Физика но лирика

Удмурт Дунне
By Удмурт Дунне 19 февраля, 2013 08:53

Физика но лирика

Л. Васильев книгалы сӥзем  25-тӥ калыккуспо ярмаркаын

Л. Васильев книгалы сӥзем 25-тӥ калыккуспо ярмаркаын

Ижысь техникая кун университетын дас арлэсь кема ужа ини литературалы сӥзем «Прикосновение» огазеяськон (ЛИТО). Соин кивалтэ инженер, кылбурчи но техника наукаосъя кандидат Леонид Васильев.

Та клубе ветло шоркарысьтымы инженеръёс, ИжГТУ-ысь дышетӥсьёс, заводын тыршисьёс. Арлыдзыя но, улон шоры учкемзыя но та адямиос ог-огзылэсь висъясько, но соосты огазея литературалы синмаськон.

Паймытэ на мукетыз но: «Прикосновение» котькуд ар авторъёсызлэн кылбуръёсынызы но вакчи веросъёсынызы сборник поттэ. Кылем арын 13-тӥ бичетсы потӥз ини, февраль толэзе улонэз адӟоз 14-тӥ книгазы. Огазеяськонэн кивалтӥсьлэн Леонид Васильевлэн верамезъя, берло кык арзэ соос араз кык сборник поттазы ини. Озьыен, туала улонын но кылбуртэк уг луы, озьыен, физика но лирика ог-огзылы уг люкето, мурт уг луо.

— Творчествоен тунсыкъяськись, ӟеч сюлэмо, возьытлыкез валась, мукетъёссэ гажаны быгатӥсь адямиосты шумпотыса дорамы пумитаськом. Ми ум лыдъялэ арлыддэс, ум юалэ кыӵе Инмарлы вӧсяськемдэс, политика шоры учконъёстэс. Кенешомы творчество но литература сярысь, — шуэ Леонид Васильев.

ЛИТО-ын вань редакторъёслэн кенешсы. Со решение кутэ, кинлэн гожъямъёсыз пырозы сборнике. Пуштросэз сяна, кылбур гожъянлэн куронъёсыз чакламын мед луозы. Уго берло дыре кинлэн мылыз потэ, вань-а талантэз, ӧвӧл-а, гожъяськыны но книга поттаны кутскизы. Соин ик ми ёзчиосмылэсь ужъёссэс ваньмы ӵош эскериськом, куд-огъёссэ тупатыны косӥськом. Котькуд книгамы — коллективной уж, шуэ Л. Васильев.

Арлыдо но егит гожъясьёслэсь чуръёссэс эскеро кылэз валась адямиос, Писательёслэн огазеяськонзылэн ёзчиосыз. Кылсярысь, ЛИТО кемалась ини валче тырше филологен Наталья Сурнинаен — РСФСР-ысь просвещение удысысь отличникен, со 30 ар ужамын ӟуч кылъя но литературая дышетӥсь луыса, Николай Мрыхинэн — Россиысь Писательёслэн огазеяськонзылэн ёзчиеныз, Вера Красовскаяен — Удмуртиысь Писательёслэн огазеяськонзылэн ёзчиеныз но трос мукетъёсыныз.

Кылем арын потэм «Верить и любить» сборниказы тодмо авторъёс но вань, выль нимъёс но пумисько. Книгае шедемын Удмуртиысь но Россиысь усточиос. Кылсярысь, нырысьсэ кылбуръёсыз потӥзы ИжГТУ-ысь инженерлэн Алексей Вдовинлэн, запасысь капитанлэн Сергей Садчиковлэн. Нош УдГУ-эз йылпумъям художник Маргарита Калякина али улэ Иваново областьысь Пучеж городын. ЛИТО-ен эшъяськиз, 7-тӥ книгаез дасяку, табере котькудаз сямен ужъёссэ ысъя. Кылем арын нырысьсэ печатласькиз Аллан Миллер-Тиссари. Пиосмурт улэ Финляндиысь Рованиеми городын. Ижын потэм сборнике солэн веросъёсыз сюризы. Шумпотымон, «Прикосновение» огазеяськонлэн дасям но поттэм бичетъёсаз нырысьсэ печатламын удмурт кылбурчилэн Ада Диевалэн чуръёсыз. Соосты ӟуч кылэ берыктӥз Леонид Васильев.

ИжГТУ-ысь литобъединениез шаерамы умой тодо, но кылем арын солэн куараез чузъяськиз Россиын но. Уго миым Печатья но массовой коммуникациосъя федерал агентство кичӧлтэмъя ортчем «Россиысь литература карта вылын — мынам вордскем палъёсы» проектъёсъя конкурсын Ижысь техникая университетысь огазеяськон вормиз «Пероез эскерон» номинациын. Та конкурсэ пыриськизы быдэс Россиысь литературая 200-лэсь уно огазеяськонъёс. Егит гожъяськисьёсты будэтон, творчествоез азинтон, ӟуч словесностез утён но вӧлмытон бордын усто ужамез сыӵе вылӥ дунъямын. Конкурсын вормисьёсты данъязы Москваын — книгалы сӥзем 25-тӥ калыккуспо ярмаркаын.

Галина Семёнова

Удмурт Дунне
By Удмурт Дунне 19 февраля, 2013 08:53