Атас медаз лопыръяськы, ву медаз ньылы

Удмурт Дунне
By Удмурт Дунне 22 февраля, 2013 13:17

Атас медаз лопыръяськы, ву медаз ньылы

Эгралась нылпиос сак кылзо Глазысь тылпу кысӥсь Иван Ильинлэсь мадемзэ

Эгралась нылпиос сак кылзо Глазысь тылпу кысӥсь Иван Ильинлэсь мадемзэ

Ортчем арлы йылпумъянъёс лэсьтӥзы МЧС-ын ужасьёс, Эгра каргуртэ люкаськылыса. Калыклы возьматӥзы тылпуэн нюръяськон, ивор вӧлмытон амалъёсты, выль машинаосты.

Азьвыл аръёсы та выллем ужрадэ ёрос йыръёсты ӧтьылӥзы ке, таяз учыре нырысьсэ люказы шаерысьтымы вань муниципал кылдытэтъёслэсь йыръёссэс. Тылпуэз алон ужрад капчиенгес сётске, солэсь бервылъёссэ утялтон сярысь. МЧС-ын ужасьёс калык пӧлын валэктон уж ялан ортчыто ке но, горд атас лекъяськемысь уг дугды. 2012-тӥ ар куспын шаерамы 1 сюрс 276 пол тылпу потаз, ӵынын ӝокаса, 142 мурт быриз. Тылпу кысӥсьёс 288 муртэ ӝуась интыысь поттӥзы.

Горд атас ӵемгес кузёяське улон юртъёсын. Куазь кезьыт дыръя юртъеръёсты золгес эстыны кутско. Тылпу потэ пилиськем гуръёс я шунтӥськон арбериос бордысь. Кылем ар пумын горд атас ӵемгес йыгаськиз город квартираосы.

Улонэз сура-пожа кудӟытӥсь юон. Шӧмаськем муртъёслэн катьсы уг тырмы тамак пумзэс куштыны, тросэз умме усе кысымтэ тамакен. Арысь аре йыло юртъеръёсты юри сутон учыръёс но.

Ёросысь тылпу кысонъя частьёс рос-прос ужало ке но, пыдлось гуртъёсы соос ӝегаса вуо. Юрттэт вуытозь, сэрегпумъёс гинэ кылё на. Кышкыт учыръёсты дыраз палэнтон вылысь тросаз муниципал кылдытэтъёсын дружинникъёс ужало. Оло, соослы луыса ик тылпуослэн лыдзы арысь аре кулэсме. Россиысь МЧС-лэн Удмурт

Республикая валтӥсь управлениезлэн кивалтӥсез Пётр Фомин ивортэмъя, 2012-тӥ арын тылпуослэн лыдзы, 2011-тӥ арен ӵошатыса, 6 но ӝыны процентлы кулэсмемын. Горд атас ӧжытгес лопыръяськиз Ижын но Глаз городъёсын, Кияса ёросын. Тылын быремъёслэн лыдзы ӧжытгес кыле ке но, ӵынын ӝокамъёс пӧлы быдэ вуымтэос но шедемын.

— Кема ӧвӧл пень вылэ кыльыны, тылпулэсь утиськон вылысь нырысь ик асьсэлы адямиослы сюлмаськоно, — шуиз Пётр Фомин. — 2011-тӥ-2012-тӥ аръёслы кутэм федерал законъя вань гурт поселениосын кылдытыны ӵектэмын тылпуэн нюръяськыны мылкыд карисьёслэсь нимысьтыз отрядъёс. Та ласянь адӟем карымон югдур Можга, Эгра но Пичи Пурга ёросъёсын.

Гурт кивалтӥсьёсты куризы, кышкыт учыр кылдыку, адямиослы ивортон амалъёсты паськытатыны: корт я гырлы жугоно, сотовой телефонъёсты, факелъёсты, сиренаез уже кутоно. Ӵапак та амалъёсты Эграе люкаськем кивалтӥсьёслы уж вылын возьматӥзы. Шаерысьтымы тылпу кысӥсьёс кӧня ке аръёс ӵоже Приволжск федерал округын нырысетӥ интыын вамышъяло. Нош Удмуртиын кышкытлыклэсь утиськон удысын нырысетӥ интые потӥзы Глаз город, Пичи Пурга ёрос но Эгра ёросысь Выль Ӟатча муниципал кылдытэт.

Туннэ нуналлы Эгра ёросысь 15 муниципал кылдытэт пӧлысь 7-аз мыло-кыдо ужало ни дружинникъёс. Кышкытлыкез палэнтон вылысь ёрос администрация 1,5 миллион манет висъяз. Ужрадэ люкаськемъёсты асьсэ ужан амалъёсынызы тодматӥз Выль Ӟатча муниципал кылдытэтлэн йырыз Юрий Черных. Та муниципал кылдытэтэ 13 гурт пыре, ваньмыз улӥсез — 1 сюрс 385 адями. Ёрос центре мынон сюрессы — 40-50 иськем.

— Гуртъёс куспын но сюресъёс кузесь, — шуиз Юрий Черных. — Кышкыт учыръёс кылдылыку, Эграысь юрттэт ӝегаса вуылӥз. Ма карыны паймемысьтымы, гурт калыкен кенешыса, 2009-тӥ арын тылпуэн нюръяськонъя пост кылдытӥм. Ас кужыменымы ГАЗ-53 машинаез тупатӥмы, куштӥськем столовойлэсь гараж пӧрмытӥм.

