Кисыриос — улон сюресъёс

Удмурт Дунне
By Удмурт Дунне 1 февраля, 2013 10:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кисыриос — улон сюресъёс

А. Загребина

А. Загребина

29-тӥ январе 90 арессэ пусйиз Якшур-Бӧдья ёрослэн дано адямиез Анна Егоровна Загребина. Со 55 ар ужамын дышетон удысын, пӧлысьтыз 42 арзэ — Якшур-Бӧдья черкогуртысь школаын. Вань улонзэ сӥзиз покчи классъёсты дышетонлы, национальной школаослы ӟуч кылын «Букварь» кылдытӥз. Пусъемын Ленин орденэн, «СССР-ысь калыкез дышетонъя отличник», «РСФСР-ысь дано дышетӥсь» нимъёсын.

Вордскемын Анна Егоровна Якшур-Бӧдья ёросысь Коџогуртын (Кургальск), будэмын Верхний Чур гуртын (али со быремын). Семьяязы 6 пинал вал, Анна — витетӥез. Нуныяськыса улонэз трос адӟемын ӧвӧл, пичиысен ик гурт ужез быдэсъяз, 7 аресысен бадӟымъёсын артэ етӥн ишкиз.
Верхний Чур гуртысь пиналъёс дышетскизы Кекоранысь школаын. Та гуртысь пиналъёс туж сабырлыесь вылӥллям, школае ветлыкузы, ог-огзэс витиллям, угось мур нюк вамен потоно но шайвыл дортӥ ортчоно вал. Грамотаез тодӥсьтэм атаез Анна нылзэ кужмысь сямен Якшур-Бӧдьялась педучилищее дышетскыны ыстэм.

— Кылзӥськытэк ӧйлась, бубилэн кылыз туж чурыт вал, — егит дырзэ тодаз вае Анна Егоровна. — Дышетскыны пыремелэсь азьло экзаменъёс сётӥмы. Гурт пиналъёс понна ӟуч кыл секытэн сётскиз, возьытэ усёнтэм вылысь книгаос тросгес лыдӟылӥ. Педучилищеын дышетскыкум, нырысь араз патерын улӥ, отӥяз общежитиын но инты шедиз. Якшур-Бӧдья ёросысь сяна, пӧламы вал Шаркан но Эгра ёросъёсысь лыктэмъёс. Кемалась ик ӧвӧл эшъёсме тодам вайи. Классамы кызё пала егитъёс вал, нылъёсын-пиосын ӝыныё. Бордам Завалина пукиз, азьпалам Тронина, мышкам Широбоков. Табере пӧлысьтымы тросэз ӧвӧл ни.

Анналэн семьяез бадӟым вал ке но, егит студентка чебер дӥсяськыны быгатылӥз. Пыдкук но дӥськут басьтыны юрттӥз муш вордэмзы. Одӥг полаз Бӧдьяла нуэм сюсьсэ Анна басмаен воштӥз, ачиз ик солэсь чебер костюм вуриз. Со вакытэ, пе, костюмъёс туж вылӥ дунъяськизы.
Училищеез йылпумъямез бере егит дышетӥсез ужаны ыстӥллям вордскем палъёсаз — Кекоранэ.

Озьы со быдэс улонзэ покчиосын герӟаз. Гуртэ ужаны ыстэм егит дышетӥсьёс ог-огзы доры куное ветлӥллям, ӝытъёсы шудыны поталлям. Ваньмон дыръязы конькиен я дӧдьыен нискылаллям, пыдын бызьылӥллям. Но шулдыр улонзэс куспетӥ кариз Быдӟым ож. Секыт вал улонзы дышетӥсьёслэн, тужгес шуген сётскылӥз кышкатскем нылпиосты буйгатон.

— Быдэс гуртэн фронтлы юрттӥськимы, ӝытъёсы пыдвыл-пӧзь керттӥмы, шуныт дӥсь вуримы но ваньзэ оже келямы, — веранзэ азьланьтэ Анна Загребина. — Кема ик дыр ӧз ортчы, гуртэ нырысетӥ похоронкаос вуыны кутскизы. Секыт ивор троссэ кынартэм кельтылӥз. Школаын ужасьёсты сельсоветын дежурить карыны косылӥзы. Гуртэ вуэм иворъёсты кулэ адресъя нуллоно вал. Кинлы ке похоронка, кинлы ке повестка. Вазь тулысысен бер сӥзьылозь бусыын тыршимы. Калыкен ӵош арамы, кутсамы. Гуртысь вань воргоронъёсты, дышетӥсьёсмес но, оже басьтӥзы. Коля выны войнае ветлӥз. Туж шумпотӥмы луло бертэмезлы, пуля сое ӧз шедьты шуыса.

Быдӟым оже кошкем дышетӥсьёс пӧлын вал Анна Егоровналэн нырысетӥ яратонэз. Вуж туспуктэмъёсыз пӧлын туннэ ке но лач-лач возе Кекоран школаысь дышетӥсьлэсь Сергей Широбоковлэсь туспуктэмзэ. Сергей Георгиевич, Ленинград пала вуыса, бырыны шедиз. Со аръёсыз тодаз вайыса, Анна Егоровна возьматэ «За доблестный труд в Великой Отечественной войне 1941-1945 гг.» медальзэ — вань данъетъёс пӧлысь со тужгес дуноез, пе.

