Адӟем каре Икарлэсь

Удмурт Дунне
By Удмурт Дунне 22 февраля, 2013 10:41
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Адӟем каре Икарлэсь

К. Малышев

К. Малышев

Туала нылпиос «Кин луэмед потэ юанлы?» огвыллем валэктозы: юрист, экономист, программист яке менеджер. 20-30 ар талэсь азьло гинэ пиос уйбыртылӥзы, лётчик яке космонавт луо шуыса. Соин Алнаш ёросын будэм Константин Малышевлэн быръем удысэз туала егитъёслы паймымон потоз. 24 аресъем воргорон — лейтенант, МИ-8 вертолётысь лётчик.

— Малы лётчик луыны малпад?

— Мынам атае военной, запасысь подполковник. Со авиациын служить кариз. Атае быдэс Россиез котыртӥз, шуыны луоз. Училище бере службазэ нуиз Мурманск улосысь Апатиты городын, мон но отын вордски. Соин пичи дырысеным ик тодӥсько вал ини, кин луэме потэ. Военной городокын нылпи садэз ӧй адӟылы. Нырысьсэ отчы мынӥ, Шарканэ улыны бертыса. Нырысетӥ классэ вамыштӥ Каракулиноын. Нош ар ортчыса, ми бертӥм атаелэн вордӥськем палаз — Алнаш ёросысь Казакгуртэ. Озьы Удмурт шаер мынам доре луиз. Нош школаез йылпумъяса, Сызраньысь Авиацияя вылӥ институтэ пыри.

— Кызьы ортчизы дышетскон аръёсыд?

— Нырысь туж секыт вал. Мӧзми дор палъёслэсь, анай-атайлэсь, эшъёслэсь. Озьы ке но берлань сюрес ӧй вал, аслым шуи: чидано. Дышетскыкум монэ «удмурт» гинэ шуылӥзы. Эшъёсы паймылӥзы, кыӵе кылын, пе, телефон пыр вераськиськод? Валэктӥ, удмурт кылын шуыса. Вылаз ик, быдэс институтын огнам удмурт вал.
Котькин понна дышетскон аръёс — тужгес шулдыр но тунсыко вакыт кадь пото. Ноку но уг вунэты нырысьсэ инме тубемме. Сое номырин но уд ӵошаты, вераны кылъёс но уз тырме. Сюлэм шурдэ но кадь, сомында выль кужым но кытысь ке пыре кадь.

Нырысь-валысь секыт потӥз уставъя улон. Но ваньмызлы дышоно вылэм. Атае пенсиын ял карод, шуэ.

— Нош кыӵе луыны кулэ зэмос лётчик?

— Туж дӥсьтӥсь, шаплы, малпаськыны быгатӥсь, номырлэсь но кышкасьтэм. Лётчикъёс понна тужгес адӟем карымон герой — грек мифъёсысь Икар. Солэн бурдъёс сярысь малпанэз авиацилы улон сетӥз, шуыны луоз.

— Лётчикъёслэн, пе, асьсэлы гинэ тупась йӧспӧртэм осконъёссы вань…

— Озьы. Кытчы ке лобӟиськом ке, «последний» ноку ум шуиське, со понна «крайний» кыл вань. Инмын тодэ вайиськом Икарез, соку лэсьтоно уж быдэсме.

— Лобатэк улыны быгатод на-а?

— Инбам — мынам улонэ. Туннэ нуналлы 140 час лобай ни. Со трос ӧвӧл ай, но мынам ваньмыз азьпалан. Уноез юало: кышкыт ӧвӧл-а, пе? Тодмо лётчик-испытатель Виктор Пугачёв шуиз: лобаны курдыт ӧвӧл, кышкыт лобатэк улыны.

— Службаедлэсь ял карыкуд, кызьы шутэтскиськод?

— Туж кельше чорыганы. Собере парапланъёсын лобаны-ӵошатскыны яратӥсько. Но таизлы али дыр уггес тырмы. Жаляса верано, гуртэ но шер вуисько. Институтэз быдтэме бере келязы Псков областьысь Остров городэ. Нош та дыре Торжокын командировкаын, собере лэзёзы Санкт-Петербурге, отысь ини берен Острове — шундыпуксён кунгожез чакланы.

— Али военнойёслы кун ласянь бадӟым саклык висъяло. Улон инты сёто, уждунзэс кӧня ке поллы будэто. Иське, тон туж йӧно казакпи.

— Казакпи ӧвӧл ни, кышнояськи. Кузпалы та вакытэ Алнашын улэ, аслам улон интые рос-прос ӧвӧл на. Квартира сётӥзы ке, сьӧрам нуо ни. Государство, зэмзэ но, военнойёсты уг вунэты. Армиын выль техника вужзэ копак воштэ ини. Малпасько, азьланяз таӵе ик саклык висъяськоз. Нош милям валтӥсь сюлмаськонмы Родинамес утён но рос-прос служить карон.

Ольга Васильева

Удмурт Дунне
By Удмурт Дунне 22 февраля, 2013 10:41