Куазьлы уг сётско

Удмурт Дунне
By Удмурт Дунне Февраль 8, 2013 10:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Куазьлы уг сётско

П. Князев

П. Князев

Кез ёросын 15 гурт предприятие, 26 фермер-крестьян хозяйство, 2 етӥн поттон завод. Ёрос администрация ӧжыт уг лэсьты кадръёс будэтон, эштосъёсты ӟеч кивалтӥсьёсын но специалистъёсын юнматон вылысь.

Кылем арез кызьы йылпумъямзы но азьланезлы кыӵе малпанъёсын улэмзы пумысен кенешим Кез ёрослэн йырыныз Пётр Князевен.

Пётр Князев вордскиз Шарканын 1961-тӥ арын. Ижысь гурт удысъя институтэз йылпумъяз 1983-тӥ арын. Инженер-электриклэсь дипломзэ басьтыса, ужаны лыктӥз бускель Кез ёросысь «Дружба» колхозэ. 1993-тӥ арын Пётр Евгеньевичез хозяйстволы тӧрое бырйизы. 13 ар ӵоже эштосэз азьмынӥсьёс радэ поттӥз. Нош 2006-тӥ арын П. Князев быдэс ёросэз ас вылаз басьтӥз. Миым сое кыкетӥзэ бырйизы ёрос йыре.

П. Князев пусъемын Удмурт Республикалэн Данъян грамотаеныз, «Удмуртиысь гурт удысысь дано ужась» нимын.

— Пётр Евгеньевич, котькинлы тодмо, вашкала дырысен гурт калыклэн сюдӥсез-вордӥсез луэ музъем. Туннэ вераськонмес но со бордысен кутском.

— Гыроно-кизёно музъеммы 45 сюрс 616 гектар люкаське. Берло дыре та удыслы бадӟым саклык висъяськом. Гурт хозяйствоос узырмо гырон-кизён но аран техникаен, пумен ӟечгес ужало гербицидъёсын но пестицидъёсын. Бусыосмы каллен-каллен жаг турынъёслэсь мозмытско-чылкытало. Но лэсьтоноэз трос ай. Тужгес но секыт быдтыны пырей турынэз. Озьы ке но миым ёросын котькуд гектарысь шорлыдын 12 центнер пала ю тысь кутсамы. Куазь зол люкетӥз, кизьыны вазь потӥм но, зоръёс кутскизы, июне но кизим на. Хозяйствоос пӧлысь тужгес ӟеч, ваньмызлы адӟем карымон ужало «Гулейшур» СПК-ысь нянь будэтӥсьёс. Эштослэн кузёез Владимир Дорофеев музъем ужанэз умоятонлы нимысьтыз инты висъя. Озьы хозяйство миым гектарлы быдэ 20 центнер ёрос ю тысь люказ но ёросын вормисе потӥз. Та хозяйство сьӧры уйисько «Искра», «Родник», «Большевик», «Дружба» но «Степаненки» эштосъёс. Гурт удысэз азинтон понна трос ужано на кызьы ке ёрос администрацилы, озьы ик гурт хозяйствоослэн кивалтӥсьёссылы но специалистъёслы.

Гуртоосмы огсыр ӟеч ужаны арлы быдэ мар ке но люкетэ. Куд-ог интыосын мултэс зоре, нош куд-огаз юосты, турынъёсты пӧсь шунды куасьтэ. Пересьёс котьку шуо вал, куазьлэн, пе, аслаз законъёсыз. Вазен соосты котьку чакласа улӥзы но куазьлэн тодметъёсызъя тулыс тодо ни вал, туэ кыӵе юос тросгес кизёно, кыӵезэ ичигес. Озьы крестьян калык няньтэк ӧз кыльылы. Милям но куазез учкисьёс-эскерисьёс вань. Соослэсь верамъёссэс лыдэ басьтӥськом но ужамы кутӥськом.

— Нош мар верасалды пудо вордон сярысь? Берло дыре азинске-а со?

