Кысӥз 7 нуналскын

Удмурт Дунне
By Удмурт Дунне 8 февраля, 2013 13:16

Кысӥз 7 нуналскын

Нылпиос - чебер сяськаос

Нылпиос — чебер сяськаос

Асьмеос дышемын ни детдоме киргамъёс шоры чиньы пыртӥ учкыны?

Ирина (нимыз воштэмын) сузэреныз ӵош Ижысь нылпи юртэ сюриз кылем арын октябрь толэзе. Татчы сое интыязы огдырлы. Асьсэлэн юртазы тылпу гомамен, липеттэк кылизы уго. Анаез выль сэрег шедьтытозь, нылашез татын утёзы, шуизы. Но ӧз уте. Толэзь ортчыса, Ирина шӧдтэк шорысь кулӥз.

Ириналы 8 арес сяна ӧй вал. Нылпи юртлэн директорез Елена Лучихина верамъя, нылаш йырыз висе шуыса ӝожтӥськыны кутскиз 17-тӥ ноябре. Дыдыез соку ик возьматӥзы медсестралы, эмъюм сётӥзы. Вӧсез пумен буйгаз. Тэшкыли итӥськиз шудон дуннее выем эшъёсыз пӧлы. Зэм, шутэтскон нуналъёс ӵоже йырыз весь висьылӥз. Соин ик 19-тӥ ноябре Иринаез нуизы Ижысь 2 номеро больницае. Травматолог но ЛОР-специалист учкизы, снимок лэсьтӥзы, ялӥзы: пеляз тӧл шуккемын, сӥль быгытъёсыз воспаление луэмын. Эмъюмъёс ӵектэмын. Но таос воксё ӧз юрттэ.

Югдур пумен уката секытгес луиз. Нылаш ӝожтӥськыны кутскиз чыртыыз вылэ. Мар карыны паймыса, Иринаез хирурглы но возьматӥзы. Отӥяз воксё но нейрохирург дӥне нуизы. Берлоез доры «скороен» вуттӥзы ни сое 22-тӥ ноябре. Снимок лэсьтӥзы но Иринаез берен нылпи юртэ келязы. 5 больницаын эскерыса, одӥг интыын но вирзэ ӧз басьтэ! Одӥг больницаын но анализ лэсьтыны тодазы ӧз лыкты. Нош вир возьматысал: таидлэн мугораз воспаление. Ма, куд-огез малпаз но, дыр: нылпи юртысь ук таид, оло, алдаське но, котыраз тросгес мед бергалозы, со сярысь мед сюлмаськозы шуыса. Асьмеос малы ке дышемын ни детдоме киргамъёс шоры чиньы пыртӥ учкыны.

Куд-ог газетчиос гожъязы: Иринаез нылпи юртын ик учкись йӧнала ӧй вал, бӧрдэмзэ медаз кылэ ни шуыса, изоляторын но сое возизы. Елена Лучихина пыкиське: мон Ирина азьын чылкыт, юнме сьӧдмаськоды. Изоляторе интыяськом висись пиналъёсты. Ми ласянь солы юрттэт сётэмын, врачлы возьматэмын.

— Малпай: Иринаез ӝегатскытэк нуоно инфекционной больницае. 23-тӥ ноябре дыды воксё уродмиз, йырсазьзэ ыштыны кутскиз уго. Соин ик «скороез» ӧтимы. Эмъяськон юртын со кулӥз ни, — лулӟе кивалтӥсь.

***
Та ужез эскере Удмуртиысь Прокуратура. Прокурор Наталья Голованова шуэ:

— Вирзэ нылашлэсь одӥг интыын но эскериллямтэ. Пӧртэм специалистъёс пӧртэм пумо йылпумъянъёс лэсьтӥллям: грипп, миозит, йырыз шуккиськемын но мукет. Ваньмыз со сярысь пусъемын дыдылэн карточкаяз. Кулэмез пумысен заключениын но туннэ юан пусэн гожтэмын: сепсис (заражение крови, воспаление). Но туннэ эскеронъёс мыно на, малы нылашез рос-прос но дыраз ӧз эмъялэ шуыса.

Голованова ик шараяз: Ирина вордӥськемын Ижысь Ленин ёросын. Семья 2009-тӥ арысен учётэ кутэмын ёрос администрациысь опекая ёзын. Анайзы уго дугдылытэк тордэ. Нылъёссэ, юртъерзэ чакламтэысь ик, тылпу но коркаязы потӥз. Дыдыосты басьтӥзы Ижысь реабилитацияя центре. Татын ӝыны ар улэмзы бере ёрос администрация сюлмаськиз соосты нылпи юртэ интыяны.
Нылыз кулэм бере прокурор сое огпол гинэ ӧз утча ни, кабинетаз но ӧтчаз, кенешыны турттэ вал. Но анай огаз но пумиськонэ ӧз лыкты, нылзэ но ватыны ӧз ветлы.

Куд-ог врачъёс вераны выро: нылашлы юрттыны ӧй быгатысалзы ни. Сисьмыны кутскем быгытъёсты уго синмын гинэ куддыр адӟыны уг луы. Рос-прос анализ лэсьтыны кулэ. Вылаз ик, нылашлэн сотэк но тазалыкез ушъямон ӧй вал.

Удмуртиысь Общественной палата но басьтӥськиз та юзырес учырез эскерыны. Отысь ёзмуртъёс 5-тӥ феврале вуылӥзы нылпи юртэ. Таослы Елена Лучихина шараяз: 1 но ӝыны аресысен Ирина курадӟе токсокароз висёнэн. Кӧл выллем со. Но таин адямиос туж шер черлало. Со адями бордысь мукет адямиослы уг паласькы. Но нымыосыз вирен ӵош сюрыны быгато мугорлэн пӧртэм люкетъёсаз: лулсэре, тыэ, йырвиыме. Адямиез сюпсьыса улыны пӧрмыто соос 10 арозь. Лябӟем мугор сыӵе нымыослэсь ӵемысь кулэ.

Палатаысь Дышетонъя, наукая, культурая, таза улонъя комиссиен кивалтӥсь Алла Ерёменко шуэ:
— Туннэ кулэм нылаш пумысен кыӵе ке йылпумъянъёс лэсьтыны вазь на — рос-прос эскероно. Огзэ гинэ вераны луэ: нылпи юртын пичиослы ӟеч азинскон понна ваньмыз умой радъямын.

***
Президент Александр Волков та учыр бере тазалыкез утёнъя но дышетонъя но наукая министръёслы зол йӧттӥз. Тазалыкез утёнъя министрез Владимир Музловез косӥз вань нылпи юртъёстӥ ортчыны, специалистъёслэсь быгатонлыкъёссэс тодыны. Дышетонъя но наукая министрлы Андрей Кузнецовлы вазиськиз: лэсьтоно, пе, нылпи юртъёсты оптимизация пыр поттон пумысен план. Куд-ог нылпи юртъёсын уго пиналъёс но ӧжыт, йӧнала специалистъёс, воспитательёс но уг тырмо. Детдомын пиналъёсты возён, специалистъёслы уждун тырон государстволы дуно усе. Умойгес луоз, со коньдонэз висъяса сиротаез семьяе басьтэмъёслы. Кин асьмелы люкетэ сыӵе анай-атайёслы республикалэн бюджетысьтыз уждун висъяны, со пумысен ужъя книжкаязы но гожтыны? Нокин. Озьы шуиз Александр Волков.

Елена Сараматова
Туспуктэмез: infoservis-ld-narod.ru

Удмурт Дунне
By Удмурт Дунне 8 февраля, 2013 13:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<