Эшъяськон адӟиське… эктонын

Удмурт Дунне
By Удмурт Дунне 12 февраля, 2013 13:24

Эшъяськон адӟиське… эктонын

Удмурт егитъёслэн "Шунды" огазеяськонзы

Удмурт егитъёслэн «Шунды» огазеяськонзы

Удмуртиын туннэ ужа 30 калык огазеяськон. Та огазеяськонъёслэн 185 ёзъёссы усьтэмын городъёсын но районъёсын. Соос утё, азинто 22 выжы калыклэсь сям-йылолъёссэс, культуразэс, тодон-валанзэс.

Таӵе лыдпусъёсты паськытатэм кенешын ивортӥз нациосын ужан политикая министр Владимир Завалин, 2012-тӥ арын тыршемзылы йылпумъянъёс лэсьтыкуз. Пичи музъем вылын трос пӧртэм выжыос улӥськомы ке но, ог-огмес валаны, ог-огмылы юрттыны тыршиськомы, шуиз министр.

Туннэ Удмуртиын 4 эшъяськон юрт: Ижын, Глазовын, Эгралан но Сарапулын. Министерство юрттэмен, калык огазеяськонъёс ортчытӥзы 250-лэсь трос ужрадъёс. Сям-йылолъёслы гинэ сӥземын ӧй вал соос. Уноез герӟаськемын нылпиосты будэтонэн. Таин валче школаосы но библиотекаосы басьтэмын пӧртэм выжы калыкъёслэн историзылы но литературазылы сӥзем книгаос. Министерстволэн сайтаз пырыса, удмурт кылын кылзыны луэ пӧртэм выжы калыкъёслэсь выжыкылъёссэс.

Ог-огдэ яратон мылкыд пичиысен пыӵатон бордын ӟеч ужало Пичи Пургалась, Якшур-Бӧдьялась, Гракысь нылпи садъёс. Удмурт «Шунды», ӟуч «Спас» огазеяськонъёс егитъёсты визьнодан понна сюлмасько. Тужгес ӟеч адӟиське, макем асьмеос яркытэсь, Ижысь Эшъяськон юртын арлы быдэ ортчись эктон ӝытын. Татчы вань огазеяськонъёсысь кырӟаны-тапыртыны быгатӥсьёс люкасько.

Нялтас вераса, туннэ юалляськемъёс пӧлысь 60 процентэз шуо: ог-огмылы тушмонаськытэк улӥськомы. Озьы ке но уноез кырыжгес учко шуныт палъёсысь вуэмъёс шоры: таослы, пе, осконмы ӧвӧлгес. Но валэктон уж нуимы, соослэн культураенызы тодматскимы ке, со кырыж учконъёс но пумен бырозы, шуиз министр Владимир Завалин.

Елена Фёдорова

Удмурт Дунне
By Удмурт Дунне 12 февраля, 2013 13:24