Цивилизациез утёз… Лӧпшо Педунь

Удмурт Дунне
By Удмурт Дунне 19 февраля, 2013 10:43

Цивилизациез утёз… Лӧпшо Педунь

Т. Душенкова

Т. Душенкова

Лыдӟисьёс доры ӝоген вуоз паймымон книга — «Сказание про Лопшо Педуня и его друга Ивана Дурака». Сое гожтӥз Николай. Бехматов (Вольэг Иники). Таиз луэ ини солэн ньылетӥ книгаез.

Азьлогес потӥзы «Гордое племя» (1993), «Юсьёс но кучъёс» (1995), «Песня огненной реки» (2007) ужъёсыз. Но, жаляса верано, одӥгзэ но лыдӟись но, критика но ӧз синйылтэ. Мугез, оло, со бордын но — туж пичи тиражъёссы. «Юсьёс но кучъёс» романысь диалектной но вужмем лексика сярысь пичигес статьязэ Г. Кириллов печатлаз ик вал «Инвожо» журналын (1997, № 9).

Азьло гожтэмъёсыз кадь ик, Лӧпшо Педунь сярысез но фэнтези ӧрын гожтэмын (матын славян фэнтезилы). Писательлы туж ярало таӵе эскеронъёс, даурысь дауре выжонъёс. Алигес нылыным лыдӟим Б. Акунинлэсь «Детская книга» романзэ, отын Ластик (Эрастик) нимо герой хронодыраос пыр озьы ик даурысь дауре пота историез воштон вылысь.

Нырысетӥ чуръёсысен ик книга паймытэ: Лӧпшо Педунь Мара инмумыез (богиня) кулонзэ ӝегатыны тэльмыре. Нош малы со кулэ? Педуньлэн кыӵе муген улэп кылемез потэ? Мае воштоз, кыӵе янгышъёсты тупатоз? Н. Бехматовлэн геройёсыз мозмыто яке утё адями цивилизациез, нош вань сьӧлыкасьёсты кыл кутыто. Озьы ке но ӵемысь авторлэн таӵе бадӟым малпанъёсыз уг быдэсмо, вылаз ик, уг герӟасько геройёсызлэн ужъёсынызы, угось соос укыр векчиесь.

Книгалэн нимыз сказание шуэмын ке но, жанрезъя та книга нокызьы но сказание уг луы, соку книга мукет кылын гожтэмын луыны кулэ. Умойгес луысал похождение яке приключение шуыны (Я. Гашеклэн «Похождения бравого солдата Швейка…» романэз выллем).

Туала литература яратэ тӥяны пӧртэм жанръёслэсь кабъёссэс, весь маке но выльзэ утча-усьтэ. Кыӵе ке книга лыдӟыку, ӵемысь малпаськод: та сярысь кытын ке гожтэмын вал ини. Чуръёс пыр чильпырало классикъёсын кылдытэм сюжетъёс но образъёс.

Кылсярысь, «Сказаниысь…» «Сыр-бор» но «Охота за мздоимцами…» люкетъёсыз сатира амалэн гожтэмын, туж тупало М. Салтыков-Щедринлэн «История одного города» произведениезлы но куд-ог выжыкылъёсызлы. Мукет интыосыз матын луо И. Тургеневлэн «Записки охотника» («Охота за русалками» люкетэз), М. Булгаковлэн «Собачье сердце» («Охота за мздоимцами…» люкетэз), Л. Филатовлэн «Про Федота-стрельца, удалого молодца», Вен. Ерофеевлэн «Москва-Петушки» но В. Ерофеевлэн «Русская красавица» но мукет тодмо классикъёслэн гожъямъёссылы.

Воргорон но нылкышно кусыпъёсъя учконо ке, таиз книга гожтэмын пиосмуртэн пиосмурт лыдӟисьёслы. Угось кышномурт та выллем гожъямез палэнтоз, дыр. Кызьы гожтӥз Л. Толстой, воргоронъёслэн вань вераськонзы одӥг котырын: нырысь политика, собере валъёс (али машинаос), нош ваньмыз йылпумъяське кышномуртэн.

