Баян Катюш

Удмурт Дунне
By Удмурт Дунне 22 февраля, 2013 13:03

Баян Катюш

Е. Антонова (шорысез) «арганчиосын»

Е. Антонова (шорысез) «арганчиосын»

Пичи Пурга ёросысь Эдэйгуртысь Екатерина Антоновалэн тросэз кырӟанъёсыз калыке вӧлмемын, уката ик «Удмурт нылкышно» кырӟанэз. Кызь ар талэсь азьло, гуртысьтыз кызьлэсь ятыр нылкышноосты но егит нылъёсты огинэ люкаса, со «Арганчи» ансамбль кылдытӥз. «Пурга кизилиос» центре ветлӥсь усточи нылпиосын ужа. Калыклэсь кылзэ, историзэ но лулчеберетсэ данъямез понна Трокай Борисов нимо премилэн лауреатэз луэ, пусъемын «Россиысь культура удысысь дано ужась» нимын. 18-тӥ феврале солы 60 арес тырмиз.

Скал но кыскысал, арган но кыскасал

Свердловск улосысь кык сирота нылъёс секыт улон вакытэ пыдйыл ветлонъязы Удмурт шаерысь Улӥнь Юри гуртэ вуиллям. Нюра нимоез со гуртэ ик бызьыса кылем, Кузьыли Лёня (Никонов Леонид) сое кышнолы кельтэм. Никонов кузпалъёслэн нырысь ик Ванизы вордскем, собере — Катизы.

Екатерина Леонидовна, анаез улонысь кошкыса ини, выжы-кумызэ тодэмез потыса, Свердловск улосэ юромо вуылӥз. Мамаезлэн ныл йыр фамилиез Четырина вылэм. Вордосэ басьтыса, Михайлова луэм, бызьыса — Никонова. Тодмо луэм на: метрикаяз солэн нимыз Нина вылэм, вордосэ басьтыса, Анна луэм, нош улӥнь юриос Нюра шуыса вазиськылӥллям. Эшшо шараяськем на: Свердловск улосын Четырино черкогуртсы вылэм. Отын ик Екатерина Леонидовналэн мемеез вордӥськем, луоз. Но со гурт быремын ни вылэм, юалляськыны нокинлэсь луэм.

Пичи Катя ялан анаез сьӧры колхоз фермае ветлӥз. Будӥ ке, мон но та апайёс кадь ик луо шуыса, скал кыскисьёс шоры вожъяськыса учкылӥз. Скал кыскыны дояркаосты возь вылэ машинаен нуллӥзы. Кати но сьӧразы шумпотыса калъяськылӥз. Ыр тӧл пельтэмъя куара эшшо но золгес потэ, ужаны кужым люкаське. Дораз бертыса, Кати Ваня агаез шоры но лушкемак учкылӥз, соиз угось олокин кадь шумприч арганзэ кыскалляз. Монэ но дышеты вал шуэмысьтыз, агаез вакчияк гинэ вераз: одӥг пол возьмато — дышид ке дышод, уд ке уд. Нылаш туж капчиен дышиз шудыны.

Одӥг пол солы гуртысьтызы егитъёсын ужась Володя Коновалов ӵектӥз: Катя, тынад куараед туж чебер, арганэн но умой шудӥськод, тыныд дышетскыны кулэ. Озьы со шӧдтэк шорысь Пичи Пурга черкогуртэ вуиз, отын культпросветучилищее дышетскыны дасян курсъёс мыно вал. Курсъёсы ветлэм дасо пала нылъёс но пиос пӧлысь Катяез огназэ гинэ дышетскыны кутӥзы. Училищеын солы кельшиз, оркестровой люкетын дышетскиз. Дышетсконзэ йылпумъякуз, сое туж куро вал Удмурт театре кыльыны. Ачиз культурая министр, комиссилэн кивалтӥсез Аркадий Завойских Катялы шуиз: Нина Бакишева вӧзын кырӟалод. Нош нылаш ваменэс сямзэ поттӥз: вордскем гуртам берто. Тросэз эшъёсыз нылашез пыкылӥзы: шуд пуйылы городэ, сыӵе интые уж дэмлало, нош со ке…

Яратӥсь сюлэмъёс

Клубе потась егитъёсты кызьы огинэ люкано шуыса, егит худрук кема малпаськиз. Угось соос уйшорозь, сема сиыса но доминоен шудыса, пуко но доразы берто. Оло, агитбригада кылдытыса эскероно? Одӥг пол, кык пол баянзэ поттэ. Егитъёс бордаз биниськыны кутскизы кадь. Озьы соос концертъёсын фермаосы но бусыосы потаны шӧтазы. Отӥяз юриосты сьӧрлось гуртъёсы но концертъёсын ӧтчаны кутскизы, вакчи дыр куспын республикаын соос тодмо луизы. Агитбригадазылы «Чипчирган» ним понӥзы. Собереяз шуд усиз таосыдлы Казаньын ӵошатсконэ пыриськыны, лауреат нимын бертӥзы.