— Таиз но удысмы огинтыяз уг сылы. Миым куазь урод ке но улӥз, гурт хозяйствоосмы толлы тырмыт пудо сиён дасяны быгатӥзы, быдэс ёросъя одӥг пудо йырлы быдэ 22 центнер пала сиён дасямын. Юосмы лябесь вал бере, пудоослы ичигес сюре фураж. Озьы ке но берло 6 ар ӵоже арлы быдэ 1 сюрс тонналэсь ятыр йӧл люкаськомы. Тани миым ваньзэ 25 сюрс 125 тонна йӧл кыскимы, нош скаллы быдэ 4 сюрс 437 килограмм луиз, нош 7-ез эштосмы 5 сюрсэз ортчиз. Соос пӧлы пыро «Дружба», «Искра», «Гулейшур», «Маяк», «Степаненки», «Большевик» СПК-ос но «Родник» ООО. Кивалтӥсьёссы Ольга Ворончиха, Пётр Емельянов, Владимир Дорофеев, Нина Максимова, Фёдор Першин, Нина Белослудцева но Любовь Иванова.

Туала вакытэ одӥг хозяйство но, пудо вордытэк, быдэс ар ӵоже коньдон поттыны уг быгаты. Соин ик ми та удысэз азинтон сярысь вис карытэк сюлмаськиськом. Выльдӥськом фермаосмес, выль гидъёс ӝутӥськом, туала ӟеч оборудование басьтӥськом но пудо утисьёслэсь ужан условиоссэс умоятӥськом. Ваньмыз со сӥлен-йӧлэн берытске. Ум вунэтӥське пудо йырмес йылэтон сярысь. Миым, валля арен ӵошатыса, 300 йырлы таза сюро пудомес будэтӥм, нош скалъёслэн лыдзы кӧня ке кулэсмиз. Та ужпум бордын али но, азьланьын но уката золгес ужалом. Нош сӥлья таӵе югдур: 2011-тӥ арын 2 сюрс 290 тонна вузам ке, миым со лыдпус 4 сюрс 280 тонна луиз, яке, валля арын сярысь, ог 2 сюрс тонналы уногес поттэмын. Туж умой со.

— Пётр Евгеньевич, азьланезлы кыӵе малпанъёсын улӥськоды?

— Туэ котькуд гектарысь шорлыдын 15 центнер ю тысь басьтыны чакласьком. Со быдэстымон ужпум. Агротехникалэсь куронъёссэ быдэсъяса, ӟеч дасям муэ таза кидыс согид ке, ватсаса ӧжытсэ 3-4 центнер урожай басьтыны луонлыкъёс вань. Собере туэ уногес лудъёсы поттомы кыед но минерал сылалъёс, бусыосты жаг турынлэсь ӟечгес утёмы но кизёмы таза сортовой кидыс.
Пудо вордонэз азинтонын но бадӟымесь малпанъёсмы. Матысь дыре йӧл поттонмес 30 сюрс тоннаозь вуттыны чакласькомы, нош скаллы быдэ 5 сюрс килограмм кыскыны. Таиз но ужпум быдэстонтэм ӧвӧл, луонлыкъёсмы трос ай. Берло дыре шӧдскымон саклык висъяськом пудо выжыез умоятонлы но мукетызлы.

Оглом азьланезлы юнэсь осконъёсмы. Но соин ӵош ик сюлэмшугъяськытӥсез но ичи ӧвӧл. Тани али милям 6 хозяйстволы агроном кулэ. Озьы ик уг тырмо зоотехникъёс, инженеръёс, электрикъёс но музон специалистъёс. Капчи ӧвӧл югдур механизаторъёс ласянь. Арлы быдэ пумиськылӥськомы Ижысь гурт удысъя кун академиысь выпускникъёсын. Музон ёросъёсын сямен ик, егит семьяослы ми но котькыӵе юрттэт сётӥськом, улон инты висъяськом, но пайдаез уг шӧдӥськы ай, егитъёслэн гуртын ужамзы уг поты.

Геннадий Романов
Туспуктӥз Владимир Беломорских

Удмурт Дунне
By Удмурт Дунне Февраль 8, 2013 10:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<