Кӧльы кадь юн, ошмес кадь дун

Удмурт Дунне
By Удмурт Дунне 22 февраля, 2013 09:31

Кӧльы кадь юн, ошмес кадь дун

М. Крылов

М. Крылов

Михаил Крылов — Алнаш ёросысь «Молодая гвардия» колхоз» СХК-лэн кивалтӥсез. Удмуртиысь гурт удысысь дано ужась, ёрос кенешлэн депутатэз. Пусъемын «За заслуги перед Отечеством» орденлэн кыкетӥ степенё медаленыз. 26-тӥ феврале Михаил Александровичлы 60 арес тырме, но пенсионеръёслэн радазы со кематэк пырыны уг малпа на.

— Мон ужатэк асме кытчы донгыны уг вала, — шуэ со. — Куинетӥ классысен колхозын. Азьвыл дыръя пиналысен юрттӥськыны ветлӥськом вал уго. Ма, сое лыдъятэк но, рос-прос ужам стаже 42 ар ни.

— Сомында ужатозь, гурт удысын тыршисьёс пӧлын тӥледыз тодӥсьтэмез ӧвӧл ни, дыр. Трос-а куно витиськоды?

— Луысал ке, вордскем нуналъёсты чик ӧй пусйысал. Сомында дасяськонэз-сюлмаськонэз, нош мар понна? Укыр ушъямез мон уг яратӥськы. Наградаосын мон обидемын ӧвӧл. Но калык монэ уз вала, дыр, сыӵе сям-йылол вань бере, амал ӧвӧл котырес лыдпусэз пусйытэк.

— Ас поннады кыӵе ке йылпумъянъёс лэсьтӥськоды-а?

— Мылкыд весь пинал ай, оскем уг поты, сомында арес ни шуыса. Мынам пинал дыръям улон вакытъёсы сизьым арен люкисько вал: нырысь одӥг ужын, собере мукетаз, нош берло 24 ар ӵоже пуксетскемын тани. Зэмзэ вераса, со гожтэмезъя ик луыны быгатысал, мон асме гинэ тодысал ке… Но куке тон калык пӧлын улӥськод, соослэсь но тунсыкъёссэс лыдэ басьтытэк ӧвӧл. Огпол гинэ ӧй вал вылэ ӝутскыны ӵектонъёс, мон дасяськи но ни вал, но шӧдӥ, вожвылъяськисьёслэн мылкыдзы бадӟымгес… Чигнаны но быгатыны кулэ.

— Михаил Александрович, ӟеч предъёс ӧжыт ӧвӧл, но ваньзэс уг ярато. Мар понна тӥледыз гуртоосты гажало?

— Мон уг тодӥськы, ярато-а, уг-а, пӧлазы котькыӵеез вань, дыр, но котьку тыршисько гуртысь, колхозысь улон югдурез тупатон понна. Сётэм кылме одно быдэстыны тыршисько, со — закон! Огпол ке но ӧд быдэсты — выльысь уз оске ни. Гажасько вань сюлмысьтызы тыршисьёсты. Уг яратӥськы азьтэмъёсты, токма керетӥсьёсты. Усто ужасьёсмес тыршиськом пусйылыны, сӥ-дан карыны.

Мон председателе пукси ӵапак кризис вакытэ. 90-тӥ аръёсты уд вунэты. Тӥни сыӵе дыръя кызьы ке но колхозэз утёно вал. Тросэз куашказы-быризы, ми возиським. Калык ӧз аналскы, чидаз-ужаз. Вал милям но ӝыны арен но уждун ӝегатэммы, уксё интые пызь но сётъяллям. Но пудомес утьыса, шуг югдурысь потыны быгатӥм. Гурт хозяйство возиське сӥль-йӧл вылын, соин ми али но ялан пудо йырмес будэтыны тыршиськом.

— Шаерамы трос ик ӧвӧл гуртооссэс эркиясь хозяйствоос. Тӥ, совето вакытъёсы сямен, гуртысь социальной удысэз ас вылады басьтӥськоды.

