Эшъяськон тулкым

Удмурт Дунне
By Удмурт Дунне 12 февраля, 2013 11:27
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Эшъяськон тулкым

Бӧдьялась нылпиос, 4 кылэз  дышетыса, будо.

Бӧдьялась нылпиос, 4 кылэз дышетыса, будо.

Удмуртилэсь ог 70 иськемын гинэ, Татарстанысь Огырчи ёросын, уло 3 сюрс 500 пала удмуртъёс. Куддыръя соослэн кӧтсы ӝож луэ: ми доры ӵемгес фин но эстон куноос вуо. Нош Удмуртиын уг но адӟо кадь вормонъёсмес, удмурт кылэз но сям-йылолъёсмес утьыны быгатэммес.

Огырчиос — ньыль кыло

Кылем арняе татын бадӟым форум ортчиз. Варклед-Бӧдья гуртэ 120 пала куноос вуизы. «Трос калыкъёс пӧлын шаертодон пыр ас выжыдэ утён» форумез радъязы Огырчи ёросысь дышетонъя управление но Кучук шор ёзо школа — солэн бурд улаз интыяськемын Бӧдьялась пичи классъёслы чаклам школа. Ужрадэ пыриськизы матысь удмурт гуртъёсысь нылпиос но дышетӥсьёс. Огырчи ёросын куинь удмурт гурт — Варклед-Бӧдья, Сарсак-Омга но Варзи-Пельга. Татысь дышетӥсьёс туж тупаса уло артысь Алнаш ёросысь школаосын. Уго Бӧдьяысен бусы вамен шонерак отчыозь дас иськем но уг луы. Усо, Азамат, Варзи-Ятчи школаосысь дышетӥсьёс но нылпиос татчы мыло-кыдо вуизы. Бӧдьяосын эшъяськыны мылкыд каризы Пичи Пурга ёросысь Вуж Мӧнья гуртысь дышетӥсьёс но — таосты но туж вакчи иськемъёс гинэ люко.

Бадӟым форумлэсь ужзэ кӧня ке люкетлы висъязы. Нылпиос шаертодонлы сӥзем 30-лэсь ятыр докладъёс дасяллям. Гуртъёссылы, калыксылы, пӧртэм йылолъёссылы сӥзем ужъёссы туж тунсыкоесь но паймымонэсь пӧрмиллям. Та проектлы кутскон сётӥсь дышетӥсьлэн Ольга Халитовалэн ӵапак таӵе бадӟым малпанэз вал. Огырчи районысь удмурт пиналъёс медаз, пе, кышкалэ вожвылъяськыны. Кыӵе ке учырын Удмуртиын улӥсьёс мед вожъяськозы бигер удмуртъёслы.

Кызьы уд вожъяськы? Кучук школаын 11-тӥ классын дышетскись нылаш Надя Фёдорова докладаз ӵошатӥз удмурт, бигер но англи калык веранъёсты. Нош ужзэ со гожтэм ӟуч кылын. Ньыль кылэз дышетыса-тодыса, будо татысь нылпиос.

Кин докладтэк лыктӥз — таос но ужлы ӧз ёрме. Соосты возьмазы киужлы сӥзем секциосын. Одӥгъёсыз пужъятскизы, мукетъёсыз керттӥськизы, куинетӥосыз куро пунӥзы. Пичи Пурга ёросысь Вуж Мӧнья гуртысь Киужъёсъя юртын ужасьёс дорысь нылпиос ӧз ик кошкылэ.

Нылъёслэсь азьло пиос куро пунонлэсь ӧз ваньме. Эктыны мылкыд карись пиналъёс понна но секция вал. Нош нылпи садъёсын ужасьёсты асьсэ калык шудонъёссылы дышетӥзы Варклед-Бӧдья садысь воспитательёс.

Удмуртъёсты дунъяло бигеръёс

Нимысьтыз верам потэ Огырчи районысь удмурт гуртъёс пумысен. Соос татын куинь гинэ. Сарсак-Омга — тужгес бадӟымез. Варклед-Бӧдья — шоро-куспоез, Варзи-Пельга — тужгес пичиез.
Бӧдья пыре Кучуково бигер поселение. Отын — шор ёзо школа, сельсовет, мечеть. Гурт поселениын 1 сюрс улӥсез ке, пӧлысьтыз 350-эз — бӧдьяос. Кучукын тросгес пенсионеръёссы — 200 мурт, нош удмурт гуртын соос 50 гинэ, Бӧдьялан пиналгес калык улэ. Уката шумпоттэ нылпиослэн лыдзы. Варклед-Бӧдьялан али вордскем но 17 аресозь нылъёссы-пиоссы 97 кузя. Нош Кучукын — собыдӟа гуртын — пиналъёссы 91 кузя гинэ.

