Кӧчылӥсь

Удмурт Дунне
By Удмурт Дунне 15 февраля, 2013 16:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кӧчылӥсь

А. Баталов

А. Баталов

Эгра ёросысь Порвай гуртын 1970-тӥ арын вордӥськем Алексей Баталовез сюлэме пырись кырӟанъёсыз но серемес юморескаосыз понна гуртоос ки йылазы нуллыны дасесь. Али со ӧдъя аслаз кырӟанъёсыныз диск поттыны.

— Йӧспӧртэм адями, лэся, мон, — веранзэ мытэ Алексей Михайлович. — Лишной керпотӥсь ӧй луысал ке, кин тодэ, кытчыозь ӝутӥськысал ни. Нош туннэ — огшоры воргорон, нокыӵе звание но мынам ӧвӧл. Ма, Ижысь крезьгуръя училищеез гинэ но ӧй йылпумъя — армие кошки. Пермь улосысь полковой оркестрын шудӥ. Отын быгатонлыкме волятӥ ни.

Анаелы тау шуыны кулэ: со монэ крезьгур дуннее кыскиз. Муми Дэбесысь педучилищеез йылпумъямын, крезьгурлы дышетӥсь. Дорамы баян кылдэм бере со монэ синучкон азе пуктӥз, дышетском, пе, «Севастопольский вальсэз» шудыны. Мугор Инмар сётымтэ. Баянэ сьӧрысь мырдэм адскисько, нош бирдыоссэ зӥбылоно. Синучкон ик «возьматӥз» мыным нотаосты. Со дырысен баянэн люконтэм эшъёс луимы. Баянтэк мон кемалась бырысал ни, вылды. Асме кыӵе но удысын ӧй эскеры уго — огаз но рос-прос бурмыны ӧй пишмы.

Милициын гинэ но ужай. Огпол тодмое доры ёрос милицилэн ёзаз шунскыны пыри. Ойдо, пе, ми дӥне ужаны. Армиысь вуэм пиосты соку шумпотыса кутылӥзы асьсэ радазы. Мон отын кык ар но 8 толэзь сяна ӧй чида. Быдэс даурдэ милицилы сӥзён понна зӧк куо луоно, дыр. Нош мон ваньзэ сюлэм пыртӥм поттӥсько. Эшшо ке справедливость шуонэз утчаны кутскисько. Нош зэмлыкез яратӥсьёсты асьсэзыз ик янгыш каро вылэм.

Солань-талань кыстаськемелы шумпотоно, дыр. Сотэк сюрысал меда районысьтымы «Светлый путь» газетлэн редакцияз, басьтӥськысал меда кылбуран борды? Шофёре куриськи. Валерий Ерёменко корреспондентлэн гожъяськон кылызлы туж синмаськылӥ, статьяоссэ мылысь-кыдысь лыдӟылӥ. Огпол малпай: мынам но йырам олокыӵе но учыръёс бергало, оскалто ай соосты бумага вылэ кисьтыса. Редакторлы чуръёсме сётӥ. Соиз ушъяз, азьланьтыны косӥз. Табере кырӟанъёсыным диск поттыны малпасько. Юморескаосы но книга тыр люкасько ни.

— Серемес учыръёсты асьтэ вылысь гожъяськоды-а?

— Озьыгес луэ. Огпол эмъяськон юртэ «скороен» нуизы. Куалекъясько, вераськеме уг луы. Врач юа: кызьы нимыд, кӧня арес? Ымдуръёсы куалекъяло. Кыл пумемын. Кылӥськӧ спирография лэсьтозы. Мар шуэм со? Мон больницалэсь туж кышкась. Ачим кадь висисьёс сипыртӧ ныр пыртӥд, пе, гумы лэзёзы но ӝуштэ учкозы. Нош мынам ныры егит дыръям тӥямын. Эк, куалекъясько ни. Но нырам ӧз пыралэ — ымтӥм шокатӥзы. Но кыӵе ӟеч юмореска пӧрмиз!

Кырӟаны но, вераны но рос-прос уг быгатӥськы кадь, но калык кылзэ-учке. Озьы «Егит мылкыд» коллективеным районмес котыръясько. 2007-тӥ арын ми отын 12 кузя вал. Но кышноос бызё, нылпи ваё но кошко. Али 4 кузя кылимы: 3 воргорон но 1 нылкышно. Эктонъёсты но, ичи кылеменымы, возьматъямысь дугдӥмы ни. Машинае, концертъёстӥ ветлыса, воксё сузмиз ке, Чутыр культурая юртлэсь но палэнэ потыны быгатомы на меда — шуг вераны. Клубмы нош…

— Дворец кадь ик чебер…

— Залэ пуксе ай. Акустикаез уродэн номыр верам уг кылӥськы. Югдурез умоятон понна штора ошиськомы. Пуконъёс но, солань-талань кыскаса, тӥяськыса быро ни. Спортзалэз но залэз одӥг липет улэ каръяны уг яра. Оптимизациез котькызьы мед ушъялозы, но культураез гажамысь дугдыны уг яра. Сыӵе залэн сэрен калыклэн одӥг концертад но лыктэмез уз поты.

