Мар уродзэ мон верай?

Удмурт Дунне
By Удмурт Дунне 26 февраля, 2013 11:42
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Мар уродзэ мон верай?

Н. Михайлова

Н. Михайлова

Улонысь учыр

Мон вордӥськи 1987-тӥ арын Можга карын. 4 арес дыръям семьяе Башкир музъем вылэ берытскиз (анае Татышлы ёросысь Вязовка гуртысь уго). 2004-тӥ арын школаме йылпумъяса, мон нош ик вуи вордӥськем палъёсам. Гожъяськыны яратӥсько вал бере, УдГУ-ысь журналистика факультетэ дышетскыны пыри. Сое 2009-тӥ арын йылпумъяй но Башкириын потӥсь «Ошмес» газетэ ужаны интыяськи. 2010-тӥ арын кузпалэ монэ вордӥськем гуртаз вайиз. Эрик пимес будэтӥськом. «Инвожо» ансамбльын эктӥсько-кырӟасько. Ваньмон дыръям вуриськыны яратӥсько.

Висьыны уси. Соин эмъюртэ мынытэк амал ӧз луы. Коридорын калыкез котьку сямен ик трос.
Черод басьтӥ. Пуксьыны инты ӧй шедьты. Сылӥсько ас поннам, бордгазетъёсты лыдӟисько. Адямиосты учкисько.
Азям куинь кышномуртъёс пуко (соосты 1-тӥ, 2-тӥ, 3-тӥ нылкышно шуыса нималом). Асьсэ понна маке споръясько. Бигер кылэз уг тодӥськы бере, уг валаськы, мар верасько…
Озьы сылыкум, мынам телефонэ жингыртӥз. Вераськисько, кышномуртъёсыз эскерисько. Соос, синъёссэс бадӟым-бадӟым карыса, споръяськонзэс вунэтыса, мон шоры учкыса пуко. Телефонме кысӥ но малпасько: «Мар уродзэ мон верай?! Номыр ӧй кадь. Соос мынэсьтым вераськемме валаны но кулэ ӧй вал кадь. Удмурт сямен гинэ вераськи уго…»

Кӧня ке дыр ортчыса, эшшо одӥг кышномурт черодмес кузёмытӥз. 1-тӥ кышномуртэз тодмаса, со вӧзы матэгес кариськиз. Вераськонзэс удмурт кылын мытӥзы. Улонзы, семьязы сярысь вераськизы. Кема ик дыр ӧз ортчы — черодамы пересь-пересь песянай чуртнаськиз. 2-тӥ кышномуртэз тодмаса, соин удмурт кылын ӟечбуръяськиз. Песянай сьӧры ик ӝужыт воргорон пыриз. Черодамы со берпуметӥез луиз. 3-тӥ кышномурт, сое тодмаса, вӧзаз ӧтиз. Удмурт кыл эмъюрт коридор кузя нош ик вӧлмиз. Тӥни малы кышномуртъёс мон шоры паймыса учкиллям, тодмо кылзэс кылӥллям уго…

Куинь кышномуртъёс, тодмоосынызы келяськыса, нош ик асьсэ куспазы вераськыны кутскизы. Мынам паймеме йырам уг тэры. Соос нош ик бигер сямен вераськонзэс азьланьтӥзы. Бен али гинэ ваньзы удмурт кылзэс поттӥзы ук! Мон валасько, нырысь, ог-огдэ тодытэк, бигер яке ӟуч кылын вераськод ик. Нош тодыса, малы одно ик мукет кылын вераськоно? Мар луоз, удмурт кылын вераськид ке? Эшшо ке берло тодмо луиз: та куинь кышномуртъёс одӥг гуртысь, удмурт гуртысь бускельёс вылэм шуыса…

Наталья Михайлова
shushynati.ru

Удмурт Дунне
By Удмурт Дунне 26 февраля, 2013 11:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<