Малпай лобаны — лобӟи

Удмурт Дунне
By Удмурт Дунне 22 февраля, 2013 11:37

Малпай лобаны — лобӟи

С. Орлов

С. Орлов

Пичи Пурга ёросысь Орлой гуртысь Социалистической Ужысь Геройлэн Михаил Орловлэн Сергей пиез, атаез сямен, улонзэ музъем ужен ӧз герӟа. Солэн пичи дырысеныз ик лётчик луэмез, инбамын лобамез потӥз. Малпанъёсыз быдэсмизы. Авиациысь полковник Сергей Орлов пусъемын «За военные заслуги» орденэн но трос ожгар медальёсын. Али улэ Москва дорысь Кубинка городокын. Ужа Внуково аэропортын.

— Сергей Михайлович, атайды ӧз пыкылы-а, музъем ужлэсь палэнскиды шуыса?

— Оло, ас понназ малпалляз ик, но меӵак со сярысь мыным ӧз вералля. Анае ялан пыкылӥз. Мон вордскемын 1956-тӥ арын. Дышетски Баграш-Бигра школаын, со милям гуртэн артэ. Пичи дыръям инсьӧры тубазы нырысетӥ космонавтъёс Юрий Гагарин, Герман Титов, Павел Попович, корабльысь космосэ нырысьсэ потаз Алексей Леонов. Авиация но космонавтика туж зол азинскизы соку. Вань газет-журналъёс гожъязы со сярысь. Сокугес ик телевизор басьтӥм, со дорысь ми ӧм ик кошкылэ ни. Куддыръя шудон сярысь вунэтылӥм. Ма, гурт калык но тунсыкъяськиз космосэн, отысь но, татысь но кылӥськод вал геройёс сярысь вераськонэз. Вот сыӵе дыръя ми, пичиос, лётчик луон сярысь малпаськылӥм. Мынам та малпанэ юнмаз 9-тӥ класс бӧрсьы. Вылаз ик, гуртоосмы бурдъязы на. Огез — ожгар лётчик, лейтенант, чебер формаен бертылӥз. Мукетыз граждан авиациын ужаз. Ми паймыса кылзылӥм мадемъёссэс. Лӧпкытъяз на та ласянь Ижевскысь аэроклуб но. Со Пероггуртын интыяськемын бере, милесьтым кыдёкын ӧвӧл. Ми выжез потӥськомы но, гурезе тубыса, учкыса улӥськом пичи самолётъёслэсь бергамзэс, лобамзэс. Шудыкумы, пудо возьмакумы, ялан адӟылӥськом вал корт бурдоосты.

Толалтэ но, куасэн гурезь йылэ тубыса, вожъяськыса учкылӥ. Отысь лобан мылкыд потӥз, дыр. Бадӟым классъёсын асме дасяны кутски. Спортэн пичи дырысеным ик эшъяськисько ни вал, дышетски но умой гинэ. Но 9-тӥ классысен нуналлы быдэ бызьылыны кутски: гужем пыдын, толалтэ куасэн. Турникын но ӝутскылӥ, бергай. Трос книга лыдӟи лётчикъёс, авиация сярысь.

— Авиацияя ожгар училищеос трос вал со вакытэ, тӥ азьвыл ик-а тодӥськоды ни вал кудаз дышетскыны?

— Школаын дышетскыкум, кудаз мынон сярысь ӧй ик малпаськылы. Но Пичи Пургаысь военкоматын тодо ни вал мылкыдъёсме, отын ик дэмлазы Саратов улосысь Балашов городысь авиаучилищеез. Соос ик валэктӥзы, кызьы заявление гожтоно. Отысь вуиз ӧтён. Со вал 1974-тӥ арын. Нырысь ик тазалыкъя комиссиез ортчи Пургалан, собере Ижевскын. Ожгар училищее пырисьёс понна комиссия вазьгес радъяське. Тазалыкезъя кин ке сое ӧз поты ке, мукет интые дышетскыны мед пыроз шуыса. Но мыным удалтӥз. Удмуртиын ваньзэ ортчеме бере Балашовысь училищеын эскеризы на. Отын но тазалыкед ярамон шуизы. Экзаменъёс сётӥ но пыри.

— Атайдылэн Социалистической Ужысь Герой луэмез пичияк ке но шӧдӥськиз-а, училищее пырыкуды?

— Ӧз. Ма, мон валаса но вуттэмын ӧй вал солэсь сыӵе нимзэ. Соку гинэ сётэмын вал ук. Но мукет курсантъёслэн атайёссы Геройёс но, генералъёс но вал. Но блатсы ӧз шӧдӥськы.
Балашов город туж вашкала, отысь авиаучилище но Россиын нырысетӥосыз пӧлысь луэ. Со Совето Союзлэсь 128 Геройзэ будэтӥз, куинез кык пол Герой луэмын. Соос пӧлын асьме улосчимы Евгений Кунгурцев но. Со сярысь мон рос-прос тодӥ ни дышетскыкум.