Ужез син азьын пӧзьыны кутскиз. Но…

Клубын ужам сяна, Катя комсомол секретарьлэсь ужзэ быдэсъяз на. Гуртысь гуртэ, вал вылэ пуксьыса, ветлылӥз. Одӥг пол валэз, тракторлэсь кышкатскыса, нылашез тыбыр вылысьтыз сэрпалтӥз. Катя интыяз ик гуньдэм кадь луиз, туж вӧсь вал солы. Уже потэ но арганзэ но кутэмез уг луы ни, сюрлыез кужектыса висе. Соку егит ныллы врачъёс ужзэ воштыны косӥзы. Нылаш, мылыз потытэк, вуриськон цехе вуиз. Клуб ужез уг кошкылы, весь син азяз эшъёсыз, пель сьӧраз арган куара. Одӥг пол доразы Эдэйгуртысь колхозэн кивалтӥсь пыриз: клубамы ужась, пе, утчасько. Катяез возёд на, пе, интыяз, лобӟыса сямен Эдэйгуртэ кошкиз. Сюлмад кельшымтэ уж борды думиськыса, уд пукы ук. Капчи мылкыдо муртэ гуртоос соку ик асьсэлэн каризы. Татын но со агитбригада кылдытӥз.

Никонова Эдэйгуртысь ик шудзэ шедьтэ, соку гинэ армиысь бертэм егит, чебер, чылкыт Антонов Паримонлы бызе. Соос, Казане смотре ветлыкузы, поездын умой-умой тодматскизы. Егит кузпалъёс бӧрсьысь бӧрсе куинь нылъёссэс вордӥзы: Оля, Нина но Надя. Екатерина Леонидовна сюлмаськыны кутскиз: сомында нылпиен Париез (озьы картэзлы шунытак вазиськылӥз) лэзёз на меда клубын ужаны? Лэзем гинэ ӧвӧл, эсьмаса, ӵошен пӧртэм городъёсы но смотръёсы поталлязы. Париез но угось кырӟаны-вераны мыло-кыдо адями вал. Екатерина Леонидовна ӵапак со вакытэ фольклор ансамбль кылдытӥз. Со чебер но аспӧртэмлыко кырӟаны-вераны быгатӥсь коллективеныз кыӵе гинэ фестивальёсы но смотръёсы потаны ӧз кылды: Финляндие, Венгрие, Эстоние, Екатеринбурге, Москвае, Ханты-Мансийске, Казане, Челябинске, Чебоксарые но трос-трос уно городъёсы. Озьы ветлыса но, ноку но бакча сиёнтэк но, пудотэк но ӧз улы. Котьмаиз солэн удалтӥз.

Шумпотон — нылпиос но нуныкайёс

Екатерина Леонидовналэн нылпиосызлэн табере куиньназылэн ик асьсэлэн семьяоссы вань ини. Оля вуз карисьын ужа. Кузпалыз асьсэ гуртысьтызы ке но, сельхозинститутэз йылпумъямез бере Вавож ёросысь Ӟамбай гуртэ ужаны келязы.

— Мамаелэсь телевизор пыр кырӟамзэ адӟисько ке, синвуосы ӵужыр васько, доре бертэм кадь луисько, — вера Оля. — Анае сярысь малпаськыны кутскисько ке, сыӵе со мыным жаль потэ. 45 арескын кузпалтэк кылиз. Папамы угось туж вазь улонысь кошкиз. Мамаез олокӧня но курасьёс вал, милемлы луыса ик, лэся, нокинлы ӧз ни бызьы. Со меӵак сямыныз шуылоз вал: «Вань ке — вань, ӧвӧл ке — ӧвӧл. Мон уг вошты Париме кулэмез бере но». Кызь ар но ӝыны соос ӵошенназы улӥзы, ноку ог-огзэс пыкылэмзэс кылэммы ӧй вал.

Надиен Нина пичиысен ик Ижысь усточиослэн школаязы дышетскизы: соос анайзылэсь сюрессэ бырйизы, культурая училищеез йылпумъязы. Надя та вакытэ Пичи Пурга черкогуртысь ёрос культура юртын тырше, 12 ар ини Пургаысь хорен кивалтэ. Озьы ик со кылдытӥз на «Настроение» ансамбль. Кылем арын Пичи Пурга черкогуртысь Пётр Симановен «Ми тӥледыз куное ӧтимы» кырӟанэнызы (крезьгурез П. Симановлэн, кылъёсыз А. Белоноговлэн) «Мынам Удмуртие» радиоын «Арлэн устоез кырӟанэз» конкурсын нырысетӥ инты басьтӥзы. Нош Нина Ижын тырше — со ужбергатӥсь. Ниназэ Екатерина Леонидовна аслаз вордскем нуналаз но часаз ик вордэм.
Екатерина Леонидовналэн куинь нылъёсыз 9 полэс шумпотон вайизы ини. Олилэн 4 пиналъёсыз будо, Надилэн кык, нош Ниналэн — куинь. Ассэ Екатерина Леонидовна шудо песянаен лыдъя: 3 пичи пиосыз но 6 дыдыосыз будо ук. Ялан со сюрес вылын, нылпиоссэ эскерыны яке утиськыны ветлэ.

— Мӧзмыса пукыны маза уг сёто, ӝытлы быдэ кин ке но дорам пукыны лыктэ, — вера Екатерина Леонидовна. — Куд-огез нылкышноос, киужъёссэс кутыса ик, вуо (ачиз но угось со олокин кадь киужлы шаплы адями). Огнам кылисько ке, мӧзмон-бӧрдонме, арганме кыскаса, буйгатӥсько, сое ӟыгыртӥсько но зар-зар бӧрдӥсько, шумпотонме но арганэным ӵош ик буйгатӥсько. Куд ке дыръя, уйин но султыса, асме ачим юнме шорысь но шулдыртӥсько: корка тыр жин-жин кырӟасько. Озьы ик тӥни выль кырӟанъёс вордӥсько.

Любовь Тихонова
Туспуктӥз Владимир Беломорских

Удмурт Дунне
By Удмурт Дунне 22 февраля, 2013 13:03