— Кызьы сотэк. Поселениямы 1100 улӥсез, со пӧлысь 240-эз гинэ хозяйствоын тырше. Нош ваньмы артэ улӥськом ук, огезлы ӟеч лэсьтод, мукетсэ висъяса кельтод шат? Быгатэммыя юрттӥськом, адямилэн уката ӟеч тыршыны мылкыдыз мед луоз. Нылпи сад, школа колхозлэн ке но ӧвӧл, отчы асьме ужасьёслэн нылпиоссы ветло ук.

Инвентарь басьтӥськом, костюмъёс вуртытӥськом. Нырысетӥ классэ мынӥсьёслы но школазэс йылпумъясьёслы пичильтык коньдон сётӥськом. Колхозын тыршем арлыдоослы праздникъёсы одно кузьым лэсьтӥськом. Выль аре тани ческыт пуйы дасям, пиналъёс кадь шумпотӥзы. Нош 1-тӥ октябре люкаськом ваньзэс, татысь Пересьёслэн юртазы улӥсьёсты но — одӥг муртлэн но кӧтыз ӝож медаз кыльы. Али тани кутским черк ӝутыны, но туж дуно усёно кадь, ог 20 миллион кулэ луоз, кызьы ке Инмар луонлык мед сётоз ни кутскем ужмес йылаз-пумаз вуттыны. Коньдонэн, транспортэн юрттӥськиськом кузпалъяськисьёслы, корка пуктӥсьёслы. Но берло аръёсы озьы но егитъёслэн колхозын ужамзы уг поты. Аслым ачим йыр висён шедьтӥ на — ӟеч карисько шуыса, колхоз юртэз чылкак дунтэк сётӥм пересьёслы юрт усьтон понна, мукетаз вуриськон цех усьтӥм. Огез но соос ми борды уг йӧтыло. Я, милемлы копейказы кулэ ӧвӧл, но ужасьёсы отчы пегӟизы — отын шуныт, югыт ук, фермае сямен вазь султоно ӧвӧл. Колхозын но бен условиос урод ӧвӧл: гаражмы эстӥське, шуныт туалетэз, душез, шутэтскон, чай юон интыез вань. Фермаын азьло кадь секыт ужъёс ӧвӧл ни, нокин ведра-фляга уг ӝутъя, озьы ке но ужасьёслы ёрмиськом тани. Специалистъёсмы но арлыдоесь ни. Уж юась вань бен, но институтэз али гинэ быдтэмъёс соку ик 25 сюрс манет уждун куро. Укыргес кадь — ужатэк номыр уг усьы, нырысь возьмат астэ. Милям ведь гуртамы ваньмыз вань: асфальт, газ, ву пыртэмын, уж, школа. Тыршы гинэ. Уждунмы туж трос ӧвӧл, шоро-куспоез 11 сюрс манет котыр (ёросъя — 8 сюрс), но со вӧзы юрттӥськиськом на пудо сиёнэн.

— Тӥ дорын ортчылыны кутскиз Трокай нимо фестиваль, табере со элькун ужрадлы пӧрмиз. Тодӥсько, тазэ но колхоз ас вылаз басьтэ.

— Трокай — милям гинэ ӧвӧл, быдэс удмурт калыклэн данъяськонэз, соин ик со ми понна бадӟым дан. Татын вераськонэз ик ӧвӧл коньдон сярысь. Т. Борисов милям музъеммы вылын вордӥськемын, соин ик, фестиваль республикае выжиз ке но, ми сое асьме дорын но ортчытъямысь ум дугдэ. Калыклы, тужгес но будӥсь пиналъёслы, таӵе праздникъёс одно кулэ. Мар вылын соос дышозы асьсэ калыксылэсь сям-йылолъёссэ утьыны?

