Эчешон луэ кенешон

Удмурт Дунне
By Удмурт Дунне 19 февраля, 2013 09:13

Эчешон луэ кенешон

 

Д. Стрелков

Д. Стрелков

Литературалы но публицистикалы сӥзем «Италмас» журнал — кие кутымон, зӧк, йӧн-йӧн. Паймонэз ӧвӧл: азьвыл редакторез Зоя Богомолова сое пырыосын бичаз-люказ.

Журнал 2007-тӥ арын потыны кутскиз. Кичӧлтӥсез но утисез-поттӥсез — Гуманитарной но инженерной технологиосъя Камской институтлэн ректорез, тодмо тодосчи Валерий Никулин,

Михаил Петров писательлэн нунокез. Та журнал сярысь вераським историкен, институтысь издательской ёзэн кивалтӥсен Дмитрий Стрелковен.

— Дмитрий Валерьевич, кызьы та синмаськымон журнал дуннеез адӟиз?

— Журнал пӧртэм вакытъёс пыр ортчемын. Али со араз куать пол потэ, уксё висъя М. Петров нимо фонд, со кылдэмын институт бордын. Печатлаське Сарапул карын. Ӝоген дас тямысэтӥез выпуск вордскоз. Котькудӥз номер марлы ке сӥземын: М. Петров вордскем дырысен 105 арез пусъёнлы, О. Поскрёбышевлэн 80 ар тырмонэзлы, егитъёслэн ужъёссылы. Берлояз буре вайиськом Зоя Богомоловаез но мукет автормес но эшмес Ольга Парфёноваез. Зоя Алексеевнаез журналлэн анаез ниманы луэ. Со авторъёсмылэсь лыдзэс йылэтӥз, кусып возиз критикъёсын но тодосчиосын, гожъяськисьёсын но кылбурчиосын.

— Тиражды 300-500 экземпляр сяна ӧвӧл. Кин дорозь журнал вуэ?

— Журналэз шаерысьтымы валтӥсь библиотекаосы, школаосы но мукет дышетскон юртъёсы вуттыны тыршиськом. Та благотворительной ужлы кельше. Бамъёсамы реклама но, политика но ӧвӧл. Озьы ик сое вотэсын, Камской институтлэн бамаз пырыса, лыдӟыны луэ. Зоя Алексеевна ачиз, журналэз котомкаосы тырыса, Москвае, Писательёслэн огазеяськоназы нуллэ вал. Тодмоосызлы кузьмалляз, журналэн тодматъяз.

— Егитъёслы, «Луч» но «Инвожо» журналъёсын сяна, печатласькыны нокытын. Тӥ егитъёслы быдэс номерез сӥзьыны дӥсьтӥды?

— Гожтэмъёссы трос люкаськизы. Милемлы Ижын дышетскисьёс гинэ уг гожъяло, куд-ог авторъёсмы Москваын, Санкт-Петербургын, Украинаын, кунгожсьӧрын уло. Кылсярысь, Д. Кожев, А. Варламова, А. Лукин, Г. Старовойтов, В. Мордачева, М. Разенков — соосын кылем арын потэм номерын тодматскыны быгатоды. Интернет кылдэмен, гожъяськисьёсты шедьтыны капчи луиз. Эшъёссы ог-огзылы дэмлало, журналмы сярысь верало.

italmas— Удмурт авторъёс пӧлысь кинэ печатласькоды?

— Удмурт эшъёсмы трос. Нырысь ик, тодмо тодосчиос, журналистъёс, гожъяськисьёс: А. Зуева-Измайлова, Е. Загребин, Ф. Ермаков, М. Гаврилова-Решитько, М. Атаманов, А. Голубкова, Р. Кириллова, В. Михайлов, Н. Бочкарева, А. Диева но трос-трос мукетъёсыз. Егитъёсты но шумпотыса печатлалом. Озьы ик удмурт кылэ берыктэм классикаез но лыдӟись доры вуттӥськом, кылсярысь, М. Петровен берыктэм М. Лермонтовлэн «Герой нашего времени» романысьтыз «Тамань» люкетсэ.

— Удмуртиысь туала литератураын югдурез кызьы суредасалды?

— Малпасько, Писательёслэн союззы но ачимъяськись егитъёс вискын гоп луыны кулэ ӧвӧл. Пересь аксакалъёс но куке но ми андеграунд шуыса кесяськизы. Тросгес мед луозы вылэм ваче вераськон, пӧртэм дискуссиос. Историк луисько бере, мон журналын эчешон-керетонлы дышемын. Историлы сӥзем журналъёсын тодосчиос, кыӵе ке ужпумез сэрттыса-пертчыса, аръёсын-аръёсын ог-огзылы пумит гожъяло. Со нимаське кенешон…

Дарали Лели

Удмурт Дунне
By Удмурт Дунне 19 февраля, 2013 09:13