Пытсан — усьтон ӧвӧл. Эгра ёросын 18 школа. 4-яз гинэ дышето удмурт кылэз

Удмурт Дунне
By Удмурт Дунне 12 февраля, 2013 11:39
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пытсан — усьтон ӧвӧл.  Эгра ёросын 18 школа. 4-яз гинэ дышето удмурт кылэз

Эгра ёросысь Чутыр школаын тракторист но вуриськись луыны дышето. Но вунэ удмурт кыл.

Эгра ёросысь Чутыр школаын тракторист но вуриськись луыны дышето. Но вунэ удмурт кыл.

1980-тӥ аръёсы Чутыр школалэн директорез Фаина Богданова, ӟуч нылкышно, удмурт кылъя но литературая урокъёсты, калык пумитъяськемен, туж секытэн пыртӥз дышетон программае. Аръёс ӵоже анай-атайёс но пиналъёс яратӥзы та предметъёсты. Но туала директор, удмурт кылъя дышетӥсь Галина Малых, ялӥз: предметэз ворсано.

Чутыр черкогуртын 1 сюрс 124 улӥсез. 80 процентэз соос пӧлысь — удмуртъёс. Школазылы 169 ар. Татчы дышетскыны вайыло 8 гуртысь пиналъёсты. Ваньмыз визь люкасьёс 175 кузя. Куспазы но нылпиос удмуртэн верасько, удмурт луэмзылэсь туннэ уг возьдасько ни. Талы азьвыл аръёсы туж паймысалзы. Но гуртоослэсь мылкыдзэс-малпанзэс удмуртлык пала ас вакытаз берыктыны быгатӥз вал Фаина Богданова. Со понна уноез йыбыртто азьвыл директорлы.

Таин сэрен ик, лэся, кылем арын 1-тӥ сентябре уноез мумы-бубыос но пиналъёс воксё долказы. Соослы ялӥзы уго: удмурт кыл но литература предметъёс уз луэ ни. Зэм, 9-тӥ классэз жалязы ик: 1-тӥ классысен анай кылэз дышетӥзы бере, туэ быдэс курсэз, пе, таосыд мед йылпумъялозы ни, со сярысь аттестатазы но пусъём. Но выль дышетскон арын нокинлы но таӵе шуд уз усьы ни.

— Ми гурт удыс программая ужаны кутскимы, — веранзэ мытэ Галина Малых. — Таин валче 8-тӥ-11-тӥ классъёсын 1 часлы йылӥзы биология, химия, физика но технология предметъёс. Школамес йылпумъякузы, нылпиослэн киязы тракторист я вуриськись луэм пумысен «корочказы» луоз. Ми нылпиослы сюрес усьтӥськомы, тае валалэ вал.

— Огзэ сюресэз усьтӥськоды, мукетсэ пытсаськоды кадь уг поты-а? Тӥ — удмурт кылъя дышетӥсь ук. Вӧсь ӧвӧл шат удмурт кыллэн быремез понна? — паймисько.

— Мар карод на? Пиналъёс гурт удыс направление усьтыны куремен, тазьы ужано луимы. 5-тӥ-9-тӥ классын дышетскисьёс пӧлын юалляськон ортчытӥмы. Озьы 114 пинал пӧлысь 10 процентэз но удмурт кылэз дышетэмез потэ шуыса мылкыдзэ ӧз вера. Мон ачим но талы зол паймемын вал.

— Кин но со сипыртэ: со анкетаосты лэсьтон азьын нылпиосын удмуртлыклы пумит вераськон уж нуэмын вал.

— Со шонер ӧвӧл — супыльтон! Мумы-бубыослэн тыбыр сьӧразы номыр уродэз лэсьтэмын ӧвӧл. Собере, кин шуиз, удмурт кылэз воксё утялтӥськом? Мон ачим уг тодӥськы на, кызьы ужаломы вуоно арын. Оло, усьтом шаертодонъя предметэз. Удмурт культураез отын валэктомы.

