Драматургия — фаст-фуд ӧвӧл

Удмурт Дунне
By Удмурт Дунне 19 февраля, 2013 10:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Драматургия — фаст-фуд ӧвӧл

Е. Байкова

Е. Байкова

Киужъёсъя элькун юртысь научно-методической ёзэтэн кивалтӥсь Елена Байкова дипломзэ калык театрлы сӥзиз, драматургилэсь кабъёссэ эскериз.

— Берло дыре удмурт драматургия сярысь вераськонъёс йыло. Лена, кызьы малпаськод, пьеса гожтыку, маиз тужгес но секытэз?

— Пьеса гожтон понна сценаез, действиез валаны кулэ. Театрлэн аслаз аспӧртэмлыкъёсыз вань, соосъя котькуд режиссёр но артист тупатске, нош драматург ӵем гинэ палэнэ кыле. Удмурт театрын атае Вячеслав Байков «Дорвыжы» спектаклез пуктыку, мон тае ӟеч шӧдӥ-валай. Нырысь ик, эпос пӧртэм дауръёсты суреда. Драматурглэн малпамезъя, та вӧлмыт мадёсэз трос мурт шудыны кулэ кадь. Режиссёр произведенилэсь пуштроссэ усьтон понна аспӧртэм амал шедьтӥз: кӧня ке гинэ геройёс пӧртэм вакытъёсы сюрыло, дыръёс пыр уяло. Драматург но режиссёр огъя ужало ке, спектакль пӧрме. Василий Ванюшевлэн но Вячеслав Байковлэн «Дорвыжызы» удалтӥз, малпасько. Атае трос кужым понӥз эпосэз драма кылэ берыктыны. Ӵапак та — драматурглэн ужез.

— Тыныд ӧз-а поты, спектакль ӧжытак мӧзмыт пӧрмиз шуыса?

— Сыӵе произведение шулдыртонлы уг тупа. Удмурт кылэз, литератураез, шаерлэсь историзэ дышетӥсьёс понна умой. Студентъёслы, школае ветлӥсьёслы учкымон спектакль пӧрмиз. Али пиналъёслэн йыръёссы клипъёсын, суредъёсын тырмемын. Лыдӟиськыны азьтэмъясько. Кузь, мур пуштросо произведениосты, сцена вылысен адӟыса, валаны капчигес.

— Берлоосыз премьераос кыӵе мылкыд кельтӥзы?

— Али пуктэмъёс пӧлысь ваньзэ ӧй учкы ке но (куд-огзэ учкыны мылкыд но ӧвӧл), шумпотӥсько, театр выль драматургъёсын ужа, кылсярысь, Павел Зоринэн (Глеб Павлоид). Солэн «Художник и Надежда» спектаклез шумпоттӥз. Огласянь, огшоры гурт тема, мукет ласянь, туала шӧмыз вань, социальной ужпумез но ӝутэ. Драматургия — фаст-фуд ӧвӧл, учкисез кужмысь серекъятыны уг яра.

 

«Художник и Надежда» спектакльысь суред

«Художник и Надежда» спектакльысь суред

Удмурт театрын учкисен герӟаськем шуг-секытъёс кылдо ни. Со сокем дышиз эктон-кырӟан-шоккетонлы — мае ке малпаськытӥсьсэ учкемез уг ни поты… Шуо: улон сотэк но секыт, милям шулдырзэгес учкеммы потэ. Но улон но пӧртэм пало ук, малы сое одно ик, дышем амалъёсын гольтыръяса, сюбегатод? Та вуж сямъёс азинскыны люкето. Берыктэм произведениосты но пуктыны кышкало. Мон удмурт драматургилы пумит ӧвӧл, но валамон огез: драматургъёсты но дышетыны кулэ. Ӟеч ӟуч пьесаосты но берыктыны умой луысал. Оло, асьме драматургъёслы нырысь берыкъяны дышетсконо?

Малпасько, удмуртъёс али туж туалаесь: гурт темаосты гинэ учкемзы потоз на меда?
Гуртэз возьматэ, кылсярысь, В. Садовниковлэн «Сюан» спектаклез. Выльдэм спектаклез учконо ке, вань действие малы ке катанчи сьӧрын ортче. Ойдо отчы, вераськом! Ойдо татчы, лэсьтом!

Тунсыкоез ялан син азьысь ыше. Вуж «Сюанэз» учконо ке, отын ваньмыз валамон вал: узыръёс — уродэсь, куанеръёс — умоесь. Выльдэмез спектакль концерт кадь пӧрамын.

Удмурт классикае выль улон шокчыса, «Пужъятэм дэрем» спектакль но кылдӥз. Озьы-тазьы бергатыса, И. Гавриловлэн пьесаеныз мар карыны валатэк, атае, Вячеслав Байков, шуак амал шедьтӥз. Всё, пе, валай, кызьы тае пуктоно! Возьматоно абсурд жанрен. Пӧрмиз аспӧртэм «шузиослэн гуртсы».

— Гурт калык ӧз-а ӝожтӥськы?

— Паймоно кадь, малпанъёс туж пӧртэмесь. Бен, со котьку озьы, дыр. Котькыӵе спектаклез кык паласен учкыны-дунъяны луэ. Мед турлы репертуар улоз. Учкись кельшисьсэ быръёз.

Дарали Лели
Туспуктӥз Ольга Глухова

Удмурт Дунне
By Удмурт Дунне 19 февраля, 2013 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<