— Война йылпумъяськемын ӧй вал на, мынам урокам лыктӥз Якшур-Бӧдья педучилищелэн директорез Дмитрий Иванович Баженов, — дышетон аръёссэ тодаз вае Анна Егоровна. — Одӥг урокам гинэ пукоз кожай, нош со быдэс нунал монэ кылзӥз. Урокъёс йылпумъяськем бере гинэ шараяськиз лыктэмезлэн мугез: педучилище борды усьтӥллям базовой начальной школа, отчы ужаны ӧтиз, малпаськыны кӧня ке час сётӥз. Со нуналэ ик котырме нуыны шуыса вал висъязы. Шыкысам ма но со поныса, Бӧдьяла кошки, отын нимаз улон сэрег висъязы.

Бӧдьяла ужаны лыктэмез берегес ик егит дышетӥсь семья кылдытӥз. Малпамтэ шорысь вамыш лэсьтэмезлы эшъёсыз ик паймизы. Токма шорысь ӧз сюлмаське. кӧня ке ар ортчыса, Анна Егоровна нош ик эшъёссэ паймытӥз: кык пиналъёсме огнам будэто шуиз. Юн сямо кышномурт котькытчы вуттӥськиз: аслэсьтыз пиналъёссэ учкыны, школаын ужаны, Ижысь пединститутын заочно амалэн тодон-валан люканы. Луонлыкез вал на литературая урокъёсты нуыны, но Анна Егоровна покчи классъёслэсь ӧз ӵыды.

Гурт нылпиосын умой ужамзэ синйылтӥзы УАССР-ысь просвещениея министерствоын ужасьёс. Ӵапак соос ик вазиськизы Анна Загребиналы, национальной школаослы выль «Букварь» кылдытон борды басьтӥськыны курыса.

— Кема малпаськи, оскем ныпъетэз нуыны быгато-а шуыса, — веранзэ азьланьтэ кышномурт. — Сюлмаськонэ сотэк но тырмыт: яратоно уже, нылпиосы. Со аръёсты тодам вайисько ке, паймисько дӥсьтӥсь луэмелы. Книга кылдытон бордын ужасьёс трос пол Москвае дышетскыны ӧтчазы. «Букварьмы» чаль гинэ потоз кожамы вал, документъёсын куинь ар пала бызьылоно луиз.

Анна Егоровналэн тыршемез токма ӧз луы. 1958-тӥ арын удмурт школаос понна выль «Букварь» 50 сюрс тиражен печатламын вал. Удмурт дышетӥсьлэсь ужзэ дуннеысь адӟытонъёсын возьматӥзы. Чебер книгалы кулэяськисьёслэн лыдзы ялан йылӥз, соин ик 4 ар ортчыса, сое выльысь печатлазы на. Гуртысь дышетӥсьлэсь сюлмо тыршемзэ вылӥ наградаосын пусйизы. 37 аресъем егит муртлы сётӥзы РСФСР-ысь дано дышетӥсь ним. Эшшо ӝыны ар ортчыса, Якшур-Бӧдьялась удмурт кышномуртэ быдэс Союзысь дышетӥсьёслэн съездазы ӧтизы, татысен мӧля вылаз Ленин орден бырттӥзы. Та вормонъёсыныз гинэ Анна Егоровна ӧз буйгатскы. Ялан печатласькиз наукая журналъёсын.

Ужез трос вал ке но, нылпиоссэ ноку ӧз вунэтъя. Та вакытэ Анна Егоровналэн 2 внукез, 3 правнукез. Жаляса верано, одӥгзы но песянайзылэн сюрестӥз ӧз вамыштэ. Уг ӵыды кышномурт Георгий Андреевич внукезлэсь. Со Якшур-Бӧдья ёрос администрациысь коньдон ужпумъёсъя управлениын ужа. Со, пе, сюдӥсе-вордӥсе. Шумпотэ солэн нылпиосызлы.

29-тӥ январе Анна Егоровнаез 90 арес тырмонэныз ӟечкыланы ёросысь кивалтӥсьёс, артэ улӥсь эшъёсыз, дышетӥсьёс вуылӥзы. Тазалыкез вылэ Анна Егоровна уг ӝожтӥськы. Кызьы ачиз шуэ, анайзылэн 12 пиналэз вылэм, нош улыны кылдӥз ӝыныезлы — тужгес кужмоосызлы гинэ. Озьы бере, шудоосыз но юнъёсыз пӧлы шедемын Анна Егоровна но.

— Одӥг пол Иже ветлыкум, кыӵе ке туно-пелё нерге, киме учкыса, 90 аресозь улод шуиз, — тодаз вае кышномурт: — Со дырысен трос аръёс ортчизы, пайми, верам кылъёсыз зэмазы шуыса. Мон шудо, шуныт коркан улӥсько, пиналъёсы сюдо, дӥсяло. Ма кулэ на солэсь трос? Улонын монэ чурыт куронъёс пуктӥсь дышетӥсь шуылӥзы ке но, пиналъёсты яратытэк, сомында ар ӧй чидасал, дыр, школаын ужаны.

Шуо: тазалык потэ адями бордысь. Анна Егоровна арлыдыз шоры уг учкы. Нунал куспын корка пушкытӥз ӧжытсэ 500 вамыш ортче, нимысьтыз упражнениос лэсьтэ. Ӝыны арлы одӥг пол ке но эмъясьёсты дораз ӧтча. Быгатэмезъя ачиз ик сиён пӧзьтыны йӧндыре. Огезлэсь гинэ керпотэ, кисыриосы, пе, укыр трос луизы…

Валентина Емельянова

Туспуктӥз Владимир Беломорских

Удмурт Дунне
By Удмурт Дунне 1 февраля, 2013 10:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<