Бакчаязы — йӧ каток!

Удмурт Дунне
By Удмурт Дунне 1 февраля, 2013 09:03

Бакчаязы — йӧ каток!

Малых кузпалъёс Саша пиенызы

Малых кузпалъёс Саша пиенызы

Малых кузпалъёс гурт пиналъёсты таза улонэн эшъяськыто

Дэри ёросысь Шор Постол школаын дышетскисьёс бадӟым вормонъёс басьто спортын. Пиналъёсты кужмогес луыны дышето Малых кузпалъёс.

Физкультурая урокъёсты Василий Григорьевич нуэ, нош Ольга Алексеевна Дэри черкогуртысь спортъя нылпи школалэн Постол ёзаз тренер луыса ужа.

Ольга Малых (Рогожникова) дышетскемын Постолын. 1988-тӥ-1989-тӥ аръёсы удмурт нылаш Совето Союзысь одӥгез кужмоез спортсмен вал. Спортэз яратон мылкыд солы пыӵатӥзы Митрошин агай-вынъёс. Николай Павлович сельсоветэн кивалтӥз, нош Михаил Павлович — школаен, кыкназы но ДЮСШ-ын ужазы. Со вакытэ нылпи спорт школа колхозлэн ваньбуреныз лыдъяськиз. 7-тӥ классын дышетскыкуз, Оля, нырысьсэ Удмуртилэн палэназ потыса, вормонъёс басьтӥз.

— Нокыӵе ӵошатсконъёсы ветлытэк, тренермы классысьтымы вить муртэ кутӥз но, Брянске потӥмы. Совето Союзысь пиналъёслэн вожвылъяськоназы ваньзэ паймытӥмы, — веранзэ мытӥз Ольга Алексеевна. — 3 иськеме бызьылонын вормисе потӥ. Тренеръёс монэ синйылтӥзы, 9-тӥ классын дышетскыкум, Союзысь пиналъёслэн сборноязы кутӥзы. Ялан тренировкаосы, сборъёсы ветлӥ. Школаез йылпумъятозям, быдэс Союзэз котыртыны кылдӥз.

Ольгалэн семьяез Вылӥ Постол гуртын улӥз. Та гуртысь пиналъёс Шор Постолэ дышетскыны ветлӥзы. Нуналлы быдэ 3 иськем мында сюресэз солань-талань вамышъязы. Со ик луиз, лэся, мугор кыдатэмзы.

— 9-тӥ классысен Кисловодске ветлӥ, отчыозь Иже гинэ но огнам вуылэме ӧй вал, — шуиз дышетӥсь. — Николай Павлович тренере мынон сюресме кагаз вылэ суредаз но кузь сюрес вылэ келяз. Мурт городэ вуэме бере кема поръяй, кулэ адресэз уйшорозь шедьтӥ ик. Мон кадь пиналъёс быдэс Союзысь озьы люкаськылӥзы.

Дышетӥсьёсыз малпазы вал, Совето Союзэз котыръясь нылаш Москва палъёсы ик тодон-валан люканы пыроз шуыса. Тренеръёсыз ӵектэмъя Москваысь физкультурая институтэ ветлӥз. Экзамен сётон нунал азьын, ваньмыз шоры киыныз шонтыса, вордскем палъёсаз бертӥз. Дэри черкогуртысь ДЮСШ-е вамыштӥз. Озьы со эшшо 2-3 арзэ бызьылӥз на.

— Укмыстонэтӥ аръёсы ваньмыз воштӥськиз, бызьылӥсьёслэсь мылкыдзэс бурдъясьёс быризы, спортсменъёс но тренеръёс нокинлы кулэ ӧз луэ, котькудӥз тыршиз ас быгатэмезъя, — шуэ Ольга Алексеевна. — Удмурт кун университетысь мугорез кыдатонъя но спортъя факультетэ дышетскыны пыри. Ар но ӝыны пала тодон-валан люкаса вуттӥ но одӥгаз ӵошатсконын вӧсь луыны шедтӥ. Тазэ но дышетсконме куштыса, дорам бертӥ. Собере монэ ӧтиз школалэн кивалтӥсез Михаил Павлович Митрошин. Нылпиосын ужаны туж кельшиз, со куспын ик Ярысь педучилищеез йылпумъяй.

Кӧня ке ар ортчыса, Ольга Алексеевна эшшо одӥг пол УдГУ-э йыгаськылӥз. Но дышетскон куспаз семья кылдытыса, 5-тӥ курсысен нош ик дышетсконзэ аналтӥз.

— Москвае дышетскыны пырымтэысьтым но УдГУ-эз йылпумъямтэысьтым, чик но уг куректӥськы, — шуэ гуртысь тренер. — Мар кулэ вал, ваньзэ басьтӥ, нош диплом — со бумага. Москваысь институтэ пырысал ке, шуг вераны, кин мынэсьтым пӧрмысал. Профессиональной спортэ выжысал ке, тазалыке но ӧй луысал ни, дыр. Нош та вакытэ куинь пиосы будо.

