Тудву ӧръяськиз

Удмурт Дунне
By Удмурт Дунне 19 февраля, 2013 11:11

Тудву ӧръяськиз

М. Атаманов

М. Атаманов

«Михаил Гаврилович Атаманов — учёный, проповедник, писатель» книгаез бичаз но пыр-поч радъяз филология наукаосъя кандидат Елена Булычева.

Та библиографической справочник сэрттэ-пертче М. Атамановлэсь, дано учёнойлэсь, писательлэсь, черк, оскон удысысь адямилэсь, улон сюрессэ, солэсь утчаськонъёссэ, малпанъёссэ, калыклэсь сое сӥлы каремзэ, кунлэсь сакламзэ.

Мар со творчество, эшшо ке наукаен герӟаськемын ке со? Кыӵе кужым валтэ Инмарен быръем адямиосты со удысэ? М. Атаманов, мон малпамъя, котьку но тодэ вал аслэсьтыз мукетъёсызлэсь пӧртэм луэмзэ.

Инмар но солы трос валан, тодон сётэм. «Вордскемелэсь азьло яратӥ удмурт луэмме…», — гожтэ одӥгаз ужаз. Со тодэ, мар понна та дунне вылэ вордӥськиз, Инмар солы туж секыт уж оскем. Солэн, зэм но, вань азьпалзэ но вашкалазэ адӟыны быгатонлыкез. Сотэк кызьы бен гожтысал «Тангыраез» но сомында научной ужъёсты, кудъёсаз йырез поромытӥсь малпанъёс усьтэмын!

М. Атамановез мон ӵошатысал шат быдӟым ӟуч филологен Д. Лихачёвен, нош удмурт культураысь — Г. Верещагинэн но К. Гердэн. Солы таӵе веран тупасал — Дунне Адями. Та валанэ пыро пӧртэм тодметъёс: сыӵе адями ассэ дуннелэн пырыеныз лыдъя, со дась кыл кутыны ваньмыз понна, мар котыраз луэ.

Мон понна та книга адямиез, дуннеез выль сямен адӟон кадь луиз — огкутскемен лыдӟи. Книга лэсьтэмын лякиё шобрет выллем, озьы ке но лыдӟиське огъя произведение кадь. Библиографической справочник огазея пӧртэм жанръёсты: интервью, отзывъёс, эссе, пӧртэм статьяосысь люкетъёс, пинал дырысь тодэ ваёнъёс, малпаськонъёс… Таӵе чибориё суред эшшо но яркытгес син азе пуктэ М. Атамановлэсь улон сюрессэ но творчествозэ. Туж интыяз пыртэмын импровизированной интервьюос.

Татын Михаил Гаврилович ассэ номырин но уг сермета ни, вань малпанъёсыз тудву кадь капчиен ӧръяськыса кошко.

Сюлэмыз вӧсь луыса, чигиськыса вера асьме удмурт сяммы сярысь. Соинтэк-а «Мон удмурт. Малы мыным вӧсь…» книгаез но потӥз. Черкын-а, светской учреждениын-а ужаз — котькытын сюрылӥзы вожъяськисьёс, куд-огез пыдзэс но пуктылӥзы. Библиез берыктон но капчиен ӧз сётӥськы. 20 ар ӵоже мынӥз та уж. Шедизы пумит верасьёс, сюлэмез вӧсь карисьёс.

Но котьку вань сыӵеос но, кудъёсыз тыныд юрттозы. Михаил Гаврилович туж шунытэн вера аслаз дышетӥсьёсыз, эшъёсыз, кылсярысь, М. Гришкина, И. Тараканов тодосчиос сярысь.

Вунэтоно ӧвӧл: ми ваньмы адямиос — сьӧлыкасьёс. Дун-чылкытэсь луысалмы ке, Инмар ӧй сётысал милемлы 10 усьтонъёссэ-заповедьёссэ. Огшоры адями, оло, куддыръя уг малпаськы аслаз ужъёсыз сярысь, нош оскись мурт кык полэс ассэ сермета. Солэн пушказ дугдылытэк мынэ ваче пумит сылӥсь кужымъёслэн нюръяськонзы.

Шӧдӥське, Елена Булычева туж яратыса бичам та материалэз. М. Атамановлэсь тусбуйзэ лыдӟисьлы пӧртэм ласянь возьматыны вырем, ышыге кылемъёсыз но татын усьтӥсько, дуно изъёс кадь ворекъяло. Та выль уж туж тунсыко потоз тросэзлы: кинлы ке со ӵоксузён выллем луоз, угось книгаын тросэтӥ сётэмын нокинэ но номыре жалясьтэм дунъетъёс. Мукетъёсызлы, мыным кадь, усьтон (откровение) луоз.

Куиньметӥосыз асьсэлы маке но паймымонзэ шедьтозы. Тодӥсько, мӧзмыса лыдӟисьёс уз луэ. Туала туж бездыт литератураямы та книга выленыз мальдытоз.

Татьяна Душенкова,
филология наукаосъя кандидат

Удмурт Дунне
By Удмурт Дунне 19 февраля, 2013 11:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<