Мӧзмонэз буйгатӥзы камсьӧръёс

Удмурт Дунне
By Удмурт Дунне 12 февраля, 2013 11:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мӧзмонэз буйгатӥзы камсьӧръёс

А. Тимерханова но  А. Камалтдинова.

А. Тимерханова но А. Камалтдинова.

Эстониын ог 300 пала удмуртъёс уло. Соос татчы пӧртэм сямен вуэмын. Куд-огез  СССР вакытэ ик выжы лэземын. Берло 20 аръёс ӵоже лыктэмъёс пӧлысь тросэз эстон вузъёсы дышетскыны пыремын.

Кинлы ке палэнын улон сокем кельше, соос улонзэс пыраклы герӟало кунгож сьӧрен. Куд-ог егитъёс татын ик семьяос кылдыто. Мукетъёсыз, кӧня ке аръёс ӵоже татын улыса но дышетскыса, вордскем палъёсазы берен берто. Улон Россиын но капчи ӧвӧл, шуг-секытъёс тырмыт Эстониын но. Озьы ке но татысь удмурт диаспора улэ, азинтӥське, пӧртэм сямен аслэсьтыз кылзэ но лулчеберетсэ утьыны тырше. Удмурт егитъёслэн вордско пиналъёссы — соос но, фин-угор омырын шокаса-визьмаськыса, будо.

Эстониысь ас выжы калыкен кусып возён вылысь ик кылдытэмын удмуртъёслэн «Ошмес» огазеяськонзы. Ӵемгес пумиськылон, ӵошен сям-йылолъёсты, кырӟанъёсты быдэстон понна Тартуысь университетын дышетскись студентъёс ветло «Юмшан гур» ансамбле. Дорлэсь но Россие кылем эшъёслэсь, ӵыжы-выжыослэсь мӧзмонэз буйгатыны ӧжыт ке но юртто улосчиосын пумиськонъёс. Араз кык пол, куддыръя ӵемгес но, Эстониысь «Фенно-угрия» огазеяськон но

Эстониысь удмуртъёс дэмен люкаськыны быгато.

Эстониысь удмуртъёс дэмен люкаськыны быгато.

Ӵыжы-выжы луись калыкъёслэн программазы одно ик шумпотто. Соос Россиысь удмурт культураен  вырись адямиосты яке кырӟась-эктӥсь коллективъёсты ӧтьыны тыршо. Ӟеч сямлы пӧрмемын ни арлы быдэ октябрь толэзе Ӵыжы-выжы калыкъёслэсь нуналъёссэс радъян. Со сяна, январе К. Гердлэн вордскем нуналэзлы сӥзем удмурт ӝыт ортче. Туэ со витетӥ ползэ радъяськиз ни.

Таяз радэ Эстоние вуылӥзы Башкортостанысь Татышлы ёросысь удмурт кырӟасьёс Алёна Тимерханова но Альфира Камалтдинова. Камсьӧр удмуртъёслэн кырӟан-эктон культураенызы эстонъёс ӵем уг тодматско. Таиз кыкетӥез гинэ луиз. Нырысьсэ татчы 1998-тӥ арын ветлӥз Татышлы ёросысь ик «Шулдыр ӝыт» ансамбль.

Башкортостанын улӥсь удмуртъёс, мукет калыкъёс вӧзын улыса, дунъяны быгато удмуртлыксэс. Соос синчеберзэс кадь утьыны тыршо пересьёслэсь кылем сям-йылолъёссэс, вашкала осконзэс.

Соин ӵош ик огъя культураязы но кылазы шӧдӥсько трос бигер, башкир шӧмъёс. Алёна Тимерханова но Альфира Камалтдинова быдэстӥзы «пересь куй» кырӟанъёсыз. Отын трос тюрк элементъёс пумисько — соос гуре но,  кылъёсы но пыӵамын. Удмурт кылын быдэстоно кырӟан быдэсак башкир гуръя но луыны быгатэ. Пичи дырысенызы бигер-башкир гуръёслы дышем удмуртъёс мылысь-кыдысь быдэсъяло бускель калык кырӟанъёсты но.

Эстониын А. Тимерханова но А. Камалтдинова возьматӥзы  нясь-нясь, сюлэме лякиськись но лулэз буйгатӥсь ӝӧк сьӧрын кырӟан, армие келян, урам куйёсты, бигер кылын но гурен кырӟанъёсты. Со сяна, возьматӥзы татышлы удмуртъёслэсь шудон-эктон манерзэс, ӵошатон понна озьы ик быдэстӥзы мукет интыосын улӥсь удмуртъёслэсь кӧня ке кырӟанъёссэс, тодматӥзы кык пӧртэм дӥсен — вашкала куэменыз но туала манеръя вуременыз.

Камсьӧр удмурт кырӟан-эктонъёсын тодматскон ортчиз Таллин, Тарту но Пярну городъёсын. Та ӝытъёсын озьы ик возьматэмын вал «Мынам Удмуртие» телерадиокомпаниын лэсьтэм Элен вӧсь сярысь телеочерк (со Башкортостанысь Янаул ёросысь Вуж Вараш гуртын ортчем). Кино пумысен кылдэм юанъёслы валэктон сётӥз Тарту университетысь удмурт фольклорен вырись докторант Николай Анисимов. Коля ик сюлмаськиз камсьӧр нылъёсты Эстоние вайыны, соослы кырӟаны-эктыны но мылысь-кыдысь юрттӥськиз.

Тарту карын Эстон калык музейлэн адӟытон залаз но ортчиз Кузебай Гердэз тодэ ваён. Татын ужась удмурт нылкышно Светлана Карм тодматӥз К. Гердлэн улон-вылонэныз, СОФИН ужен но соин герӟаськем эстонъёсын. Таяз ужрадэ пыриськизы Тартуысь «Юмшан гур» ансамбле ветлӥсьёс. Соос люкаськем калыкен но куноосын ӵош удмурт шудонъёсын шудӥзы. Ӝытысь туспуктэмъёс Эстон калык музейлэн экспозицияз интыямын луозы.

Анна Байдуллина
Эстония, Тарту город

Удмурт Дунне
By Удмурт Дунне 12 февраля, 2013 11:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<