Училищеез 1978-тӥ арын йылпумъяй. Шеди Саратов улосысь Петровск городэ. Отын 10 ар лобай. Собере курсантъёсты дышетӥ. 1988-тӥ арын пыри Гагарин нимо Военно-воздушной академие. Дышетскеме бӧрсьы Ташкентын транспортъя полкен 4 ар кивалтӥ. 2 ар службаез нуи Ферганаын. 1994-тӥ арысен Москва дорысь Кубинка городокын служба ортчи. 2000-тӥ арын армиысь кошки. Али улӥськомы Кубинка городокын, со Москвалэсь 63 иськемын. Пенсие потэме бере нырысь отын-татын ужамъяськи, собере эшъёсы ӵектэмъя ужаны пыри Внуково аэропортэ. Шудтэм учыръёслэсь утиськонъя техникаез эскерись инженер луисько. Самолёт, музъем вылэ пуксьыкуз, тӥяське ке, ми ӝогак бушатыны кулэ полосаез. Медаз люкеты мукет самолётъёслы. Нош сыӵе учыръёс луыло.

— Маин герӟаськемын авиациын берло аръёсы тӥяськонъёслэн, кышкыт учыръёслэн йылэмзы?

— Совето Союз куашкам бере дышетонлэн ӟечлыкез лябомиз. Куронъёс чурытэсь ӧвӧл. Озьы ик техникаез кызьы кулэ, озьы уг эскеро.

— Тӥ армиын дыръя дунне вылын трос ожмаськонъёс мынӥзы: Афганистан, Эфиопия, Чечня но трос мукет «пӧсь» интыос. Асьтэос ожгар операциосы сюрылӥды-а?

— Кызьы вераны ик шугъяськоно: ӧз удалты-а шуод яке удалтӥз-а. 1991-тӥ-1992-тӥ аръёсы Ташкентын дыръям асьме войскоос Афганистанысь поттэмын ни вал. Милям выпускысьтымы ожъёсы пыриськемъёс пӧлысь бырыны шедемъёс ӧй вал. Нош пӧртэм авиакатастрофаосы дасъёсын сюрылэмын. Озьы кин ке сӧсырмыса-висьыса улонысь кошкиз ни. Тани Петровскын дышетэм курсантъёсы пӧлысь кыкез Чечняын быризы.

Лётчик эшъёсыныз

Лётчик эшъёсыныз

— Тӥляд кыӵе самолётъёс вал?

— Милям секытэсь но бадӟымесь самолётъёс вал. Соос ожгарчиосты но техникаез нуллӥзы. Мон лобай АН-24, Ан-26, АН-12 самолётъёсын. Соос конструкцизыя вылесь ӧй вал ни, но трос калыкез но бадӟым техникаез нуон-ваёнын мукетъёсыныз уд вошты. Учебной частьын лобай Чехословакиын лэсьтэм Л-29 самолётэн. Вал мукетъёсыз но. Полклэн командирез дыръям ӧжытгес инбаме ӝутскылӥ ни.

— Эшъёсты но тӥляд лётчикъёс, дыр?

— Тани Кизнерысь Аркадий Богомолов кык арлы мынэсьтым бадӟымгес. Азьло мынам экипажам валтӥсь штурман вал. Собере аслаз экипаженыз ни Анголаын кема лобаса улӥз. Отысь Москвае берытскиз но космонавтъёсты дышетонъя полклэн валтӥсь штурманэз луиз. Бадӟым самолётэн космонавтъёслы инбамын невесомость кылдытъяз. Милям соин кусыпъёсмы али но матынэсь. Кизнерысь ик Николай Розманов луиз дуннеысь тужгес бадӟым «Руслан» самолётъёсын полклэн нырысетӥ командирез. Мон Балашов училищее 1974-тӥ арын пыри ке, со та аре йылпумъяз сое. Макем шумпотон вал мыным, егит курсантлы, берпуметӥ курсысь асьме улосчимес пумитаны. Со мыным бурдъяськон луиз. Николай лобаз дунне вылысь дасо кунъёсы. Трос пол вал Афганистанын но мукет «пӧсь» интыосын. Сюлмыз лябӟиз, 1999-тӥ арын улонысь кошкиз.

— Тодӥськоды на, луоз, вашкала ӟуч кырӟанэз: «Анай, мон лётчиклы бызё, со трос коньдон басьтэ». Уждун тырмылӥз-а?

— Вал котькыӵе дыръёс. Нырысь умой улӥм, лобам понна но коньдон тырылӥзы. Тужгес но секыт вал 1990-тӥ аръёсы. Быдэс кунамы сямен ик, армиын но соку ужтэк кыльылӥзы. Уждун уг тыро, улон инты ӧвӧл, егит офицеръёс кошкылӥзы армиысь. Нош кытчы пырод?! 23-25 аресъем таза воргоронлы семьязэ сюдоно ук. Сӥленызы-виренызы армиен герӟаськемъёс, инбамтэк улыны быгатӥсьтэмъёс гинэ кылизы. Кошкемъёслэн но ваньмызлэн улонзы ӧз радъяськы. Специальностез воштон, тужгес но лётчиклэн уженыз люкиськон — со улондэ чутрак берыктон луэ. Ваньмыз сое уг чидало.

