Кунян чуньы уг луы

Удмурт Дунне
By Удмурт Дунне 18 февраля, 2013 16:01

«Удмурт дунне» газетлэн «Герд» приложениысьтыз (12-тӥ тулыспалэ потэм номерысь) Елена Сараматовалэсь «Пытсан — усьтон ӧвӧл» материалзэ лыдӟыса, ӧй чида, киям ручка кутытэк. Мынам йырам уг тэро Чутыр школалэн директорезлэн верамъёсыз. Соин ик малпанъёсме Галина Малыхлы верано кариськи газетты пыр.

Мон тӥледыз, Галина Малых, Сталин вакытысь адямиен адӟисько. Кӧня визьмо удмуртъёсты соку быдтӥзы. Нош тӥ кин сыӵе, быдэ вуымтэ удмуртъёсты «ыбылыны»? Кин тӥледлы сыӵе право сётӥз? Туж трос-а кожаськоды школаын дышетскись пиналлэн удмурт асваланлыкез? Мырдэм но кызьы гинэ вуэ ай со асьме доры. 1990-тӥ арозь, Удмуртиын улыса, ӧм тодылэ асьмелэсь удмурт луэммес. Малы меда Татарстанысь школаосазы арняяз 6 час бигер кылын урокъёс нуо. Нош удмурт гуртысь удмурт пиналъёсты анай кылзэс вунэтыны косо тракторист но вуриськись луон понна.

Малы меда удмуртъёслы одно музъем ужась гинэ луоно? Тракторист но вуриськись луон понна кык-куинь толэзь дышетскем тырме. Нош нылпилэсь удмурт луон правозэ быдэс улонэзлы таласькоды. Мед луоз удмурт, мед туж умой тодоз ӟучсэ но мед вуоз вылӥ кивалтӥсёзь, удмурт президентозь. Кызьы тӥ, 20 ар директор луыса, удмурт школаын ужаса, удмурт пиналлэсь удмурт луэмзэ пыд улады лёгаськоды? Удмурт — со национальность ук, вир ук со, удмурт вир. Сое воштыны луэ шат?

Паймисько та удмуртъёслы, малы анай кыл кулэ шуэмзылы. Со, пе, гурт пумозь гинэ. Сыӵе юан кылдыны ик кулэ ӧвӧл. Дунне вылэ удмурт вирын вордӥськид бере, озьыен, сое воштыны уг луы ни. Инкуазен сётэм лулэз кызьы мукет карод? Скаллэсь кунян вордӥське ке, кӧня ке будыса, со чуньы уг луы ук, уг гырдалля, скал сямен ик бӧксэ. Нош удмуртъёс! Тӥ кадь адямиослы луыса, соос возьдаськыны кутско анай кылзылэсь, уг дунъяло сое, уг валало солэсь чеберзэ но кулэлыксэ.

Вожъяськисько лымшор палась лыктэм сьӧд калыклы. Соос уг возьдасько. Ӟуч но кариськыны уг туртто, удмурт но луэмзы уг поты. Нош ми, удмуртъёс, асьме вордскем музъем выламы улыса, ас киынымы удмурт нылпиосмес ӟуч кариськом, озьыен удмуртэз быдтӥськом.

Елена Лаврентьева,
Алнаш ёросысь Кузёбай школаысь дышетӥсь.

Удмурт Дунне
By Удмурт Дунне 18 февраля, 2013 16:01