Филипповнаез доры кошкиз

Удмурт Дунне
By Удмурт Дунне 25 февраля, 2013 15:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Филипповнаез доры кошкиз

Анатолий Юшков

Анатолий Юшков

Улонысь кошкиз Можга ёросысь Бадӟым Сибы гуртысь шаерчи, СССР-ысь дышетон удысысь отличник, ужысь ветеран, «Удмурт дуннелэн» эшез Анатолий Юшков.

Анатолий Алексеевич вордскиз Грак ёросысь Ускы (Кузебаево) гуртын. Кылем арын со 80 арессэ пусйиз. Та адями быдэс улонзэ сӥзиз нылпиосты визьноданлы. Ужаз Грак, Кизнер, Можга ёросъёсын дышетӥсь но директор луыса. Егит визьнодасез вожмаськыса доразы ужаны ӧтё вал Ува роноен кивалтӥсь Франц Янцен но Можгаысь роноен кивалтӥсь Анна Данилова. Анатолий Алексеевич бырйиз Можга ёросысь Бадӟым Сибы гуртэз. Трос бызьылӥз татысь выль школаез 1973-тӥ арын усьтон понна.

Анатолий Юшковлы кельше вал «ваменэс» кыл. Ачиз но сыӵе ик вал. Мае малпаз, одно быдэстоз. Кылсярысь, Бадӟым Сибы школаын директорын ужакуз, со историяя урокъёс нуиз. Куд-огезлэн шуэмзы потӥз: тон историк ӧвӧл, нош предметэз нуиськод. Анатолий Алексеевич малпаз: ӧвӧл бере — луоно. Озьы со 1978-тӥ арын нош ик дышетскыны пыриз Удмурт кун университетэ, историяя факультетэ. Бадӟым Сибыысь студент группаязы тужгес арлыдоез луиз, соку Анатолий Юшковлы 42 арес ни вал.

Историк луэмез солы ужаны юрттӥз. Анатолий Алексеевичлэн сюлмаськеменыз, архивъёсын бугыръяськеменыз, калыкен пумиськылэменыз, Бадӟым Сибы гуртын музей усьтӥськиз. Азьвыл школалэн юртаз гуртлы но дышетӥсьлы Вера Толстаялы сӥзем музей Бадӟым Сибылэн данъяськонэз луэ.

Та гуртысь трос тодмо адямиос потэмын: писатель, драматург Игнатий Гаврилов, Удмуртиысь дано артист Василий Гаврилов, драматург Анатолий Григорьев, тодосчи Михаил Шишкин. Соосын оградэ пуктыны луэ Анатолий Юшковез но. Анатолий Алексеевич туж трос печатласькиз Можга, Кизнер ёрос газетъёсын, ужъёсыз потылӥзы «Удмурт дуннеын». Михаил Шишкинэн валче соос куинь книга поттӥзы. Анатолий Алексеевич уно архивъёсын пукиз, трос лыдӟиськиз, гожъяськиз. Книга дасян — секыт уж. Шаерчилэн синъёсыз ӧз чидалэ, кыксэ ик операция лэсьтоно луиз. Но со понна книгаос кыӵе тунсыкоесь, мур пуштросъемесь пӧрмизы, шуылӥз Анатолий Алексеевич.

Ассэ со шудо адямиен лыдъяз. Грак ёросысь Поршур школаын ужакуз, Анатолий Алексеевич синмаськиз дышетӥсьлы Елизавета Филипповналы. Кузпалзэ со Филипповнае гинэ шуылӥз. Аслэсьтыз нылпиоссэ сямен ик будэтӥз кышноезлэсь куинь пиналзэ. Филипповнаеныз соос туж тупаса но ог-огзэс яратыса улӥзы. Кузпалъёслэн Юля нылзы вордскиз на.

Берло аръёссэ Анатолий Алексеевич огназ улӥз. Филипповнаез улонысь кошкиз, нылпиосыз но вордэм юртысьтызы лобӟизы, асьэлэн семьяоссы кылдӥзы. Атайзэс огзы но ӧз вунэтэ, котькуд шутэтскон нуналъёсы бертылӥзы. Нош Анатолий Алексеевич озьы ик гожъяськиз, лыдӟиськиз, куды керттӥз. Витетӥ классысен кутаны дышетскемез мултэс ӧз луы. Гуртоос губияны ветлыны, курегпуз возьыны солэсь кудыоссэ вожмаськыса басьязы. Висёнэз но арлыдыз шоры учкытэк, та адями сыӵе ик котьмаин тунсыкъяськись но выльзэ тодыны тыршись вал.

Огполаз пумиськыкумы со шуиз:
— Аръёс ортчемъя улон шоры учконъёс воштӥсько вылэм. Мон пересьмытозям атеист вал. Филипповнае весь куаретылӥз: ваменэс, кызьы Инмарлы уд оскы. Кышное улонысь кошкем бере учконъёсы воштӥськизы. Мон азьло кадь ик ваменэс, но табере Инмарлы оскисько.

Анатолий Алексеевич Филипповнаез доры кошкиз, 81 аресаз мыныкуз. А. Юшковез берпум сюресаз келяны трос калык люкаськиз: ӵыжы-выжыосыз, дышетэм нылпиосыз, вуизы вордскем Грак ёросысьтыз эшъёсыз но. Ми но, «Удмурт дунне» газетын ужасьёс, мур куректэммес вераськом Анатолий Алексеевичлэн нылпиосызлы атайзы улонысь кошкемен валче. Автормы но лыдӟисьмы, шаерчи Анатолий Алексеевич сояз дуннеын ӟеч мед кӧлоз.

Галина Семёнова

Удмурт Дунне
By Удмурт Дунне 25 февраля, 2013 15:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<