Кужымзэ сётэ инкуазь

Удмурт Дунне
By Удмурт Дунне Февраль 14, 2013 14:57

Кужымзэ сётэ инкуазь

«Ӟечбур, нюлэс!» проектэн вормизы 1-тӥ классын дышетскисьёс Казанцева Ксения, Соколов Никита, Вострикова Ангелина (Дэри ёросысь Шор Постол школа)

«Ӟечбур, нюлэс!» проектэн вормизы 1-тӥ классын дышетскисьёс Казанцева Ксения, Соколов Никита, Вострикова Ангелина (Дэри ёросысь Шор Постол школа)

2013-тӥ ар асьме кунын ялэмын Котырысь улосэз утён арен. Талы сӥзьыса, Дэри ёросысь Шор Постол школаямы пӧртэм ужрадъёс ортчизы ини.

Толшор толэзе экологической отрядмылэн 10 ар тырмонэзлы сӥзем пумиськон ортчиз. Та дыр куспын отчы 130 мында нылпиос пыриськизы ни. Экология отрядлэн кивалтӥсез В. Д. Кабанова верамъя, тросэз соос полысь улонзэс герӟазы гурт удысэн, эмъянэн но дышетонэн. Куное вуылӥзы азьвыл аръёсы экологической отрядлэн ужаз пыриськем нылпиос: МГУ-ысь студентка Алёна Кабанова, Ижысь социально-педагогической колледжын дышетскисьёс Лариса Кузнецова но Анжелика Карпачёва. Соос огымысь кадь веразы, инкуазез утёнъя ужрадъёсы пыриськемзы юрттэ улоназы но дышетсконын.

Пинал экологъёслэн ужамзы адӟиське школа котырын но, гуртын но. Школа азбарысь альпийской гурезьмы котькуд ар пӧртэм тусо луэ. Туэ экологъёс Вылӥ Постол гуртэ чебер шутэтскон инты лэсьтӥзы. Парк гурт калыклэн яратоно интызылы пӧрмиз ини. Экологической отрядэ ветлэм нылпиос асьсэос но инкуазез гажаса будо, мукет пиналъёсыз но йыртэмамлэсь ало. Шумпотымон соиз: арысь аре нылпиослы юрттӥськыны басьтӥське гурт калык. Писпу мерттыны, кенер кутыны, тымет лэсьтыны, сяська кизьыны пиналъёсын ӵош анай-атайёс но пото.

Нош алигес школаямы ортчиз пинал тодосчиослэн научно-практической конференцизы. Дорамы куное ӧтчамы Татарстанысь Агрыз ёросысь Сарсак-Омга лицейысь но Пичи Пурга ёросысь Улӥ Посьтол (Иваново-Самарск) школаысь нылпиосты. Та школаосын ми кусып тупатӥм вал ини кылем сӥзьыл, «Шундыберган» фестивальын. 4 секциосын асьсэлэн ужъёсынызы тодматӥзы 30-лэсь трос нылпиос.

Тужгес трос тодосчиос покчи классъёс пӧлын вал. Пинал тодосчиослэн огазеяськонзылэн кивалтӥсезлэн В. Д. Кабановалэн верамезъя, та уж борды пичиысен кутскыса, нылпи дыше ассэ калык азьын возьыны, пӧртэм ужпумъёсты капчиен сэрттыны-пертчыны, чебер вераськыны. Валентина Даниловна 1-тӥ классын «Дышетскиськом проект лэсьтыны» кружок нуэ. Пиналъёс мылысь-кыдысь пырисько та уже.

Пусйыны кулэ, 5 ужъёслэн кивалтӥсьёссы вал анай-атайёс. 1-тӥ классын дышетскисьлы Наташа Комаровалы но мумиз юрттӥськиз. Проектэз нимаськиз «Анаелы сяська».

— Мыным туж тунсыко вал та ужен вырыны, — вера Наташалэн анаез, библиотекаын ужась Н. А. Комарова — Проект бордын быдэс семьяенымы тыршим. Нылмес рос-прос вераськыны дышетӥм. Котькуд нунал гуртамы репетициос лэсьтылӥм. Ужмы тунсыкогес мед адӟиськоз шуыса, ачим юромо та конференцилы компьютерен презентация лэсьтыны дышетски. 6-тӥ толсуре тюльпанлэсь сугонзэ мерттӥм. Арнялы быдэ эскерим, кӧня сантиметрлы будӥз сяськамы. Наташамы ву кисьтаз, сюйзэ небӟытъяз, пӧртэм ватсэтъёсын сюдӥз. Конференция нуналлы тюльпанмы 13 сантиметр будэмын вал ини. Проектъя сяська 8-тӥ Мартлы усьтӥськыны кулэ.

Конференциын нылпиос тодон-валанзэс будэтӥзы, ог-огенызы тодматскизы-эшъяськизы. Кылсярысь, ми, шор постолъёс, туж синмаським Улӥ Посьтолысь нылпиослэн удмурт кылын чылкыт вераськемзылы. Нош Сарсак-Омгаысь Дима Гаврилов паймытӥз малпанъёссэ возьдаськытэк, рос-прос вераменыз.

Таӵе пумиськонъёс туж кулэ: ас пуртыямы гинэ пӧзьыса, уд азинскы, — вера В. Д. Кабанова — куинез ик школаос пӧртэмесь темаос бырйиллям. Кылсярысь, туж тунсыко потыса кылзӥським Иван Богдановлэсь «Тазьы будӥз адями» (Сарсак-Омга), Ксения Селезнёвалэсь но Полина Востриковалэсь «Юртто-а ӟеч дышетскыны гурт пудо-животъёс?» (Шор Постол), Максим Маркитоновлэсь «Кристаллэз будэтон» (Сарсак-Омга), Ксения Ефремовалэсь «Пинал куно» ужъёссэс.

Покчи классъёсын дышетскисьёс пӧлын вормисе потӥз Диана Данилова «Анаелы сяська» проектэныз (Шор Постол). 1-тӥ инты сётэмын Сарсак-Омга лицейысь Сергей Фёдоровлы «Пыдын ветлӥсьёсын герӟаськем сюрес вылын кышкытлыкъёс» ужез понна. Шор классъёсын котькинлэсь усто вал Анна Чернова «Мынам семьяям ӟечезлы дышетон» уженыз (Улӥ Посьтол). Бадӟымъёс пӧлысь висъяськизы Снигирёва но Петухова Еленаослэн«Каблук нуллон шӧдӥське-а адямилэн тазалыкез вылын?» ужзы (Шор Постол).

Ужрад йылпумъяськиз. Пинал тодосчиосыз витё выль юанъёс но ужпумъёс.

Владислав Кабанов
Дэри ёрос,
Шор Постол школа

Удмурт Дунне
By Удмурт Дунне Февраль 14, 2013 14:57
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<