берганы кутскиз малпан: отысь-татысь бичам дӥсь нылпи юртэ ик кошке меда? Оло нош сое келяло «Second hend» магазин кадьёсы но отын вузало? Соин ик доретӥ, дӥськут бичаса, асьсэос ветло, вылды. Нылашъёс оскытыны выризы ик: дӥсь утчамзэс нылпи юртэн кивалтӥсьёс шара вераны уг лэзё, законэз тӥямзы понна куаретӥсьёс шедёзы, пе. Соин, пе, асьмеос адямиос дортӥ ветлӥськомы. Но сюлэм интыяз ӧвӧл. Уката ик эшшо огпол сыӵе ялонэз адӟеме бере.

Таяз рад дӥсь вайыны косэмын меӵак нылпи юртэ, Ижысь Ухтомский ульчаысь 19 номеро корка. Телефонэз Розалэн ик. Оло, тае курдатоно? Прокуратураысь кариськыса, жингыртӥ солы. Ӧз куалекты кадь. Ми, пе, Наталья Муралёваен кенешыса, ужаськомы, огкылмы но вань. Азьвыл, пе, кыӵе ке но Володина сыӵе ялон сётъя вал, но дӥськутэз воксё но нылпи юртэ ӧз вайылы. Но табере югдур воштӥськиз, Володина кытчы ке ышиз. Уд оскиське ке, пе, лыктэ 3-тӥ феврале, ужрадамы пыриське.

Шутэтскон нунал шоры учкытэк, нылпи юртысь приёмной покой доры мешокъёсын дӥсь вайисьёс ог 30 кузя люкаськизы. Ваньзыгес ик вуж макеосты кутӥллям. Куд-огез кутэтъёс, памперсъёс сярысь но вунэтымтэ. Зэм, ачиз Муралёва ужаны потымтэ. Но ӵуказеяз мон соин телефон пыр герӟаськи ик. Юромо шузи улэ аналскӥ благотворительной акциды усто ортчем, лэся, шуи. Кивалтӥсь ӧз ваты: калык сомында люкаськоз шуыса, ачим но но, пе, ӧй малпа вал. Вуж дӥсьёслы но зол шумпотэм. Ачиз выль ар азьын гинэ куаретӥз вал: вужъёсыз милемлы кулэ ӧвӧл…

Алёна Александрова

Суредаз Василий Пахомов

Удмурт Дунне
By Удмурт Дунне Февраль 8, 2013 16:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<