Сям-йылолъёсты, малпасько, котькудӥз тодыны кулэ. Но эн вунэтэ созэ но: мон, дышетӥсь сяна, кивалтӥсь на. Мынам, нылпиослэсь куронзэс санэ басьтытэк, ужаме уг луы. Пиналъёслы туала арын вузъёсы секыт пырыны. Гуртъёсын репетиторъёс ӧвӧл. Удмурт кылъя ЕГЭ уд сёты.

Собере, милям пиналъёсмы удмуртэз капчиятэм программая дышетӥзы Чутырысь ӟучомемъёс пӧлазы ванен. Олимпиадаосы уг пырисько. Сочинениос бадӟым уг гожто, произведениосты быдэссэ уг лыдӟо. Соин но удмурт кылэз быдтыса, номыр уродэз ӧвӧл, малпамы. Но милям вань 1-тӥ-4-тӥ классъёслы чаклам удмурт культурая кружокмы. Кылем арын 10-тӥ-11-тӥ класслы усьтӥмы вал удмурт кылын факультатив. Так-то тӥ кружок гожтэ. Отчы 1 ныл гинэ ветлӥз.

* * *
Галина Малых туж оскытыны выриз: нылпиос но анай-атайёс асьсэос, пе, пумитъясько удмуртэз дышетыны. Но мон ачим школа кузя нылпиослэсь юалляськыса ветлӥ, кинлы гинэ ӧй вазиськы — ваньзы куректо анай кылзы бырем пумысен. Кылсярысь, 9-тӥ классысь Даша Силина шуэ:

— Чутырысь ӟуч пиналъёс шумпото ик, соосты удмуртэн уз курадӟытэ ни шуыса. Но милям классамы удмурт кыл вань на бере, рос-прос валаса ӧз вуттэ на зэмос югдурез. Мон ачим Чемошур гуртысь. Анай-атае удмуртъёс. «Шундыкар» лагере удмурт луэменым ик шеди вал.

— Буш кылимы. Мӧзмыт луиз. Дышетӥсьмы но Нелли Аркадьевна Ложкина туж умой вал, — шуэ 7-тӥ классысь Эльвира Леконцева.

Анай-атайёс но ӟудэмын. Ӟучомемъёсыз гинэ но лулӟыло. Кылсярысь, Надежда Перевощикова шуэ:

— Палэнысь мурт дышетыны ветлысалыз ке, югдурмы секыт шуыса малпасалмы ай. Нош милемлы нокинэ утчанэз ӧвӧл! Аслам пиналъёсы ӟучесь ини. Соослы удмурт кыл — кунгожсьӧр кыл кадь. Но соос шумпотыса ветлӥзы удмурт кылъя уроказы. Кык кылэз дышетыса, йырвизьзы ӟечгес ужалоз шуыса, ачим но шумпотылӥ. Нош табере удмурт кыл ӧвӧл но, культураез но тодытэк будозы ни соос.

Нелли Ложкина дышетӥсьсы котыре но гуртоос огпол гинэ ӧз лякиськылэ: малы, пе, урокез быдтӥды.

— Но мар мон соослы пумит шуом? — синвуаське Нелли Аркадьевна. — Ачим со сярысь кылем арын май толэзе педсоветысен гинэ тодӥ. Йырсиосы пежыр ӝутскизы. Аслам сюлэмы туж бӧрдэ. Туннэ ке но син азям 1986-тӥ ар. Фаина Богданова соку монэ лэзьяз вал удмурт кылъя но литературая курсъёсы. Ачим пиналъёсын ӵош дышетӥ анай кылэз. Сомында литература люкамын! Табере со нокинлы но кулэ уз луы ни — ваньмыз пумен кошкоз макулатурае. Эх, эн юалляське мынэсьтым… Якшур-Бӧдьялась гимназиын классъёссэс, пе, люко: одӥгъёсыз удмуртэз дышето, мукетъёсыз мукет предметэз мургес валало. Нош ми…

* * *
Чутыр шор ёзо школаын классъёсыз пӧртэм удысъёсъя люкыны нокызьы но уг луы. Тазьы аслэсьтыз ӵоге директор:

— Классэз люкыны нылпиосмы уг тырмо. Висъямы ке но, кин ветлоз отчы? Ветлӥсез ке но сюриз, люкеммы уз луы. Дышетонъя но наукая министерство часъёс уг сёты ке, мар мон каром?