— Кузпалэныды нырысь пумиськемдэс тодӥськоды на, дыр?

— Университетын дышетскыкумы, ог-огмес адӟылӥмы, со кӧня ке курслы бадӟымгес вал, нош нырысьсэ вераськимы «Комсомолец Удмуртии» газетлэн призэз понна ӵошатскон дыръя. Со бӧрсьы трос аръёс ӵоже ог-огмес ӧм адӟылэ, выльысь пумиськимы 1998-тӥ арын Якшур-Бӧдьяын гужем Гурт шудонъёс дыръя. Одӥгаз ӝытазе эшъёсыныз ӵош Дэри ёросысь нылъёс доры куное пыраз, серекъяса кадь адресме юаз. Кема ик ӧз ортчы, Эгра ёросысь гожтэт вуиз. Озьы ар но ӝыны пала гожтэт пыр кусып возимы. Куд-ог дыръя куное дорам ветлӥз — великен. Пеймыт сикъёстӥ йыромыса но ветлылэм.

Василий Григорьевич вордскемын но быдэ вуэмын Эгра ёросысь Левой Кушъя гуртын. Пичиысен бызьылэ, синмаськемын ӝог вамышъянлы. Со вакытэ Совето Союзлэн командаяз шедён секытэн сётскиз. Соин Василий Малых Казахстанэ кошкиз. Ӝог ветлонъя спортъя мастерлэсь куронзэ быдэстыса, берен вордскем палъёсаз бертӥз.

* * *
Малых кузпалъёс адӟем карымон луо. Ӵошатсконъёсын ог-огзылы юрттӥсько. Пыдын я куасэн бызьылыны пото ке, одно ик быдэс семьяен. Золгес пӧсяно луизы кылем арын, Дэри черкогуртын ортчись Гурт шудонъёс дыръя соос ёроссылэсь данзэ утизы.

— Гурт шудонъёсы пыриськон понна ёросысь семьяосты вормоно, — шуо Малых кузпалъёс. — Толалтэзэ Ожмосысь Байковъёс кужмогес луо, нош гужемзэ — Дэриысь Сергеевъёс. Дэриын ортчоно ӵошатскон азьын соос интые милемлы дасяськоно луиз. Толэзьёсын мугормес кыдатӥмы, ужысь бертэммы бере великен ворттылӥмы, шашкиен шудӥмы, дротикъёс лэзьямы. Саша пимы но эшъёсызлэсь бере ӧз кыльы. Озьы ке но огъя зачётын вормисьёс дорозь ӝутскыны ӧзгес кылды.
Кузпалъёс пусъё, пиналъёслы спортэз яратон мылкыд одно ик пичиысен но семьяын пыӵатоно. Кылсярысь, Сашик пизы, пе, 2 аресысен куасэн нискыланы кутскем. 2-тӥ классын дышетскись Вовазы пыдын но, куасэн но бызьылэ, 5 аресъем Радомирзылы гинэ паймемын — паллян ки, лэся. Спортэн эшъяськемзы пиослы дышетскыны но юрттэ. Сашазэс нырысетӥ класс бере 3-тӥе выжтӥллям. Табере тани 8-тӥ классын дышетске, «витьёсын» эшъяське. Пиос котьма карыны вутско, юрт котырысьтызы вань ужъёссэс мыло-кыдо быдэсъяло, кулэ дыръяз выж мисько, сиён пӧзьто.

Шор Постол школаын физкультурая урокъёсты тунсыкогес карон вылысь Василий Григорьевич тросгес саклык висъя бызьылон-тэтчанлы, шудонъёслы, нош толалтэзэ куасэн ворттылонлы. Малпаське конькиен нискыланэз но урокъёсаз пыртон сярысь.

— Школа доры кыкетӥ арзэ гинэ йӧ кисьтӥзы, нош мынам кузпалы 4 ар ӵоже бакчаямы каток возе, — вераз Ольга Алексеевна. — Вань мылкыд карисьёс йӧ выламы нискылало. Кузпалы котьма карыны усточи, трос аръёс ӵоже куас сюрес дасяны курадӟимы, нош туэ амал шедьтӥз — мотоблокез кутэ. Бакча берысьтымы но, школа котырысь но куас сюресъёсты волятыса возе.

Гурт школаын физкультурая урокъёсты ортчытыны арысь аре капчигес луэ. Залын урокъёсты нуон понна ваньмыз вань, шугъяськоно куасъёс ласянь. Соос трос кадь, нош районын ортчись ӵошатсконъёсы потано кадьёсыз кык гинэ. Ярано коть, анай-атайёс юрттӥсько, нылпиоссылы дуно тӥрлык басьто. Ма, собере Малыхъёс но дорысьтызы куинь куз куас ваё. Озьы быдэс командалы люкаське ни тӥрлыксы.

Валентина Емельянова

Туспуктӥз Владимир Беломорских

Удмурт Дунне
By Удмурт Дунне 1 февраля, 2013 09:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<