Наукае вамыштэ гаражысь

Удмурт Дунне
By Удмурт Дунне 26 февраля, 2013 11:51

Наукае вамыштэ гаражысь

krylovАлнаш ёросысь «Молодая гвардия» эштосын туж дунъяло егитъёсты. Быгатонлыкъёссэс шӧдо ке, кивалтон удысэз оско. Асангуртысь гаражен кыкетӥ арзэ кивалтэ Николай Крылов. 

9-тӥ классэ йылпумъяса, гуртысь пияш, атаез сямен, инженер-механик луыны малпаз. Пичиысен ик гараже ветлӥз, техника борды кыстӥськемзэ шӧдыса, гуртысь механизаторъёс руль сьӧры но пуксьылыны лэзьылӥзы.

Нош бадӟымгес классъёсын дышетскыкуз, атаезлэн нырысетӥ юрттӥсез луиз. Техникалы синмаськемез ик вуттӥз сое Асан совхоз-техникуме. Аграрно-технической техникумын дышетскыса, вордскем палъёсаз бертӥз. Техникумын басьтэм тодон-валанэныз гинэ ӧз буйгатскы, Ижысь гурт хозяйствоя академиын дышетскиз, та вакытэ кыкетӥ арзэ аспирантураын тодон-валанзэ будэтэ.

Гуртэ кылем егитъёс пӧлысь шер пумиталод Коля кадьёссэ: тамак уг кыскы, вина уг юы. Эшъёсыз ӝыт шулдыръяськонысь шӧмаськыса берто, нош со — какалмыса — колхоз гаражысь. Техникаез умой валамез понна ик кылем арын сое гаражен кивалтӥсе пуктӥзы. Егит мурт йырзэ уг урды, кулэ дыръяз ачиз техника тупатъян борды басьтӥське, нош гырон-кизён дыръя яке уборка вакытэ бусыын но ужа.
— Колхозамы кунгож сьӧрысь ваем тракторъёсмы вань, синмаськисько соослы, сыӵе техникаен ужамъя ужамед потоз. Гаражын ужась воргоронъёс серекъяло, К-700-эн гинэ на ворттылытэк кылид шуыса. Ваньмыз азьпалан ай, вуттом соиныз но ужаны, — шуэ егит специалист.

Егит муртлэн сюлмаськонъёсыз бадӟымесь: та вакытэ тулыс кизёнлы дасясько. Вуж техникаенызы люкиськыны уг дырто, выльдо, тупатъяло, тужгес аламаоссэ воштоз ёзъёслы кельто.

Николай Крылов наукае но бадӟымесь вамышъёс лэсьтэ. Кылем арын алнаш пияш пыриськиз шаерысьтымы егитъёслэн «Умник» вожвылъяськоназы, студентъёс отын выль проектъёссэс возьматӥзы. Ужзэс азинтон вылысь 12 шудоезлы 400 сюрс манет тыр грант сётӥзы, соос пӧлы шедиз Алнаш ёросысь Николай Крылов но.

— Научной уже картофка бырйись агрегатэн герӟаськемын, — вера Николай Крылов. — Ӧй ик малпа вал, вормисьёс пӧлы шедё шуыса. Грант утӥ, нош со уксёез басьтон вылысь кык ар пӧсяно на. Кварталлы быдэ эскеронъёс ортчытоно, отчёт лэсьтоно, собере утёно, со бӧрсьы гинэ басьтэммы луоз висъям уксёез. Нош та вакытэ бусы ужъёслы дасяськоно, бумагаос бордын ужаны дыры ик уг кыльы.

Гуртысь пегӟон дыръёсыд уг кылдыло-а шуыса юамелы пумит егит мурт пельпумъёссэ ӝутказ. Секыт луэ, пе, уборка вакытэ. Ӝыт шулдыръяськонэн йырин соку ӧвӧл ни. Гуртазы егитъёс ӧжыт, асангуртъёс Алнаше дискотекае ветло. Солэсь кыдёке Колялэн кошкемез уг поты.

Валентина Емельянова

Удмурт Дунне
By Удмурт Дунне 26 февраля, 2013 11:51
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<