Али тани коркась корка ветлонъёс но ӧвӧл ни. Кин ке шуоз, юон дыр ӧжыт луиз. Нош мон малпасько, со гуртоослы тупаса-эшъяськыса улыны юрттылӥз, ваньмыз мыло-кыдоесь вал, погратозяз нокин ӧз юылы, ӝӧк пуктэмлэсь нокин ӧз куанермы. Ми яратӥськом праздникъёсты, паськыт пусйиськом гурт удысын ужасьлэсь нуналзэ, Гырон быдтонэз. Друж шур дурын 14 пурты ӝук пӧзьтӥськом, шулдыръяськиськом. Котьку озьы тыршом, удмуртъёс медаз пазьгиське.

— Удмурт луэмды улонады юрттӥз-а, люкетылӥз-а?

— Мон со сярысь ноку ӧй малпаськылы. Мон — удмурт, мукет луэме ӧз потылы. Юрттӥз, дыр. Асьмелы уго вирын пыӵамын ужаны яратон, одно быдэстыны тыршон сям. Анай-атай но весь ужлы дышетӥзы. Мон атайлэн пытьыетӥз мынэмын — со милям озьы ик колхоз пред вал. Удмурт шуыса, асме мултэс кепырась ӧй шуысал — ултӥянлы уг сётскиськы. Армиын дыръям, огпол строен мыныкум, Киров улосысь пияш мыным пелям кеськиз: пыдъёстэ, пе, вылэгес ӝутка, вотяк. Мон как берытскыса мыжги, эсьма, пограз. Со дырысен ӧз ултӥялля ни. Сыӵегес учыр луиз на предын дыръям ни. Эшъёсын чорыганы мынӥм, ӧжытак шӧмъям, вераськон потӥз. Маке кутскиз огез удмуртъёс сярысь урод вераны. Мынам сыӵе учыръёсы одӥг амал… Урод кылъёссэ ӧй кылылы ни.

— Лэсьтэм ужъёсты пӧлысь кудӥз ке понна возьдаськиськоды-а?

— Вань сыӵе учыръёс. Партсекретарьын ужакум, мар но ӧз дауртӥськылы. Тани али тодам лыктэ: чын удмурт адямиос пӧлын кенешез ӟуч кылын нуыны косо вал, али возьдаськысал солэсь. Коркась корка ветлыса, кумышка пӧзьтон арбериосты бичаны косылӥзы. Мон пырисько, нош кенакъёс йыбыртъяны дась. Шуисько, кыӵе ке вуж гумыдэс вае но, гожто, таламын шуыса. Косо вал котькуд хозяйстволэсь государстволы шуыса картош бичаны. Адямиослэн асьсэлэн но ӧжыт, котькызьы басьты. Партия решать каре вал, сётоно-а, ӧвӧл-а турын — лапас улъёстӥзы учкыса ветлӥськом вал. Трос люкамын ке — ӧвӧл сётоно, ӧжыт ке — юрттоно.

— Сюлмаськисез аслаз тыбырызлы оске, азьтэмез капчияк юрттэт басьтэ…

— Шонерзэ вераса, сыӵе учкон али ке но вань. Куддыр со ласянь аслым визьтэм-а, шудтэм-а, мултэс честной-а потӥсько. Тани со кризис дыръя ик кӧня хозяйствоос миллионъёсын долге пыризы. Кузёос ӧз сюлмаське — ум пӧрмытӥське, пе. Ми вырим, ваньзэ лыдъяса-чотаса-шыръяса, ужаны, асьме кужымен ваньзэ вормим, нош аналскемъёсты банкрот каризы но вань долгъёссэс списать каризы. Кытын зэмлык? Озьы ик сюриськиз, выль техника басьтыку. Ми нырысьёсыз пӧлын басьтӥм немец комбайн. Дуно маке. Соку шуизы, субсидия сётом. Собере малпанзы воштӥськиз: импортноезлы сыӵе капчиятон чакламын ӧвӧл. Бӧрысьгес нош ик сыӵе учыр! Асьме кужымен кутским йӧл гумыосты вошъяны. Ми бӧрсьы кутскемъёслы чисто коньдонэн юрттэт сётӥзы.

— Со понна тӥ — вормись.

