Маин пӧртэмесь Ашальчи Оки но Агния Барто?

Удмурт Дунне
By Удмурт Дунне 1 февраля, 2013 09:30

Маин пӧртэмесь Ашальчи Оки но Агния Барто?

dugdylonni

«Кузебай Герд ульча» адресъя одӥг улон корка но пусъемын ӧвӧл.

Ижын туннэ 600-лэсь ятыр урамъёс. Вань пӧртэмъёсыз: кузьёсыз но вакчиосыз, тодмоосыз но тодмотэмъёсыз. Нош тодӥськоды-а кин соослы ним тыре?

Та юан уката бичатыны кутскиз та нуналъёсы Иж город администрация выль кылдӥсь урамъёслы нимъёсты шараям бере, 40 пала соос. Ваньзы интыяськемын луозы шоркар котырын кылдӥсь пичи районъёсын. Туннэ отын кыр бусыос на. Но ӝоген огез бӧрсьы мукетыз пуксьыны кутскозы коттеджъёс — музъем кесэгъёс вузамын ни нимаз адямиослы. Иж город администрациын оскыто: матысь дыре та пичи районъёс городэ пырозы — шоркармы паськыталоз.

Но тани маизлы уката лычсузе. Ваньмыз сямен урам нимъёс сӥземын тодмо адямиослы. Шуом, Юрий Никулинлы, Василий Шукшинлы, Фаина Раневскаялы, Людмила Зыкиналы. Эшшо? Эшшо — Корней Чуковскийлы, Исаак Левитанлы, Самуил Маршаклы… Вань-а дано удмурт адямиосты тодэ вайытӥсь урамъёс? Чиньыен лыдъямон. Кылсярысь, Геннадий Красильников, Флор Васильев нимо. Бен, таос борды озьы ик итэм потэ Зоя Богомоловалы но Олег Поскрёбышевлы сӥземъёссэ. Угось та дано адямиос трос лэсьтӥзы удмурт литератураез азинтон понна. Гожъясьёслэн урамъёссы одӥг интыын — Южное Орловское пичи районын — луозы.

Эшшо бугыръяськисько ӵектэм урам нимъёс пӧлын… Син шоры йӧтэ: Северное Орловское пичи районысь урамъёс герӟамын Быдӟым тыложе пыриськем геройёслэн нимъёсынызы. Ваньзы сямен соос Удмурт музъем вылын вордскемын! Шуом, Феодора Пушина, Нина Ульяненко, Виктор Пислегин, Фёдор Фалалеев, Василий Меркушев, Александр Девятьяров… Вань на тодмо артистъёсын, меценатъёсын, суредасьёсын герӟаськем ульча нимъёс. Но удмуртъёсыз таос пӧлын шедиллямтэ, лэся.
* * *
Кин но кызьы вазен урамъёслы ним тырылӥз — талэсь йылзэ-пумзэ шедьтыны капчи ӧвӧл ни. Нош туала вакытэ? Вазиським Иж город администрацие.

Город администрацилэн йырызлэн экономикая но инвестициосъя воштӥсез Дмитрий Космин шуэ:
— Клеверной, Вишнёвой но та выллем урам нимъёс, оло, шӧтэм уг кылӥсько, но соос лымшор улосъёслы, городъёслы тупалогес кадь. Нош тодмо адямиосты буре вайыса, урод ум лэсьтӥське, малпасько. Дано нимо урамын астэ но йӧногес возем потэ ук. Кылсярысь, улӥськод Агния Бартолэн ульчаяз. Зол кылӥське! Иське, сое утялтыса, шулдыртыса гинэ возем потыны кутскоз.

Но кызьы нимано урамез — та одӥг-кык адями бордысь гинэ уг поты, пе. Со понна кылдытэмын нимысьтыз комиссия. Отчы пыртэмын 15-лэсь ятыр нимо-дано адямиос, кылсярысь, история наукаосъя докторъёс, профессоръёс Евгений Шумилов но Галина Никитина, К. Герд нимо музейлэн директорез Раиса Мартынова, Удмуртиысь кун архивлэн кивалтӥсез Наталья Красильникова, Иж город Думаысь депутатъёс, администрациысь валтӥсь специалистъёс но мукетъёсыз.

— Зэм, комиссия гинэ урам нимъёс понна быдэсак кыл уг куты, — пусйиз Дмитрий Витальевич. — Шуом, берлооссэ ниман азьын одӥгаз сайтын юалляськон ортчытӥм. Кӧня ке урам нимъёсты дэмлам ик, но вань мылкыд карисьёс ас ӵектонъёссэс но вераны быгатӥзы. Трос мурт вазиськиз: егитъёс но мӧйыос, кивалтӥсьёс но огшоры ужасьёс…

Мар пӧрмиз — со пӧрмиз, шуо город администрациын. Шӧдске: быръем нимъёс сюлэмзыя.
* * *
Сюлэмъя, дыр. Но удмуртлыкез азинтон понна висись муртлэн юанэз одно кылдоз, малпасько: малы, шуом, Агния Бартолэн урамез Удмуртилэн шоркараз луыны кулэ, нош Ашальчи Окилэн — ӧвӧл?