Гуртысьтымы котыр ласянь адӟем карымон ньыль воргоронэз тылпу кысӥсе кутӥмы. Нош 2011-тӥ арын тылпуэн нюръяськонъя постмес паськытатыны малпамы. Та вакытэ куинь гуртын быдэн машинаос ужало, 3 мотопомпамы, тылпу кысӥсьёслэн нимаз ужан тӥрлыксы. Та вакытэ дружинникъёслэн лыдзы 45-ёзь вуиз.

Юртъерез шунтон быдэсак муниципал кылдытэт вылэ усемын ке, водительёслы уждун тырон но машинаез ужатон понна коньдон висъяське шаермылэн бюджетысьтыз, со понна нимысьтыз субсидия висъяське. Соин ик тылпу кысон удысэ эграос быръё тужгес оскымон воргоронъёсты гинэ. Дружинникъёслэсь данзэс ӝутон вылысь гуртысь депутатъёслэн кенешсы ӵектӥз соосты музъем понна выт тыронлэсь мозмытыны.

Кылем ар понна Ӟатча вадьсын горд атас одӥг пол гинэ лопыртӥськем, нош валля арын, пе, кӧшкемыт учыръёссы ӧй вал. Озьы ке но Ӟатчалась тылпу кысӥсьёс ужтэк ӧз пуке, кулэ дыръяз бускельёссылы, Сюмси, Якшур-Бӧдья ёросъёсын улӥсьёс доры, юрттӥськыны потазы. Кышкыт учыръёсты дыраз шараяны юрттэ на гуртысь черксы. Черклэн гырлыез борды гозы думиллям, кышкыт учыр кылдыку, гырлы шуккемзы сьӧр гуртъёсы но кылӥське.

Гурт кивалтӥсьёс Юрий Черныхлэсь пыр-почгес юалляськизы субсидия басьтон пумысен. Глаз ёросысь Кожиль муниципал кылдытэтлэн йырыз Эльвира Ельцова 2006-тӥ арын ик аслаз бурд улаз басьтэм вылэм тылпу кысонъя депоез. Ас коньдонэнызы 2 машинаез но кӧня ке ужасьёсты возьыны быгатӥллям. Куинь ар ортчыса, коньдонэн шуг-секытъёссы кылдэм бере, муниципал кылдытэтын тылпу кысӥсьёслэсь куштӥськыны малпазы вал. Гурт калык лэзьымтэ. Та вакытэ одӥгез машиназы Нюр (Кожиль) гуртын интыямын. Матысь дыре кыкетӥ машиназэс тупатыса Ӟакагуртэ (Дзякино) выжтыны малпало. Кызьы вераз Эльвира Васильевна, та гурт сик пӧлы интыяськемын, пу юртъёс ог-огзылы матын сыло, чугун сюрес кошке, котыр гыбед.

Эграе лыктэмъёслы возьматӥзы пилоттэк лобась самолётэз. Бадӟым кыр интые радэн-радэн пуктылэмын вал калыклы нырысетӥ юрттэт сётонъя палаткаос: эмъясьёслэн, пӧрасьёслэн, машина тупатӥсьёслэн. Асьме шаеретӥ федерал сюрес ортче бере, котькыӵе учырлы дась луоно, шуиз шаерысьтымы валтӥсь спасатель Пётр Фомин.

Одӥгез таӵе палатка пуктэмын вал декабрь толэзьлэн тужгес кезьыт нуналъёсаз «Елабуга-Пермь» сюрес дуре. Удмуртиысь спасательёс кынмем водительёсты шунтӥзы-сюдӥзы, тӥяськем машинаоссэс тупатыны юрттӥзы.
Со сяна, тылпу кысӥсьёс нырысетӥ юрттэт сёто, сюресъёс вылын шуккиськон учыръёс кылдыку. Нелькиськем машинаосты сэрттыны тужгес ӵем кылдылэ пургаослы. Кылем арын ӟеч ужамзы понна соослы выль машина сётӥзы. Евгений Поров сое Москваысь вайиз, выль «валэзлэсь» табере пичи но уг ӵыды.

— Таӵе машина Удмуртиын одӥг гинэ, сое выльдэм «Газель» шуыны луоз, — вераз водитель Евгений Поров. — Пичи шуыса шораз эн учке, солэн ӝоглыкез бадӟымгес. Пичи кузоваз котьма тӥрлыкез вань, эсьма, уйин ужан вылысь фонарьёсыз гинэ но чакламын.

МЧС-ын ужасьёсты озьы ик сюлмаськыто шуръёс но ӵыпетъёс. Кылем арын 85 мурт выйиз. Пӧлысьтызы 73 процентэз шӧмаськемын вылэм. Гужем нуналъёс сярысь но вунэтоно ӧвӧл, муниципал кылдытэтъёслэн йыръёссылы пыласькон интыос кылдытыны ӵектӥзы. Лыдпусъёс возьмато: юри кылдытэм интыосын одӥг адями но вуын ӧз быры.

Валентина Емельянова
Туспуктэмез авторлэн

Удмурт Дунне
By Удмурт Дунне 22 февраля, 2013 13:17