Али выльысь быдэс армилы, со пӧлын ик авиацилы, саклык висъяське. Ӝутско выль аэродромъёс, аналтэмъёссэ тупатъяны кутскизы. Но мон сямен тужгес но бадӟым вамыш — со лётчикъёслы тросгес лобаны луонлык сётон. Лобасьтэм лётчик — со лётчик ӧвӧл. Бурдъёстэк со сылӥсь трактор сямен сыномоз. Алигес шумпотӥ быдэс дуннелы тодмо «Стрижи» но «Русские витязи» группаослы чылкак выль СУ-30СМ но СУ-35 самолётъёс висъямзылы. Азьло соос лобазы СУ-27 но МИГ-29 истребительёсын.

— Армиез выльдон кемаласен мынэ ни, та пумысен олокыӵе но вераськонъёс, ӵектонъёс вань.

— Армиез быдэсак профессиональной карон сярысь поттылӥзы. Но со понна быдэс концепция кулэ. Нош кӧня коньдон жильдоно. Поттылӥзы, солдат, пе, дорызлы матын службазэ ортчытыны кулэ. Кызьы Румыниын, Венгриын солдатъёс арня службазэс нуо, арнязэ доразы шутэтско. Мон малпасько, сыӵе армия кулэ ӧвӧл. Асьме армия аслэсьтыз сямъёссэ возьыны кулэ. Зэм, условиосты ӟечомытоно. Шонер каро, котькуд солдат нуналлы быдэ душ улын пыласькыны мед быгатоз шуыса. Вераськон потылэ, политрук интые солдатлы кыӵе ке воспитатель кулэ шуыса. Улом, адӟом.

— Тӥляд егит дырысен малпанды быдэсмиз, нош космосэ лобӟон сярысь ӧд малпаськылэ-а?

— Кызьы верало, гогыедлэсь вылӥе уд тэтчы. Нырысь ик, туж юн тазалык луыны кулэ, йыр туж зол ужаны кулэ. Собере, сыӵе ужпум азяд пуктоно: мынам пӧрмоз, мон быгато. Мон тодӥсько вал аслэсьтым тазалыкме, соин ик сыӵе малпанъёсын ӧй улы.

— Тодмо веран вань: генераллэн кышноез луон понна солдатлы бызёно. Пӧртэм ик ӧй вал, дыр, улонэз полковниклэн кузпалызлэн но.

— Эля кузпалэным ми одӥг школаын дышетским. Со одӥг арлы пичигес. Озьы ик эшъяським, яратӥм. Нырысь Оля нылмы вордскиз. Со специальностезъя логопед. Бызиз. Али уло Одинцово городын. Миша пимы дышетскиз Москваысь автомобиль сюресъёсъя институтын. Солэн но аслаз семьяез ни. Соос но уло Одинцово городын.

Ортчемзэ чаклано ке, ми ӵошенгес ик тыршим улыны. Выль интыын мон огнам кема ик ӧй улылы. Ӵошен котькытын капчигес, пиналъёс но артэ будӥзы. Тани семьяен улӥськомы ни 33 ар но 3 толэзь. Пиналъёс дышетскытозязы 6-7 школа воштӥзы. Ми та пумысен тужгес но сюлмаськылӥм. Но военной городокын ваньмыз одӥг кадь уло бере, пиналъёс ӝог одӥг кыл шедьто, эшъясько вал. Удмуртие но ӵемгес вуылэм потэ вал, но служба вань служба. Кызьы куро вал, озьы ик отпуске поталляй. Но тыршим арлы быдэ бертылыны. Али но бертылӥськом, но шергес. Кылем гужем пумиськылӥм Баграш-Бигра школаез ӵош быдтэм эшъёсыным.

— Удмурт сямен семья куспады вераськиськоды-а?

— Вераськиськом. Анай йӧлын пыӵам кылэз вунэтод шат? Ми Эляен ӵем вераськиськом. Пиналъёс мар но со кылъёсты тодо: «ойдо сиськом ни», «кытын пуньые», «вай нянь». Нош Ульяна внучкае, ӵукна султыкуз, «Остэ, Инмаре» шуэ.

Дорлэсь мӧзмон аръёс ортчемъя уг сылмы. Тодмо интыосты вӧтын адӟылӥськод. Собере бертӥськод но паймиськод гуртлэн выльдӥськемезлы: выль коркаос, вольыт сюресъёс… Озьыен, калык умой улыны кутске.

Иван Аркашев

Удмурт Дунне
By Удмурт Дунне 22 февраля, 2013 11:37