Город администрациын тае погыльто куара сётӥсьёс вылэ ик. Кыӵе нимъёслы тросгес дурбасьтӥзы, соос ик быръемын, пе.

— Зэм, Ашальчи Окилэсь, Кедра Митрейлэсь нимъёссэс дэмласьёс вал, — уг ваты Д. Космин. — Но лыдэ басьтоно на, соосты вераны туж ик каньыл ӧвӧл, уката но удмурт луисьтэмъёслы…
Город администрациын оскытыны выро: удмурт калыклэн дано нылъёсызлэсь-пиосызлэсь нимъёссэс урамъёслы сётыны соос чик пумит ӧвӧл. Но, та сокем ик капчи уж ӧвӧл, пе. Одӥгъёссэ вераны секыт ке, мукетъёсыз воксё но тодэ уг лыкто. Кылсярысь, малы бырйымтэ удмурт артистъёслэн, суредасьёслэн, меценатъёслэн нимъёссы? Вань, дыр, пе, соос. Но удмуртъёслы сяна, ӟучъёслы но мукет калыкъёслы тодмо луэмъёсыз ӧз шеде.

Со понна Ижын куке-соку ик луыны кулэ Трокай Борисовлэн урамез! Зэм, ку — тодмо ӧвӧл.
— Ми малпам: Трокай Борисовлэсь нимзэ нуллӥсь ульча город пумын медаз луы, соин ик сое огдырлы «йырамы» кельтӥм, — ватса Дмитрий Витальевич. — Озьы шоркармы шорын выль урам кылдӥз ке, ним солы дась.

Озьы но луыны быгатоз, пе: Трокай Борисовлэсь нимзэ, оло, нуллыны кутскозы али Карл Либкнехт яке Свердлов урамъёс. Но ульчаослэсь нимъёссэс воштыны капчи ӧвӧл — отын улӥсьёс вань документъёссэс выльдоно луозы. Бен, город администрация ас малпанэзлэсь куштӥськыны уг ӧдъя, али вераськонъёс нуэ югдурез утисьёсын, паспортно-визовой службаен.
* * *
Тодӥськоды-а, Ижын вань сыӵе урамъёс, кудъёсаз одӥг корка но ӧвӧл! Смоленской, Цветочной, Маслюковлэн. Эшшо — Кузебай Гердлэн. Сыӵе урам вань шуыса, оло, воксё но тодӥсь ик ӧй луысал. Ярано, отчыозь мыно 14 номеро троллейбус но 27 номеро автобус — таос бордын гожтэмын берпуметӥ дугдыллонилэн нимыз.

Вуылӥм Кузебай Герд ураме, Строитель пичи районэ. Кияз фотоаппаратэн бызьылӥсь В. Беломорских ма борды ӝабырскыны пайме. Транспорт мынон-ветлон сюресэз шат возьматоно ни? Угось троллейбус котыртӥськон сюреслэн мыд-мыд палаз сылӥсь коркаослэн адрессы воксё мукет — Клубной.

Но сылэ транспорт дугдылонниын сиён-юонэн вуз карон пичи гинэ лавка. Отысь ӝажыос сьӧрын сылӥсь нылмурт вера адрессэ: Кузебай Герд урамысь транспорт дугдылон комплекс. Кин со Кузебай Герд — вераны уг быгаты. Тыро-пыдо валэктон сётыны уг йӧндыро басьяськисьёс но. Вӧзаз пичи нылпиен сылӥсь анай лӧптэ: мон туннэ гинэ нылпи садысь книгаосты лыдӟи, одӥгез сӥземын вал Кузебай Гердлы. Кин со — умой ӧй вала, но тодӥ, аслаз фамилиез Чайников вылэм!
* * *
Город администрациез, урамъёслы ним быръёнъёс бордын ужась комиссиез пыкылэме уг поты. Огез гинэ валантэм: кызьы Ашальчи Окилэсь нимзэ вераны секытгес, Агния Бартоен ӵошатыса? Нош таиныз туж соглаш: тодозы-а удмурт нимъёсты мукет калыкъёс, сӥлы карозы-а соосты — потэ асьме бордысь но.

Элина Кумачёва

Туспуктӥз Владимир Беломорских

Удмурт Дунне
By Удмурт Дунне 1 февраля, 2013 09:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<