Мертчанлэсь дуно ватин

Удмурт Дунне
By Удмурт Дунне 22 февраля, 2013 10:14
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мертчанлэсь дуно ватин

З. Петрова

З. Петрова

Шарканысь етӥн заводлы — 75 ар

Берло дыре шаерысьтымы уноез етӥн шуккись заводъёс пытсаськизы. Нош Шарканысь етӥн завод йыг-йыг пыд йылаз сылэ: ачиз тырмыт етӥн будэтэ, выль амалъёсты пыӵатыса, ӟеч мертчан льноватин, етӥн вӧй но мукетсэ поттэ. Мукет сямен вераса, шарканъёс етӥнэз мур переработкае выжо. Отысь пото азинсконъёссы.
Огазеяськонэз 11-тӥ арзэ валаса-быгатыса нуэ ни Зоя Петрова.

Зоя Петрова вордскиз Шаркан ёросысь Карсашур гуртын. Дышетскиз Сарапулысь совхоз-техникумын агрономе. Вордӥськем гуртаз, Пушкин нимо эштосын, агроном но, бригадир но луыса ужаз. Колхоз кузёлэн воштӥсез но вал. Тодон-валан люказ Свердловскысь Вылӥ партийной школаын.

Выль даурлэн кутсконаз З. Петрова ас вылаз басьтӥз куашкан калэ вуттэм етӥн заводэз но сое Удмуртиын но Россиын азьмынӥсьёс радэ вуттӥз. 2007-тӥ но 2009-тӥ аръёсы Вологдаын адӟытон-ярмаркаын Шарканысь етӥн шуккисьёс устоосыз лыдъямын.

Зоя Александровналэн тыршемез син азьын. Со кык пол пусъемын Россиысь Гурт удысъя министерстволэн Данъян грамотаеныз. Миым пыртэмын вал Удмурт Республикалэн Данъян пул вылаз. Солы сётэмын Кун Кенешлэн, Правительстволэн но Гурт удысъя но сиён-юонъя министерстволэн Данъян грамотаоссы.

— Зоя Александровна, кызьы ӝутскон сюрес вылэ потӥды, мар бордысен кутскиды?

— Азьло льнозаводъёслы етӥн будэтӥзы ваньмыз гурт хозяйствоос. Сыӵе югдур возиськиз выльдӥськон но рыноке выжон вакытозь. Но льнозаводъёс эштосъёслы етӥн куро басьтэмзы понна дун тыремысь дугдӥзы, продукцизэс басьтӥсь ӧй вал. Озьы хозяйствоос етӥн киземысь дугдӥзы. Та уж усиз льнозаводъёс вылэ. Ми солэсь ӧм кышкатске, ужамед потэ ке, ваньзэ лэсьтод. Арысь аре етӥн бусыосмес паськытатӥм, техника басьтӥм но, гурт хозяйствоослэсь муоссэс арендае басьтыса, миым 720 гектар етӥн будэтӥм, нош туэ эшшо трос, 780 гектар, луоз. Та уж капчи ӧвӧл ке но, шуг-секытэз шоры ум учкиське. Лудъёсмес асьмеос гыриськом. Али 40 тонна пӧртэм пумо минерал сылалмы вань ни. Со вӧзы эшшо 20 тонна вуттом на. Будосъёсты утьыны гужем ӵоже 2 пол химия препаратъёс пазяськом, пӧлаз кизер удобрение ватсаськом. Куазь сётэмъя етӥнмы арлы быдэ огкадь чебер уг удалты, но куромы толбыт ужаны тырме.

— Нош али мар поттӥськоды, продукцидэс басьтӥсь вань-а?