— Адӟон сыӵе, дыр. Ми котьку ужалом, азинском, паймытъялом, но потэ вылэм, мукетъёс но дасьсэ возьмаса медаз пуке.

— Нош вал-а кивал-тӥсьёслэн маке понна йӧттэмзы?

— Ма, кызьы сотэк. Тодӥсько на, огаре колорад бӧчы 10 гектар картошмес сиыса быдтӥз, соку соин рос-прос нюръяськон амалъёс ӧй вал на, ма, агрономе но пинал вал, мазэ-созэ валаса ӧз вутты, дыр. Выговор сётӥзы.
Ма, али но тани я прокуратура, я эшшо кин ке кышкатъя. Гужем эштосамы нылпиос кирпич сузязы. Одӥгез понна одӥг манет дун пуктӥм, куд-огез нуналаз 500 манет поттэ вал. Но чагиськиллям — уг, яра, пе, 14 аресозь пиналъёсты ужатыны. Мон шуисько, 14-ёзь эркияса будэтӥд ке, со бӧрсьы ужась уд кары ни. Но мар мынам вераме, закон сыӵе…

— Тӥ удалтэм воргорон — куинь пи будэтӥды, куинь корка пуктӥды, Асанэ сад мерттӥды. Мае эшшо ӧд быдэстэ на?

— Нимысьтыз ужрадъёс малпаса, уг пукиськы, кызьы ке ачиз огсыр пӧрме. Ӟеч кышно сюриз. Зояе бӧрсьысь бӧрсе куинь пи вордӥз. Ай ми соосын Свердловскетӥ но кыстаським ук. 1987-тӥ арын партшколае дышетскыны ыстӥзы. Семьяез кельтэм ӧз поты, сьӧрам нуи. Али егитъёс кышкало шуг-секытъёслэсь. Юнме. Соос кыдато гинэ. Тани ми куинь пиналэн общежитиын улӥм. Мон, партсекретарьын ужам мурт, дышетскон вискам дворникын но сторожын ужай. Йырам но ӧз лыктылы возьдаськыны. Зэм, ӧжытгес изиськод, но ма карод. Ма, мон пиосме но, куать часын сайкатыса, стадионэ бызьылыны поттӥсько вал. Со понна ужасесь, кылзӥськисесь будӥзы. Аслым кадь соослы оскисько. Вить нунокмы ни, соин кузпалэным огнамы кылимы ке но, ум мӧзмиське, ӵем кунояны вуыло. Покчиосыз дорамы кыльыса но уло.

— Михаил Александрович, тӥ сабырлы, визьмо воргорон, ваньмыз тӥляд пӧрме. Нош кыӵе ке тырмымтэды вань-а?

— Уг быгатӥськы адямиез укыр ушъяны, чебер кылъёсы уг тырмо, вожзэс медаз вае. Азьвыл малпасько вал, адямилы грамота гожтӥд, премия сётӥд — мар кулэ на кадь. Но кытӥ-отӥ кылӥсько — туж востэм гинэ, пе, ӟечкылаз. Кызьы ке дышетсконо талы.

— Асьтэлы шуныт кыл уг кельшы шат?

— Возьдаськисько. Кылемаз юбилеям тани колхоз правление ошак кузьмаз. Мыным со укыр бадӟым кузьым потӥз. Пушкы ик тыриз. Соин туэ номыр медаз дауртэ вал. Мыным умой, куке ачим маке ӟечсэ лэсьтыны быгатӥсько. Нош калык сое вала-дунъя ке, мон понна со туж бадӟым шумпотон. Мынам выжые татысь, татын уло ӵыжы-выжыосы, пиналъёсы, соин ик ӟеч пытьы кельтэм потэ. Гуртамы будэмъёс медаз возьдаське вордскем интызылэсь, мед данъяськозы соин, котькуд кунозы азьын мактаськыны мед быгатозы — вот кыӵе ӟеч ми улӥськом!

Зинаида Рябинина
Туспуктӥз Владимир Беломорских

Удмурт Дунне
By Удмурт Дунне 22 февраля, 2013 09:31