Автор геройёсызлы туж тодмо нимъёс быръе: Лӧпшо Педунь (Фёдор Иванович Лапшин) но Иван Дурак (Иван Иванович Иванов). Малы ке шуоно та нимъёс удмурт но ӟуч калыкъёслэсь дунневаланзэс возьмато. П. Захаровлэн «Как Лӧпшо Педунь рыжим стал» пьесаысьтыз герой кадь ик, Н. Бехматовлэн но Лӧпшо Педунез туж тунсыко пӧрмем. Удмурт калыклэн со сярысь мадёнъёсыз быдэсак пыртэмын произведение, соин ик та герой лыдӟисьлы матын, валамон потэ. Педунь кытӥяз туж гольтрес, акылес но луэ, соку ини сое Иван Дурак буйгатэ. Озьы геройёс огзэсты огзы бурдъяло но, зӥбломыто но.

Лӧпшо Педунь удмурт фольклоре бер пыриз. Калык сое туж визьмоен, шумпричен, шулдыръяськыны яратӥсен возьматэм. Капчиен быгатэ эрекчаны кӧттырмостэм адямиез, дышетэ возьыттэм, азьтэм муртэ. Со сярысь веранъёсты нырысьсэ шедьтэм Удмурт научно-исследовательской институтэн радъям фольклорной экспедиция.

Прототипез но тодмо — Фёдор Чирков, вордскиз 1875-тӥ арын Эгра ёросысь Левой Кушъя гуртын. Мадьверос (легенда) верамъя, Лӧпшо Педунь тодэ вылэм улонлэсь лушкем кылзэ (секрет). Вашкалаослэн мадемзыя, удмуртъёслэн вылэм Быдӟым книгазы. Дауръёс ортчыса, со книга ышем. Одӥгъёсыз шуӧ горд скал нюлэм, мукетъёсыз — вань бамъёсыз тӧлъя-буръя быдэс дуннее вӧлмиллям. Нош куинетӥосыз вералӧ Быдӟым вӧсясьлэн 12 дышетскисьёсыз со лушкем тодон-валанъёсты утьыса возё.

Огпол ӵыжы-выжыосыз дортӥ ветлыкуз, Лӧпшо Педунь шедьтэм, пе, со книгаысь одӥг бамзэ. Отын, пе, тазьы гожтэмын вал: «Номыре но сюлэмад эн пырты, ваньмыз шоры капчи мылкыдын учкы, соку тыныд удалтоз». Со дырысен Педуньлы котькыӵе уж сётске вылэм капчиен, нош ачиз котьку но задор, капчи мылкыдо, кулэ дыръяз ӟичы кадь кескич луэм.

Со сяна, Н. Бехматов Лӧпшо Педуньзэ азьпалзэ адӟись, сьӧд кужымъёслы оскись, дунневалась (мудрый) карем. Отын ик со туж умой верась-мадись, возьытлыкез но кӧберез валась. «Сказаниын…» Лӧпшо Педунь 111-тӥзэ ини музъем вылын улэ. Веднаськемлэсь, син уськытэмлэсь, пӧртэм шимес кужымъёслэсь утиськон вылысь Иван Дурак эшеныз ӵош олокыӵе но вӧсяськонъёс, тунаськонъёс ортчыто. Озьы соос ӵем гинэ трансэ но пырало, со пыр басьто-шедьто кулэ луись ивор. Со сяна, автор геройзэ кӧня ке авантюрист но каре (учке К. Куликовлэсь «Мятежный царедворец и дебёсский самозванец» статьязэ («Инвожо», 2006, № 8-9). Иван Дурак Лӧпшо Педуньлэн юрттӥсез луэ яке сое сьӧраз ортчемлэсь уте.

Н. Бехматов быгатыса возе мадемезлэсь биньгозызэ, куддыръя гинэ осконэн, Инмарен герӟаськем малпанъёсы кожылэ. Туж тунсыко малпамын сюжетэз. Нырысь люкетсэ лыдӟыса, тодэмед потэ ни, мар луоз мукетаз.

Ӟучен-а, удмуртэн-а гожтэ Н. Бехматов, но кылыз котьку секытгес пӧрме. Малы ке шуоно писатель туж яратэ сложной конструкциосты, придаточной предложениосты, пыртэ трос определениос, приложениос, синонимъёс, кутэ вашкала но вужмем лексикаез. Лӧпшо Педунь вераськоназ ӵем гинэ кутэ сленгез.

Оскисько, таиз книгаез одно ик шедьтоз аслэсьтыз лыдӟисьсэ.

Татьяна Душенкова,
филология наукаосъя кандидат

Удмурт Дунне
By Удмурт Дунне 19 февраля, 2013 10:43