— Берлоез ласянь сюлмаськонмы ӧвӧл. Етӥнлэн кулэлыкез арысь аре йылэ. Со шумпотымон. Куинь цехъёс пӧлысь милям валтӥсь инты басьтэ мертчан поттӥсез. Мертчан кузез но, вакчиез но луэ, со дунтэмгес кошке. Соин ик азямы ужпум пуктӥм — выжоно мур переработкае. Малпанмы быдэсме. Али кык цехмы кык сменаен ужа ни: етӥн ватинэз рулонъёсын поттӥськом, пасьталазы 1 метрысен 2 метрозь луэ. Миым 6 сюрс рулон лэсьтыны чаклам ке вал, 7,7 сюрс поттӥм, нош туэ со лыдпусэз 8 сюрсозь вуттыны луонлыкмы вань. Та вузмы мынэ лэсьтӥськонэ, газонъёсын турын будэтыны но музон азе. Басьтӥсьёсмы тырмыт. Сое басьто Ижын, Воткинскын но мукет каръёсын, нош шаермылэн палэназ кошке Казань, Уфа, Екатеринбург, Челябинск, Пермь городъёсы. Рыноке сюрес лёгиськом асьмеос но, асьсэос но ужбергатӥсьёс дорамы куронъёсын лыкто.

2-5Вань поттэм мертчанмы пӧлысь тужгес но вакчизэ, 45-50 процентсэ, мур переработкае лэзём. Та продукцимы, веранэз ӧвӧл, дуногес кошке. Со юрттэ экономикамес юнматыны. Берло дыре гинэ 4 трактор но легковой автомашина басьтӥм кун юрттэмъя.

— Эшшо одӥг выль продукцидэс ӧд вералэ на.

— Туэ етӥн вӧй поттонэз радъям. Можгалась шедьтӥм куштӥськем вашкала пичи пресс. Сое умой-умой радъям-интыям но кӧня кулэ сомында етӥн вӧй шуккиськом. Пресслэн кужымез бадӟым, но ми вӧй вузамъя поттӥськом, нуналаз 300 литр. Лэзьяськом 0,5 но 0,25 литръем посудае. Со эмъюм интые мынэ, етӥн вӧйын уго вань Омега-6 жирной кислота.

— Зоя Александровна, азьланезлы кыӵе малпанъёсты, мар тӥледды тужгес сюлэмшугъяськытэ? Кыӵе осконды?

— Ӵуказеезлы осконмы бадӟым. Милемлы нокыӵе ВТО кышкыт ӧвӧл. Рос-прос, ӟеч ужам ке, ноку ум быре. Тани Шаркан черкогуртын 70 ужасьёсмы. Со пӧлысь кышномуртъёс 9-10 гинэ, шальк-шальк пиосмуртъёс ужало. Нош музон етӥн заводъёсын мукет суред — ваньмыз сямен кышномуртъёс тыршо, секыт ужъёсты быдэсъяло.

Ми ужпум пуктӥськом, ужан условиосмес умоятыса, 80 процентсэ мертчанэз мур переработка пыр лэзьыны. Соин ӵош етӥн будэтон техникамес выльдоно, уго со ваньмыз сямен вужмемын ни. Со туж люкетэ бусы ужъёсты ӝог но дыраз быдэсъяны, уката ик ӝегаськом етӥн куроез октонэн. Озьы бадӟымесь ыштонъёс адӟиськом. Асьмелэн Западын кадь ужан техникамы ӧвӧл. Соин ик ум быгатӥське выль ужан амалъёсты кутыны. Али ик пукты вал вӧл-вӧл чебересь цехъёс, ӟеч оборудование. Соку 10 мурт интые 3 мурт ужасал. Ваньзэ секыт ужъёсты механизмъёс быдэсъясалзы. Озьы кузь мертчан но тросгес поттысалмы.

2-4Со одӥг ласянь, нош милемды тужгес но зол сюлэмшугъяськытэ вылӥ кивалтӥсьёслэн та удысэз азинтон шоры учкемзы. Али ке но тодмо ӧвӧл на, туэ но, азьланьын но государство ласянь етӥн предприятиослы юрттэт луоз-а, уз-а.

Но милям суй-пыдмы куашкамтэ, азьланезлы осконмы бадӟым. Туэ гужем заводлы кылдэмез дырысен 75 ар тырме. Сое ми выль вормонъёсын пумиталом. Вань воргоронъёсмес ӟечкыласько 23-тӥ феврален но сӥзисько умой улон но юн тазалык.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 22 февраля, 2013 10:14