Бӧдьялась 24 тэшкы-лиос дышетско асьсэ гуртысьтызы школаын ик.
— Пиналъёсмы табере ӧжытгес кылизы. Соизлы сюлэм шуг. Туэ 4 мурт гинэ нырысетӥ классэ лыктӥз. Нош выляз аре соос 2 сяна уз луэ, — вера начальной школалэн директорез Ольга Вахитова.
Нош бадӟымъёсыз нылпиос 40 кузя нуналлы быдэ ветло Кучукысь школае. Сюрес кузь ӧвӧл — 3 иськем пала. Но нылпиос сое пыдын уг лёгало — «Фиат» автобус нуллэ, нуналлы быдэ 8 рейс лэсьтэ.

Бигеръёс паймыса учко удмуртъёслэн огазьын, тупаса улыны быгатэмзы шоры. Сабантуй-а, форум-а, бӧдьяос быдэс гуртэн огъя ужез вормо. Со дыре ик удмуртъёсты дунъяны но быгато.
Тани кылем сӥзьыл Варклед-Бӧдьяла выль клуб пуктӥзы. Гуртын 180 гинэ хозяйство, но сое пичи шуыса ӧз лыдъялэ. Выль клубез калык 20 арлэсь кема возьмаз. Со понна табере шумпотонзы 325 квадрат метр быдӟа. Клубын библиотекалы но инты висъязы. Нош залэз спортзал быдӟа. Кулэ дыръяз, татын, пе, ӵошатсконъёс но ортчытыны луоз. Таӵе тузӥ юрт 12 миллион манет тыр усиз. Со Татарстанын кутэм нимысьтыз программая быдэстэмын, шуэ гурт поселенилэн йырыз Рустам Нурмухаметов.

Нош покчи нылпиослы гуртын вань сад но, школа но. Нялтас вераса, школаын но тупатъян ужъёс ортчытэмын. 30 арлэсь кема сылӥсь юртэз нимысьтыз кутэм планъя выльдо. Озьы Бӧдья школалэн липетэз но, ву гумыосыз но выльдӥськизы, юртэ сёрос кылдӥз, выль пластик укноос пуксизы. Нош дышетон удысын модернизация чотын школае проектор но интерактивной доскаос вуизы.

Малы бӧдьяосты тазьы дунъяло — соос тае асьсэос но тодо. Уго калыксы нокыӵе ужлэсь уг кышка. Соинтэк-а кӧня ке ар талэсь азьло «АкБарс» компания татчы парсь вордонъя бадӟым комплекс пуктӥз.

Кужмо карисько ӵошатскыса

Нимысьтыз верано на бӧдьяослэсь куно карыны быгатэмзэс. Таизлы, пе, соос бигеръёслэсь дышетско. Куно пумитаны уксё кытысь ке куроно шуыса, бӧдьяослэн тодазы но ӧй вал. Ёрос администрация висъяз 8 сюрс манет. Ӵукна ик куноосты вӧйын нянен пумитазы, ӝӧк сьӧры пуктыса, пӧсь чаен сектазы. Ӝӧк выл тыр — чак-чак, пыжиськем, торт, канфет. Нош нуназе понна 120 муртлы сюанэ кадь ӝӧк пуктӥзы, ӧз висъялэ нылпиосты но, бадӟымъёсты но. Районысь сётэм уксё вӧзы котькудӥз сылалтӥськемзэ, компотсэ, вареннязэ, пыжиськемзэ вуттӥз на.

— Бигеръёс вӧзын улыса, кужмогес кариськыны турттӥськом, — ушъя Огырчи районысь удмуртъёсты администрациысь дыше-тонъя управленилэн азьвыл кивалтӥсез, чын-чын удмурт кышномурт Тамара Николаева. — Соослы тау но шуыны кулэ. Та дырозь бигеръёс быгато анай кылзэс школаын дышетонлы арняяз 6 час висъяны. Таосын артэ удмурт кыллы но 4 час сётӥське. Вӧзаз удмурт нылпиос 2 час бигер кылэз дышето.

Бадӟым форумлэн кыкетӥ люкетэз кырӟанъя но эктонъя фестиваль сямен азинскиз. Татын быгатонлыксэс возьматӥзы Огырчи районысь нылпиос но, Алнаш ёросысь куноос но.
— Эшъяськон фестиваль кадь луиз туннэ нунал, — пусйиз Азамат школаысь дышетӥсь Ольга Рябина. — Ми паймим татын табыдӟа ужез радъяны быгатэмзылы.

Сӥзем потэ, та ужзэс бӧдьяос медаз аналтэ. Азьланяз та выллем ужрадъёссылы уката паськыт сюрес мед усьтӥськоз.

Алёна Ионина
Туспуктӥз Алёна Ионина

Удмурт Дунне
By Удмурт Дунне 12 февраля, 2013 11:27
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<