— Паймоно кадь: министерство ваньзэ погыльтэ директоръёс вылэ, куинь мурт ке но удмурт кыл понна дурбасьтӥз ке, нылпиослы урок усьтоно, со пумысен кыл кутэ ачиз школа, со киын сыӵе луонлык вань, шуэ.

— Мон нокинэ но уг пӧяськы. Али гинэ бадӟым эскерон пыр ортчимы, министерствоысь специалистъёс чаклазы, кызьы радъямын дышетон программамы. Удмурт кылэз быдтэмысьтым сьӧлыкъёсы луысалзы ке, эскерон дыръя куме ниысалзы, дыр, ук. 20 ар кивалтӥсько ни. Огпол но дышетон программаез тӥяме ӧвӧл. Ӟеч дышетэммы понна школаос пӧлын 1 миллион манет но утӥмы вал. Школамес компьютеръёсын узырмытӥмы, химия кабинетысь лабораториез выльдӥмы, спортинвентарь басьтӥмы. Школаямы туннэ туж трос тунсыкоез. Пиналъёсмы но ваньзэ туж валасесь. Куд-огез монэ школае пырон азьын ик пумита, ӟыгыръяське, чупа. Аслам внукъёсы ӧвӧл но, соос аслам нылпиосы кадь пото, мылкыдме ӝуто. Соос понна ваньзэ ӟечсэ гинэ лэсьтэме потэ.

Нылпиос школаысен ик тракторист но вуриськись луыса потыны быгатозы шуыса, тау карыны кулэ Галина Малыхлы. Но сюлэм бӧрдэ: малы со удмурт кыл чотын луыны кулэ? Малы ке малпан кылдэ: директор ваньзэ рос-прос мертаз меда? Оло, удмуртлыкез утёнын маке лэсьтыны луысал на? Эгра ёрос администрациысь дышетонъя управлениен кивалтӥсь Светлана Даутова шуэ ук:

— Школа одно чакланы кулэ, мае дышетыны косэ федерация. Но котькуд школалы арняяз ватсаса эшшо сётӥське 20 час. Со часъёсты директор ачиз чакла, кыӵе предметлы висъяны. Удмурт кылэз со часъёс пӧлы пыртыны луэ. Галина Александровнаен та пумысен вераськимы вал. Со оскытӥз: нылпиос факультативе мылысь-кыдысь ветло. Мон ӧй тодылы, со факультатив кружок кылемын, отчы бадӟым классъёсысь 1 адями ветлӥз шуыса. Но, оло, зэмен ик секыт удмурт класс люканы?

Эгралась 1 номеро школаын тани арлы быдэ шугенгес но шугенгес удмурт класс тырмытӥськомы. Туннэ районамы 18 школа. 4-яз гинэ на дышето анай кылэз: Сэпын, Мазьгиын, Эгралан но Зураын. Берлоезлэн директорез но лулӟылэ ни: удмурт классмес, оло, ворсалом ни. Азьвыл аръёсы классын 10-12 пинал люкаськылӥз ке, удмурт кылъя но технология урокъёсы нылпиосты люкиськыны лэзё ни вал. Национальной программая дышетскисьёс понна ӟуч кылъя урок арняяз 1 час сёто вал, ӟучъёслы — 3 час. Собере та амалэз пытсазы. Али гуртъёсын выльысь лэзё ни пичи классъёс усьтыны. 14 нылпи вань ке, нимысьтыз класс усьтыны луэ. Но 11-12 кузя ке но люкаськизы, сыӵеос пумитэ мыныны ми дась. Оло, удмурт кылэн югдур вуоно дышетскон арын умой пала берытскоз.

* * *
Чутырысь югдурез кылыса, «Удмурт Кенеш» огазеяськонлэн кивалтӥсез Игорь Семёнов пурӟиз: Галина Малых туж умойтэм лэсьтэ, удмурт кылэз быдтыса соин ӝот-ӝот вераськытэк уз луы, пе.

Елена Сараматова
Туспуктӥз Владимир Беломорских

Удмурт Дунне
By Удмурт Дунне 12 февраля, 2013 11:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<