— Асьтэос кыӵе композиторъёсты гажаськоды?

— Удмуртиысь культура удысысь дано ужасез Николай Постниковез туж гажасько вал. Солэн сюлэм пуштросэз мынамезлы матын. Нош туала эстрадаысь номыр но лулэ уг пыӵа. Удмуртэн я ӟучен кырӟало — бум-бум-бум вазе — одӥг улӥ куараос, кылъёссы гинэ пӧртэмесь. Али ваньмызлэн ассэ композитор шуэмез потэ. Мынам асме озьы шуыны ымы но уг пыры. Огзэ тодӥськӧ веран кылъёс шедьтэмысь дугдӥсько ке, шӧдонъёсме-адӟонъёсме крезьгурен возьматыны ӧдъясько. Нырысь гурез кылдэ, собере ни чуръёссэ гожтӥсько. Уже вазь ик лыктӥсько шыпытын малпаськон, баянэн шудон понна.

Мон кочевник (кӧчылӥсь) кадь. Я выллань, я уллань вамыштӥсько. Кудпала улон шонтоз, сопала кариськисько. 2011-тӥ арын шонер ветлӥ. Али вормонъёсы но вань кадь, но лул шӧдонэным одӥг тубатлы, валля арен ӵошатыса, улынгес мон. Сюлэм интыяз ӧвӧл. Уже шоры учкыса, мылкыды лапак пуксе. Котькуд ужрадысь отчёт куро. Ваньмыз со — бумага уж ук. Гожъяськыса пуконъяд, нунал но ортче, клубез уйлы пытсан дыр вуиз шуисез но сюре. Нош творчествоен вырись муртэ часъёс вискы эгесаны луэ шат? 8 часысен 16 часозь гинэ со творчествоен уг выры! Кӧлыкуз но куддыръя ма но со адӟе.

Но гуртъёстӥ концертъёсын шонтӥмы ке, улонанам маиз ке воштӥськоз, дыр, ай. Удмуртиысь калык артисткалы Алевтина Медведевалы кырӟанъёсме келяй. Яразы, пе. Со чуръёсме гурланы кутскиз ке, воксё но бурдъясько.

— Галина Семёновна кузпалды уг бурдъя шат?

— О-о-о сотэк мон олокытчы питрасал ни! Визьмылэн, творчествоелэн 70 процентэз — со кышное. Зэм, кырӟанъёсме сцена вылысен кылэ — кепырасько соку ик возьматыны. Но котьку юрттэ мыным, ваньзэ вала. Клубамы ик художник-оформитель луыса ужа. Мон туж шумпотӥсько, сое ас улонам пумитай на шуыса. Нырысетӥ семьяе ӧз пӧрмы уго. Артистъёс кык пол кышнояськытэк уг быгато, лэся. Но Галинае мыным 2 пинал но вайиз на, мынэсьтым ачиз бадӟымгес ке но. Со туж быгатэ ассэ возьыны: ачизъя ваньзэ берыктэ ке но, мон асме кузёен шӧдӥсько семьяямы. Со сяна, мар кулэ на воргоронлы?

Елена Сараматова
Туспуктӥз Владимир Беломорских

Шудо егит дырмы

Кылъёсыз но крезьгурез А. Баталовлэн

batalov

Та шудо егит дырмы —
Жингырес дыръёс.
Та дыре сюлэмамы
Туж трос малпанъёс.

Припев:
Задоресь егит пиос,
Етӥзэсь нылъёс,
Шумпотон пинал мылкыд,
Шудбуро вакыт.

Котьку мед таӵе луоз
Та лемлет дырмы,
Азьлане ялан нуоз
Гажан мылкыдмы.

Припев.

Котьку мед сяськаялоз
Пинал даурмы,
Шаерамы мед вӧлмоз
Шулдыр кырӟанмы.

Припев.

Дор палъёсы

Кылъёсыз но крезьгурез А. Баталовлэн

batalov1

Пӧртэм шаеръёсы мон вуылӥ,
Трос адӟылӥ чебер  интыосты.
Озьы ке но сюлмам  мон возьылӥ
Аслым дуно потӥсь  дор палъёсты.

Отын но асьмелэн кадь ик  шулдыр,
Отын но жильырто ошмес синъёс.
Сюлэм нош малы ке  мӧзме куддыр,
Тодэ лыкто кызьпу арамаос.

Пӧртэм кырӟан гуръёс но  чузъясько.
Весь ваньмызлэн  аслаз чеберлыкез.
Нош мон понна  котьку луоз дуно
Вордскем шаерелэн ас крезьгурез.

Удмурт Дунне
By Удмурт Дунне 15 февраля, 2013 16:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<